پرەمەر-مينيستر ءاليحان سمايىلوۆتىڭ توراعالىعىمەن وتكەن بۇگىنگى ۇكىمەت وتىرىسىندا قازاقستاننىڭ بيىلعى 10 ايداعى الەۋمەتتىك-ەكونوميكالىق دامۋ كورسەتكىشتەرى تالقىلاندى, دەپ حابارلايدى Egemen.kz.
وتىرىس بارىسىندا ۇلتتىق ەكونوميكا ءمينيسترى الىبەك قۋانتىروۆ بايانداما جاساپ, اتالعان كەزەڭدە رەسپۋبليكادا ءجىو ءوسۋ قارقىنى 2,5%-دى قۇرادى. اتاپ ايتقاندا, ەكونوميكانىڭ ناقتى سەكتورى 2,8%-عا, قىزمەت كورسەتۋ سالاسى 1,6%-عا ءوستى. سالالار اراسىندا اۋىل شارۋاشىلىعى (8,2%), اقپارات جانە بايلانىس (7,1%), قۇرىلىس (5%), وڭدەۋ ونەركاسىبى (4,3%), ساۋدا (4,1%), كولىك جانە قويمالاۋ (3,9%) وڭ ديناميكانى كورسەتىپ وتىر.
مينيستر اتاعان دەرەكتەرگە قاراعاندا, 2022 جىلدىڭ قاڭتار-قىركۇيەك ايلارىندا قازاقستاننىڭ سىرتقى ساۋدا اينالىمى 35%-عا ءوسىپ, $98,4 ملرد-تى قۇرادى. ەكسپورت بويىنشا كورسەتكىش 47,5%-عا ($63,8 ملرد), وڭدەلگەن تاۋارلار ەكسپورتى 37,5%-عا ($19,3 ملرد) ءوستى. يمپورت $34,6 ملرد-تى قۇرادى (16,5%-عا وسكەن). جالپى قازاقستاننىڭ وڭ ساۋدا تەڭگەرىمى $29,3 ملرد-قا جەتتى (2,2 ەسە وسكەن).
پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆتىڭ ايتۋىنشا, مەملەكەتتىك بيۋدجەتكە 12 ترلن 427 ملرد تەڭگە كىرىس ءتۇستى (جوسپار 104%-عا ورىندالدى). اتاپ ايتقاندا, رەسپۋبليكالىق بيۋدجەت 8,4 ترلن تەڭگەگە (102%), جەرگىلىكتى بيۋدجەتتەر 4 ترلن تەڭگەگە (108,5%) تولىقتى. مەملەكەتتىك بيۋدجەت شىعىستارى 96,7%-عا, ونىڭ ىشىندە رەسپۋبليكالىق بيۋدجەت شىعىستارى 98%-عا (14,5 ترلن تەڭگە), جەرگىلىكتى بيۋدجەتتەر شىعىستارى 94%-عا (8,1 ترلن تەڭگە) ورىندالدى.
جيىندا ۇلتتىق بانك توراعاسىنىڭ ورىنباسارى بەرىك شولپانقۇلوۆ تا بايانداما جاسادى.
پرەمەر-مينيستر ءاليحان سمايىلوۆ بۇگىنگى تاڭدا ەل ەكونوميكاسى قالىپتى ءوسۋ قارقىنىن ساقتاپ وتىرعانىن, ناقتى سەكتور ەكونوميكانى تۇراقتاندىرۋدىڭ نەگىزگى فاكتورى رەتىندە دامۋدىڭ وڭ ءۇردىسىن كورسەتىپ وتىرعانىن اتاپ ءوتتى. اتاپ ايتقاندا, وڭدەۋ ونەركاسىبىندەگى ءوندىرىس كولەمى 4,3%-عا, ماشينا جاساۋ سالاسىنداعى ءوندىرىس كولەمى 7,7%-عا, اۋىل شارۋاشىلىعىندا 8%-دان استامعا ءوستى.
ءاليحان سمايىلوۆتىڭ ايتۋىنشا, ىشكى جانە سىرتقى ينۆەستيتسيالاردى تارتۋ – ەكونوميكالىق ءوسۋدىڭ ماڭىزدى فاكتورى. جالپى اتالعان كەزەڭدە نەگىزگى كاپيتالعا ينۆەستيتسيالاردىڭ ءوسۋى 6,7%-دى قۇراپ وتىر.
«ونىڭ ىشىندە ەكونوميكانىڭ شيكىزاتتىق ەمەس سالالارىنا تارتىلعان ينۆەستيتسيا كولەمى ۇلعايىپ كەلەدى. ينۆەستيتسيانىڭ جوعارى ءوسىمى جىلجىمايتىن م ۇلىكپەن جاسالاتىن وپەراتسيالاردا, سونداي-اق كولىك جانە قويمالاۋ, اۋىل شارۋاشىلىعى جانە ونەركاسىپتە تىركەلدى», دەدى پرەمەر-مينيستر.
ۇكىمەت باسشىسى بارلىق نەگىزگى ماكروكورسەتكىشتەر بويىنشا قوستاناي, اقمولا, جامبىل, شىعىس قازاقستان, قىزىلوردا وبلىستارىندا, الماتى جانە شىمكەنت قالالارىندا ءوسىم بار ەكەنىن قوسا ايتتى.
ءاليحان سمايىلوۆ تۇراقتى دامۋ قارقىنىن ۇستاپ تۇرۋ ءۇشىن ەكونوميكانى ءارى قاراي ءارتاراپتاندىرۋ, ينۆەستيتسيا تارتۋ جانە تۇراقتى جۇمىس ورىندارىن قۇرۋ بويىنشا جۇمىستى كۇشەيتۋ قاجەتتىگىن اتاپ ءوتتى.
ء«وڭىر اكىمدىكتەرى جوسپارلانعان كورسەتكىشتەردى قامتاماسىز ەتىپ, ينۆەستيتسيا تارتۋ جۇمىستارىن جانداندىرۋى قاجەت. سونداي-اق ينۆەستيتسيالىق جوبالاردى ىسكە اسىرۋعا تۇراقتى مونيتورينگ جۇرگىزۋى ءتيىس», دەدى ول.
ودان بولەك, پرەمەر-مينيستر باعانىڭ ءوسۋىن تەجەۋ جۇمىستارىن تۇراقتى باقىلاۋدا ۇستاۋ كەرەك ەكەنىن ايتتى. سەبەبى ازىق-ت ۇلىك تاۋارلارى باعاسىنىڭ ءوسۋى ينفلياتسياعا ايتارلىقتاي اسەر ەتىپ كەلەدى.
«بۇل, ءبىرىنشى كەزەكتە, اكىمدىكتەر تاراپىنان قابىلدانىپ جاتقان شارالاردىڭ جەتكىلىكسىز ەكەنىن كورسەتەدى», دەدى ءاليحان سمايىلوۆ.
ءسوز سوڭىندا ۇكىمەت باسشىسى وڭىرلەر وسى جىلدىڭ سوڭىنا دەيىن الەۋمەتتىك-ەكونوميكالىق دامۋدىڭ جوسپارلانعان كورسەتكىشتەرىنە قول جەتكىزىپ, مەملەكەت باسشىسى قويعان مىندەتتەردىڭ ءتيىمدى ىسكە اسىرىلۋىن قامتاماسىز ەتۋى قاجەتتىگىن اتاپ ءوتتى.