2030 جىلعا دەيىن الماتىدا 2,5 ميلليون اعاش وتىرعىزىلادى. بۇل تۋرالى پرەزيدەنت قاسىم-جومارت توقاەۆ قالا جۇرتىشىلىعىمەن وتكەن جيىندا ايتتى, دەپ حابارلايدى Egemen.kz.
مەملەكەت باسشىسىنىڭ ايتۋىنشا, سوڭعى جىلدارى الماتىنىڭ جاسىل قالا رەتىندەگى بەدەلى تومەندەدى. بۇل رەتتە 2030 جىلعا دەيىن قالادا 2,5 ميلليون اعاش وتىرعىزۋ جوسپارلانۋدا.
«الماتىدا اۋا مەن قورشاعان ورتا ساپاسىن جاقسارتۋدىڭ تاعى ءبىر ماڭىزدى فاكتورى كوگالداندىرۋ بولىپ تابىلادى. الماتى ارقاشان ءوزىنىڭ جاسىلىمەن تانىمال بولعان. بىراق سوڭعى جىلدارى ونىڭ جاسىل قالا رەتىندەگى بەدەلى تومەندەدى. ءبىز شەتەلگە بارامىز جانە الماتىعا قاراعاندا جاسىل جانە تازا قالالار بار ەكەنىن كورەمىز. وندا شامامەن 4 ميلليون اعاش بار, بىراق كەيبىر اۋدانداردا ولار جەتكىلىكسىز. سونىمەن قاتار قالاداعى جاسىل كەڭىستىكتەر مەن اعاشتاردىڭ 10%-دان استامى جاڭارتۋدى قاجەت ەتەدى. 2030 جىلعا دەيىن الماتىدا 2,5 ميلليون اعاش وتىرعىزىلادى. بۇل وتە ۇلكەن كولەم. ەڭ باستىسى, كوگالداندىرۋ سۋارمالى سۋدىڭ قول جەتىمدىلىگى مەن قالا جوسپارىن ەسكەرە وتىرىپ, ماعىنالى جانە بىركەلكى جۇرگىزىلۋى كەرەك», دەپ اتاپ ءوتتى قاسىم-جومارت توقاەۆ.
جالپى, الماتىدا 136 ساياباق بار. بۇگىندە ولاردىڭ سانىن كوبەيتۋ جانە اباتتاندىرۋ بويىنشا دايەكتى جۇمىس جۇرگىزىلۋدە. پرەزيدەنتتىڭ ايتۋىنشا, قالا باسشىلىعى مۇنىمەن توقتاپ قالماۋى كەرەك.
«الماتى ءوزىنىڭ «جاسىل قالا» مارتەبەسىن كۇشەيتۋى ءتيىس. بۇل تەك قالانىڭ عانا ەمەس, بۇكىل ەلدىڭ بەدەلىنە قاتىستى ماسەلە», دەپ قوستى مەملەكەت باسشىسى.