رەسپۋبليكالىق بيۋدجەت كولەمى ۇلعايادى

«كەلەسى ءۇش جىلعا ارنالعان رەسپۋبليكالىق بيۋدجەت پەن ۇلتتىق قوردىڭ پارامەترلەرىن قالىپتاستىرۋ كەزىندە مەملەكەت باسشىسىنىڭ ۇنەمدى جانە جاۋاپتى بيۋدجەتتىك ساياسات تۇجىرىمداماسىن قامتاماسىز ەتۋ بويىنشا قويعان مىندەتتەرى ەسكەرىلدى. 2023-2025 جىلدارعا ارنالعان رەسپۋبليكالىق بيۋدجەتتىڭ پارامەترلەرى بيۋدجەت ساياساتىنىڭ ونىڭ كىرىس بازاسىن تولىقتىرۋدىڭ جاڭا كوزدەرىن قالىپتاستىرۋعا باعدارلانۋىن جانە بيۋدجەت شىعىستارىن الەۋمەتتىك-ەكونوميكالىق دامۋدىڭ باسىم باعىتتارىنا شوعىرلاندىرۋدى ەسكەرە وتىرىپ ايقىندالدى», دەدى الىبەك قۋانتىروۆ سەناتتىڭ جالپى وتىرىسىندا.

ونىڭ ايتۋىنشا, 2023 جىلى رەسپۋبليكالىق بيۋدجەتتىڭ كىرىستەرى بيىلعى جىلدىڭ ناقتىلانعان جوسپارىنان 37%-عا ارتىق بولادى.

«جوسپارلى كەزەڭدە 2025 جىلعا قاراي رەسپۋبليكالىق بيۋدجەتتىڭ كىرىسى 17,2%-عا وسەدى دەپ كۇتىلەدى. مۇنداعى قوسىمشا تۇسىمدەر ۇكىمەتتىڭ كىرىس بازاسىن كەڭەيتۋ جانە سالىقتىق اكىمشىلەندىرۋدى جاقسارتۋ, سونداي-اق كولەڭكەلى ەكونوميكانىڭ ۇلەسىن تومەندەتۋ بويىنشا قابىلداپ جاتقان شارالارى ەسەبىنەن قامتاماسىز ەتىلەدى», دەپ تولىقتىردى مينيستر.