جۋىردا بريۋسسەل قالاسىندا قازاقستاندىق دەلەگاتسيا ەۋروپالىق كوميسسيامەن, ۇشۋ قاۋىپسىزدىگى جونىندەگى ەۋروپالىق اگەنتتىكپەن (EASA) جانە ەۋروپالىق وداق مۇشە مەملەكەتتەرى وكىلدەرىمەن تەحنيكالىق كەزدەسۋ وتكىزدى. ەۋروكوميسسيا قازاقستانداعى ۇشۋ قاۋىپسىزدىگىنىڭ دەڭگەيىن وڭ باعالادى.
ءبىزدىڭ دەلەگاتسيانى يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ توراعاسى تالعات لاستاەۆ باستاپ باردى. كەزدەسۋگە «قازاقستاننىڭ اۆياتسيالىق اكىمشىلىگى» اق باس ديرەكتورى كاتالين رادۋ دا قاتىستى. ەۋروپالىق دەلەگاتسيانى ەۋروپالىق كوميسسيانىڭ ۇشۋ قاۋىپسىزدىگى ءبولىمى باسشىسىنىڭ ورىنباسارى پيتەر سورەنسەن باسقاردى.
«كەزدەسۋ بارىسىندا قازاقستاندىق تاراپ ۇشۋدى پايدالانۋ, ۇشۋعا جارامدىلىق, اۆياپەرسونالدى ليتسەنزيالاۋ جانە قازاقستانداعى ۇشۋ قاۋىپسىزدىگىنىڭ دەڭگەيىن جاقسارتۋ بويىنشا قازاقستاننىڭ اۆياتسيالىق اكىمشىلىگىنىڭ پروتسەستەرىن ستاندارتتاۋ بولىگىندە قابىلدانعان شارالار مەن ىسكە اسىرىلىپ جاتقان تۇزەتۋ ءىس-قيمىلدارىنىڭ جوسپارلارى تۋرالى حاباردار ەتتى. ونىڭ ىشىندە قازاقستاننىڭ اۆياتسيالىق اكىمشىلىگى قارجىلاندىرۋدىڭ جاڭا ءتاسىلىن ەنگىزۋ جانە ەلدەگى ازاماتتىق اۆياتسيا سالاسىن رەتتەۋدىڭ ەۋروپالىق مودەلىنە ودان ءارى جوسپارلى كوشۋ بولىگىندە قازاقستان رەسپۋبليكاسىنىڭ قولدانىستاعى زاڭناماسىنا كۇتىلەتىن وزگەرىستەر تانىستىرىلدى. ەۋروپالىق تاراپ جۇزەگە اسىرىلىپ جاتقان ءىس-شارالار بويىنشا قازاقستاننىڭ اۆياتسيالىق بيلىگى قابىلداپ جاتقان شارالاردى وڭ قابىلدادى», دەپ حابارلادى يندۋستريا جانە ينفراقۇرىلىمدىق دامۋ مينيسترلىگى.
ەۋروپالىق كوميسسيا دەلەگاتسياسىنىڭ باسشىسى 2019 جىلدان باستاپ قازاقستاندا ىسكە اسىرىلىپ جاتقان ازاماتتىق اۆياتسيانى رەتتەۋدىڭ ەۋروپالىق مودەلىن جوعارى باعالاپ قولدادى جانە بۇل ۇشۋ قاۋىپسىزدىگىنىڭ ەۋروپالىق ستاندارتتارىنا تولىق سايكەس كەلەتىن الەمدەگى ەڭ وزىق جانە ەڭ ءتيىمدى تاسىلدەردىڭ ءبىرى بولىپ سانالاتىنىن اتاپ ءوتتى. سونداي-اق قازاقستاندا تۇراقتى اۆياتسيالىق رەتتەۋشىنىڭ جۇمىس ىستەۋى جانە ەلدەگى ۇشۋ قاۋىپسىزدىگىن قامتاماسىز ەتۋ جونىندەگى مىندەتتەمەلەردى ورىنداۋ ءۇشىن قازاقستاننىڭ اۆياتسيالىق اكىمشىلىگى رەسۋرستارىن قارجىلاندىرۋ مەن قامتاماسىز ەتۋدىڭ جاڭا تەتىگىن ءتيىمدى ىسكە اسىرۋ قاجەتتىگى اتاپ ءوتىلدى.
سونداي-اق ەۋروكوميسسيا ۇشۋعا جارامدىلىق, ۇشۋدى پايدالانۋ, اۋە پەرسونالىن ليتسەنزيالاۋ, ۇشۋ قاۋىپسىزدىگى باسقارماسى, قازاقستاننىڭ اۆياتسيالىق اكىمشىلىگى پروتسەستەرىن ستاندارتتاۋ جانە ۇيىمنىڭ جاڭارتىلعان قۇرىلىمى سالالارىندا اتقارىلعان جۇمىستاردىڭ بارىسىن وڭ باعالاپ, وسى باعىتتاعى جۇمىستى جالعاستىرۋعا شاقىردى. ەۋروپالىق تاراپ اتالعان ماسەلەلەردە جان-جاقتى قولداۋ كورسەتۋگە دايىن ەكەندىگىن ءبىلدىردى.
قازاقستاننىڭ اۆياتسيالىق بيلىگى ۇسىنعان پروگرەسس نەگىزىندە ەۋروپالىق كوميسسيا وكىلدەرى قازىرگى كۇنى قازاقستاندىق اۆياكومپانيالاردا ەۋروكوميسسيانىڭ ۇشۋ قاۋىپسىزدىگى تىزىمىنە («قارا ءتىزىم») جانە ەۋروپاعا ۇشۋعا قانداي دا ءبىر شەكتەۋلەر ەنگىزۋ بويىنشا قاۋىپ جوق ەكەنىن راستادى.