يندونەزيانىڭ بالي ارالىندا G20 ەلدەرى كوشباسشىلارىنىڭ جىل سايىنعى ءسامميتى اشىلدى, دەپ حابارلايدى Egemen.kz ەۋرووداق كەڭەسىنىڭ سايتىنا سىلتەمە جاساپ.
سامميتتە الەم كوشباسشىلارى COVID-19 پاندەمياسىنان تۋىنداعان سىن-قاتەرلەردى, وزەكتى جاھاندىق ماسەلەلەردى جانە ينكليۋزيۆتى ءوسۋ ءۇشىن ەكونوميكاداعى كۇش-جىگەردى تالقىلاۋعا نيەتتى. ەكى كۇنگە سوزىلاتىن سامميت نۋسا دۋا جارتاسىنىڭ شىڭىندا ورنالاسقان Apurva Kempinski Bali كۋرورتتىق قوناق ۇيىندە بولادى.
سەسسيا باستالار الدىندا يندونەزيا پرەزيدەنتى جانە 2022 جىلعى G20 يندونەزيا توراعالىعىنىڭ باسشىسى دجوكو ۆيدودو سەسسياعا كەلگەن قاتىسۋشى ەلدەر دەلەگاتسيالارىنىڭ باسشىلارىمەن جەكە كەزدەستى. ۆيدودو G20 ءسامميتىنىڭ اشىلۋىندا بىرلىككە شاقىرىپ, جينالعان كوشباسشىلار الەمنىڭ جاڭا قىرعي-قاباق سوعىسقا تۇسۋىنە جول بەرمەۋى كەرەك ەكەنىن اتاپ ءوتتى. سامميت سەسسيالارى جابىق ەسىك جاعدايىندا وتەدى.
ءسامميتتىڭ ەكىنشى سەسسياسى 15 قاراشادا وتەدى. وندا جاھاندىق دەنساۋلىق ساقتاۋ ارحيتەكتۋراسى قاراستىرىلادى. ءسامميتتىڭ تسيفرلىق ترانسفورماتسياعا ارنالعان ءۇشىنشى سەسسياسى 16 قاراشادا وتەدى.
ايتا كەتەيىك, G20 قۇرامىنا ارگەنتينا, اۆستراليا, برازيليا, ۇلىبريتانيا, گەرمانيا, ءۇندىستان, يندونەزيا, يتاليا, كانادا, قىتاي, مەكسيكا, رەسەي, ساۋد ارابياسى, اقش, تۇركيا, فرانتسيا, وڭتۇستىك كورەيا, وڭتۇستىك افريكا, جاپونيا جانە ەو كىرەدى.
سامميتكە G20 كوشباسشىلارىنان بولەك, اتاپ ايتقاندا, ددۇ باسشىسى تەدروس ادحانوم گەبرەيۋس, فيفا پرەزيدەنتى دجانني ينفانتينو, ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) باس حاتشىسى ماتتياس كورمانن قاتىسادى.