بۇل كۇندەرى ۇلىبريتانيانىڭ ليۆەرپۋل قالاسىندا سپورتتىق گيمناستيكادان 51-ءشى الەم چەمپيوناتى ءوتىپ جاتىر. دۇنيەجۇزىلىك دودانىڭ جەكەلەي سىنىندا باق سىناپ جاتقان قازاقستان ەرلەر قۇراماسىنىڭ ەكى وكىلى فينالدىق سايىسقا جولداما الدى.
بۇعان دەيىنگى اسا ءىرى حالىقارالىق دودادا توپ جارىپ, جۇلدەلى ورىنداردان كورىنىپ جۇرگەن قازاقستاندىق ناريمان قۇربانوۆ پەن ميلاد كاريمي تۇماندى البيونداعى الەم بىرىنشىلىگىندە دە تاماشا ونەرىمەن كوزگە ءتۇسىپ, ىرىكتەۋ سايىستارىنان ىركىلمەي ءوتتى.
دۇنيە ءجۇزىنىڭ ەڭ مىقتى دەگەن گيمناستتارىمەن شەبەرلىك بايقاسقان جەرلەستەرىمىز ءوز باعدارلامالارىندا جوعارى ۇپاي جيناپ, العاشقى ۇشتىكتىڭ قاتارىنان كورىندى. اتاپ ايتقاندا, ەركىن جاتتىعۋ باعدارلاماسى بويىنشا جارىسقا شىققان ميلاد كاريمي ىرىكتەۋ باسەكەسىندە 14.733 ۇپايمەن 3-ورىن السا, ناريمان قۇربانوۆ ات سناريادىندا ونەر كورسەتىپ, ول دا ءۇشىنشى ساتىعا تۇراقتادى (15.033 ۇپاي). جەكە باعدارلامانىڭ فينالدىق جارىستارى 5 قاراشاعا جوسپارلانعان. وكىنىشكە قاراي, فينالدا ىرىكتەۋدە جينالعان ۇپايلار ەسەپكە الىنبايدى.
مۇنىڭ الدىنداعى كوماندالىق سايىستىڭ ىرىكتەۋىندە قازاقستاننىڭ ەرلەر قۇراماسى 18-ورىننان كورىنىپ, فينالعا شىعا المادى. ەل نامىسىن ميلاد كاريمي, ناريمان قۇربانوۆ, دميتري پاتانين, ءىلياس ازيزوۆ پەن ەميل احمەدجانوۆ قورعاعان بولاتىن. سونداي-اق ايەلدەر اراسىنداعى جەكە باعدارلامانىڭ ىرىكتەۋىندە قازاقستاندىق ايدا باۋىرجانوۆا 77-ءشى (46.765 ۇپاي), كوركەم ەربوسىنقىزى 107-ساتىدان (41.799) كورىنىپ, كەلەسى كەزەڭگە وتە المادى.
ليۆەرپۋلدەگى الەم چەمپيوناتى 6 قاراشادا مارەسىنە جەتەدى.