بۇۇ مالىمەتىنشە, ەكولوگيالىق قىلمىس 3 ملرد دوللارعا باعالاناتىن اتىس قۇرالدارىنىڭ زاڭسىز ساۋداسىنان دا اسىپ تۇسەدى. جالپى, بۇل سالا قىلمىس دەڭگەيى تۇرعىسىنان ەسىرتكى كونترابانداسى, جالعان اقشا جاساۋ جانە ادام ساۋداسىنان كەيىن ءتورتىنشى ورىندا تۇر. ەكولوگيالىق قىلمىس سالدارىنان جوعالعان قارجى كولەمى ونىمەن كۇرەسكە جۇمسالعان قارجىدان (نەبارى 20-30 ملن دوللار) 10 مىڭ ەسە اسىپ تۇسەدى.
ساراپشىلار دەرەگىنشە, ەكوقىلمىس, اسىرەسە دامۋشى ەلدەردە ءورشىپ تۇر. سونىمەن قاتار قورشاعان ورتاعا زيان كەلتىرەتىن قىلمىستارعا رەاكتسيا كوبىنە, سيرەك كەزدەسەتىن جانۋارلاردى ولتىرگەننەن كەيىن نەمەسە وسىمدىكتەر جويىلعاننان كەيىن پايدا بولادى.
«مىسالى, بيىل تامىزدا استانانىڭ ءۇش تۇرعىنى 43 كيلو اقبوكەن ءمۇيىزىن ساتقانى ءۇشىن 8 جىلعا باس بوستاندىعىنان ايىرىلدى. ولاردىڭ قىلمىسىنان مەملەكەتكە 312 ملن تەڭگە زالال كەلگەن. 2017 جىلدان 2022 جىلدىڭ قىركۇيەگىنە دەيىن ەلىمىزدە جىل سايىن 1,1 مىڭعا جۋىق ەكولوگيالىق قۇقىق بۇزۋشىلىق تىركەلگەن. جىل سايىن قىلمىس سانى ازايىپ جاتقانىنا قاراماستان, قارجىلىق زيان مولشەرى ءوسىپ جاتىر. بىلتىر ەكولوگيالىق قىلمىس سالدارىنان 5,3 ملرد تەڭگە قارجىلىق شىعىن كەلگەن. بۇل 2017 جىلدان بەرى تىركەلىپ وتىرعان رەكوردتى سوما», دەپ جازدى Ranking.
ەكولوگيالىق قىلمىستىڭ زالالى استە جەڭىل ەمەس. تابيعاتقا كەلتىرىلگەن زيان سالدارىنان تۇتاس ەكوجۇيە بۇزىلادى, ەكولوگيالىق اپات پايدا بولا باستايدى, تابيعات جۇيەسى قۇردىمعا كەتىپ, ءتۇرلى اۋرۋلاردىڭ تۋ تاۋەكەلى ارتادى. جالپى, 2017 جىلدان بەرى ەكوقىلمىس سالدارىنان جىل سايىن 3,5 ملرد تەڭگە كولەمىندە شىعىن تىركەلدى. الايدا كىنالىلەر شىعىن سوماسىن وتەۋگە اسىعاتىن ەمەس. كەيىنگى بەس جىلدا جىل سايىن تەك 676,5 ملن تەڭگە وتەلگەن. بۇل بۇكىل شىعىن سوماسىنىڭ 19 پايىزى عانا.