وسىدان التى جىل بۇرىن تاجىريبە الماسۋ باعدارلاماسى بويىنشا ءبىر توپ ماگيسترانت ەۋروپاداعى بەس ەلگە ساپارعا شىقتىق. پراگادان پاريجگە باراتىن اۆتوبۋسقا بيلەت الىپ, ۆوكزالدا ەكى ساعات شاماسىندا ايالدادىق. انە سول ساتتە مەن الەمدىك دەڭگەيدەگى ۇلكەن ءانشى, اكتريسا ۋيتني حيۋستونمەن «تانىستىم». ونىڭ اندەرى بىرىنەن سوڭ ءبىرى بەرلين ۆوكزالىنىڭ ۇلكەن ەكرانىندا قويىلىپ تۇردى. ءتىپتى سونىڭ كونتسەرتى بولىپ جاتقانداي جۇرت زەيىن قويا تىڭداپ وتىر. ازداعان مادەني-شوكتارعا قاراماستان, ءبىز دە حيۋستون الەمىنە ەنۋگە تىرىسىپ كوردىك. سويتسەك, ول بيىك تە مارتەبەلى ءانشى ەكەن.
ەلگە قايتقان سوڭ, ونىڭ اندەرىن تاۋىپ, ومىربايانىمەن جاقىن تانىستىم. اعىلشىن تىلىندەگى ءاربىر مۋزىكالىق شىعارماسى ونەرسۇيەر جۇرتتىڭ قۇلاعىنىڭ قۇرىشىن قاندىرىپ, الدەقاشان الەم ساحناسىن مويىنداتىپ ۇلگەرگەن تۇلعانى كەش تە بولسا بىلگەنىمە قۋاندىم. ونەرىن باعالاماسا, تامسانباسا, وركەنيەتتى قوعامنىڭ تىڭدارمانى وعان جايدان-جاي «داۋىس» دەگەن لاقاپ ات قويمايدى عوي. ونىڭ ءان تاسپالارى كۇنى بۇگىنگە دەيىن جەر جۇزىندەگى ەڭ كوپ ساتىلىمعا يە بولدى. ناقتىراق ايتساق, بۇكىل الەم بويىنشا 200 ميلليوننان استام ءۇنتاسپاسى ساتىلىپ, رەكورد جاسادى. سوندىقتان ونىڭ وزگەشە تالانتى مەن ءان ساحناسىنداعى تالعامى وسى سالاداعى كوپتەگەن انشىگە اسەر ەتتى. ونىڭ تاعى ءبىر دارالىعى, ۆوكالدىق مۋزىكانى يمپروۆيزاتسيالاۋداعى كۇشتى قۋاتى ەدى. ءالى كۇنگە ونىڭ بۇل ەرەكشەلىگىن ەشبىر مۋزىكا مايتالمانى قايتالاي العان جوق. حيۋستون فيلمگە تۇسكەننەن كەيىن ونىڭ تانىمالدىعى ءۇش ەسە ارتتى. ادال ەڭبەگىمەن ونەر سالاسىندا ەكى رەت ەممي سىيلىعىن, التى مارتە گرەممي سىيلىعىن, ون التى رەت Billboard مۋزىكالىق ماراپاتىن جەڭىپ الدى.
ونىڭ ۇلكەن ونەرگە دەگەن تالپىنىسى سوناۋ بالا كەزىندە شىركەۋدە ءان ايتىپ جۇرگەندە باستالعان. 1981 جىلى ول ءجاسوسپىرىم مودەل بولىپ كوزگە تۇسكەن سوڭ, كوپ وتپەي ونىڭ سۋرەتى Seventeen جۋرنالىنىڭ مۇقاباسىنا باسىلدى, بۇل تاريحتاعى العاشقى قارا ءناسىلدى ايەلدىڭ اتالعان جۋرنالدىڭ باس بەتىنە شىعۋى ەدى. ءانشىنىڭ تاعدىرىن وزگەرتكەن وقيعالار ءبىر بۇل ەمەس, ونىڭ العاشقى ەكى ءان البومى Billboard 200 تىزىمىندە ءبىرىنشى ورىنعا يە بولدى ءارى سول ورنىن ساقتاپ قالدى.
