ەڭبەك جانە حالىقتى الەۋمەتتىك قورعاۋ مينيسترلىگىندە ەڭ تومەنگى جالاقىنى ايقىنداۋدىڭ جاڭا ادىستەمەسىن ازىرلەيتىن ارنايى جۇمىس توبى قۇرىلدى. بۇل ادىستەمە ەتج مولشەرىن كەزەڭ-كەزەڭىمەن ۇلعايتۋعا مۇمكىندىك بەرەدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
بۇگىنگى تاڭدا ەتج مولشەرى ءتيىستى جىلعا ارنالعان رەسپۋبليكالىق بيۋدجەت تۋرالى زاڭمەن بەلگىلەنەدى.
«2022 جىلى ەتج 60 مىڭ تەڭگەنى قۇرايدى, ال 2023 جىلعى 1 قاڭتاردان باستاپ 70 مىڭ تەڭگەگە دەيىن ۇلعايتىلادى. وسىلايشا, ەكى جىل ىشىندە ەتج مولشەرى 65% - عا كوتەرىلەدى. بۇل شارا جالاقىسى ەڭ تومەنگى دەڭگەيدە 1,6 ملن جالدامالى قىزمەتكەردىڭ اقشالاي تابىسىنىڭ وسۋىنە اكەلەدى. ەتج انىقتاۋ ادىستەمەسىن ازىرلەۋ ونىڭ مولشەرىن كەزەڭ-كەزەڭىمەن ۇلعايتۋعا مۇمكىندىك بەرەدى», دەلىنگەن مينيسترلىك حابارلاماسىندا.
جۇمىس توبىنىڭ قۇرامىنا ورتالىق مەملەكەتتىك ورگانداردىڭ, الەۋمەتتىك ارىپتەستەردىڭ وكىلدەرى, سونداي-اق ەڭبەكاقى تولەۋ سالاسىنداعى ساراپشىلار كىرەدى. ادىستەمەنى ازىرلەۋ كەزىندە ولار الەمدىك تاجىريبەدە قولدانىلاتىن ەتج مولشەرىن انىقتاۋدىڭ الەۋمەتتىك-ەكونوميكالىق كورسەتكىشتەرى مەن تاسىلدەرىنە سۇيەنەدى.
حالىقارالىق تاجىريبەنى ەسكەرە وتىرىپ, قازاقستان ءۇشىن ءتيىمدى بولاتىن بىرنەشە نۇسقانى قاراستىرۋعا بولادى. ءبىرىنشىسى – ءومىر ءسۇرۋ قۇنىن تالداۋ, تۇتىنۋ سەبەتىنىڭ قۇنى, ەڭ تومەنگى كۇنكورىس دەڭگەيى, ينفلياتسيا دەڭگەيى, ەكونوميكانىڭ ءوسۋ دەڭگەيى, ورتاشا جانە ورتاشا جالاقى دەڭگەيى سياقتى كوپتەگەن فاكتورلاردى قولداناتىن كەشەندى ءتاسىل. بۇل ءتاسىل ەۋروپالىق وداقتىڭ كوپتەگەن ەلدەرىندە قولدانىلادى.
ەكىنشىسى – ورتاشا تابىسقا نەگىزدەلگەن ەتج انىقتاۋ. حالىقارالىق ەڭبەك ۇيىمى ەتج ورتاشا جالاقىنىڭ كەم دەگەندە 50% -ىن قۇراۋى كەرەك دەپ سانايدى. وسىعان ۇقساس ءتاسىل فرانتسيا, برازيليا, كوستا-ريكا, نيدەرلاندى جانە مالايزيا سياقتى ەلدەردە قولدانىلادى.
مۇنداي ءتاسىلدى قولدانۋ كەزىندە ءداستۇر بويىنشا ەتج دەڭگەيى جىل سايىن بەلگىلەنەدى, تومەندەتىلمەيدى جانە كۇنكورىس دەڭگەيىنەن تومەن بولا المايدى.
قازىرگى ۋاقىتتا جۇمىس توبىنىڭ مۇشەلەرى بارلىق مۇمكىن نۇسقالاردى زەرتتەپ, پىسىقتاۋدا. ەتج انىقتاۋ ادىستەمەسىن ازىرلەۋدى 2023 جىلى اياقتاۋ جوسپارلانىپ وتىر.