حيۋستون ءوزىنىڭ اكتەرلىك دارىنىن «وققاعار» فيلمىمەن باستادى. اتالعان فيلم وسىعان دەيىن ەڭ كوپ تابىس تاپقان ءفيلمنىڭ ءبىرى رەتىندە كينو تاريحىندا التىن ارىپپەن جازىلدى. ءوزى ءرول ويناعان ءفيلمنىڭ ساۋندترەگى بولعان «مەن سەنى ارقاشان سۇيەمىن» ءانى جىل رەكوردى ءۇشىن گرەممي سىيلىعىن جەڭىپ الدى.
ء اننىڭ دە ەستىسى بار ەكەنىن بۇل قوعام باياعىدا-اق سەزىندى, ءتۇسىندى. جىلتىراققا قۇمار توپتىڭ تىڭدايتىنى سول باياعى قۋاتسىز, كۇيسىز, ءنارسىز مۋزىكا. ال حيۋستون ايتقان اندەردىڭ تىڭداۋ ءۇشىن دە ادامعا وي كوزى كەرەك, كوڭىلگە التىن ساۋلە كەرەك. ونىڭ ايتقان اندەرى قۇددى ونىڭ مارتەبەسى سياقتى ءزاۋ بيىكتەن تۇسكەن جوق. مەيلى ونىڭ جۇرەكجاردى اندەرىن كولىكتە, اسەم تابيعات اياسىندا, ءتىپتى جالعىز قالعاندا تىڭداساڭىز دا سىزگە سىيلار ءلاززاتى بىرەۋ عانا, ول – ومىرگە قۇشتارلىق.
قايبىر جىلى ديماش كوپتىڭ كوڭىلىنەن ورىن الىپ, اندەرىن شەتەلدىكتەر قۇلاي تىڭداپ جاتقاندا, مارتەبەمىز بيىكتەپ, قۋانىپ جۇردىك. ونىڭ ونەرىنە باعا بەرگەن شەتەلدىك ساراپشىنىڭ ءبىرى «ديماشتىڭ داۋىسىمەن سوعىستى توقتاتۋعا بولادى», دەدى. ءان شولپاندارىنا بۇنداي بيىك باعا ەشقاشان ايتىلعان جوق, ايتىلسا دا مايكل دجەكسونعا عانا ايتىلعان شىعار.
ديماش مەيلى حالىق اندەرىن, مەيلى اۆتورلىق اندەردى ورىنداسىن, ءبارى ونىڭ داۋىسىمەن بىرگە زەڭگىر كوككە اق قانات كوگەرشىندەي قالىقتاپ الا جونەلەدى. زاتاەۆيچ كەزىندە «ەندى ون جىلدا قازاق ءانشىسى پاتشانىڭ الدىندا ءان سالادى» دەگەندى تەككە ايتپاسا كەرەك, دارالىق پەن دانالىقتى تاۋ مەن شىڭ قۇزداردان ۇيرەنگەن كەڭ حالىقتىڭ ونەرى مەن مادەنيەتى كەلەسى عاسىرلاردا دا وركەن جايارىن اڭداعان دا شىعار. ءبىزدىڭ ديماش پاتشانىڭ دا, الپاۋىت ەلدەردىڭ پرەزيدەنتتەرىنىڭ دە الدىندا قازاق ءۇنىن سامعاتتى. وسىندايدا قازاقتىڭ «استىنان التى قىردىڭ ءۇنى ەستىلىپ» دەگەن كەرەمەت تەڭەۋىن ويعا الاسىز. ونىڭ داۋىسىنداعى نازىكتىك پەن ونەرىندەگى تازالىق ونى كەشەگى حيۋستوندار جەتكەن بيىك ساحنالارعا جەتەلەدى, ءالى دە جەتەلەي بەرمەك.