ورتالىق سايلاۋ كوميسسياسىنىڭ توراعاسى نۇرلان ءابدىروۆ ونلاين فورماتتا تمد پارلامەنتارالىق اسسامبلەياسى كەڭەسىنىڭ باس حاتشىسى دميتري كوبيتسكي باستاعان بايقاۋشىلار توبىمەن كەزدەستى.
كەزدەسۋگە ورتالىق سايلاۋ كوميسسياسىنىڭ مۇشەلەرى شاۆكات وتەمىسوۆ پەن اناستاسيا ششەگورتسوۆا, استانا جانە الماتى قالالارىنىڭ اۋماقتىق سايلاۋ كوميسسيالارىنىڭ توراعالارى باقىت بەكتەمىسوۆا, جاننا اسانوۆا, سونداي-اق دەموكراتيا, پارلامەنتاريزم جانە ازاماتتاردىڭ سايلاۋ قۇقىعىن ساقتاۋ جونىندەگى حالىقارالىق بايقاۋشى ينستيتۋتىنىڭ ديرەكتورى - تمد پاا كەڭەسى حاتشىلىعى باسشىسىنىڭ ورىنباسارى يۆان مۋشكەت قاتىستى.
ن.ءابدىروۆ بايقاۋشىلاردى سايلاۋ ناۋقانىنا دايىندىق بارىسىمەن, ونىڭ نەگىزگى كەزەڭدەرى تۋرالى حاباردار ەتتى, سونداي-اق وسى ۋاقىتقا دەيىن پرەزيدەنتتىككە كانديداتتاردى تىركەۋ اياقتالعانىن جانە شتابتار سايلاۋ الدىنداعى ۇگىت-ناسيحات جۇمىستارىن جۇرگىزىپ جاتقانىن اتاپ ءوتتى.
ءوز كەزەگىندە دميتري كوبيتسكي ورتسايلاۋكومعا كەزدەسۋدى ۇيىمداستىرعانى ءۇشىن العىسىن ءبىلدىردى. تمد پاا وكىلدەرى قازاقستان رەسپۋبليكاسى پرەزيدەنتىنىڭ سايلاۋىن ازىرلەۋ مەن وتكىزۋگە, ونىڭ ىشىندە كانديداتتاردىڭ سايلاۋ الدىنداعى پىكىرسايىستارىن ۇيىمداستىرۋ مەن وتكىزۋگە, سايلاۋشىلار سانىنا, بەرىلگەن ەسەپتەن شىعارۋ كۋالىكتەرىنىڭ سانىنا, سايلاۋ كوميسسيالارىنىڭ داۋىس بەرۋ كۇنىنە دايىندىعىنا قاتىستى ءتۇرلى سۇراقتار قويدى.
كەزدەسۋ بارىسىندا نۇرلان ءابدىروۆ تمد پاا بايقاۋشىلارىن ورتسايلاۋكومنىڭ وتىرىستارى مەن وقىتۋ ءىس-شارالارىنا قاتىسۋعا شاقىردى, سونداي-اق وزدەرىن قىزىقتىرعان ماسەلەلەر بويىنشا وسك مۇشەلەرىمەن جانە اپپاراتىمەن كەزدەسۋلەرىن وتكىزۋگە دايىن ەكەنىن جەتكىزدى.
تمد پاا وكىلدەرى قر وسك جانىنان قۇرىلعان ساراپشى كەڭەستىڭ جۇمىسىنا ونلاين فورماتتا قاتىسۋعا مۇددەلىلىگى مەن دايىندىعىن ءبىلدىردى, سونداي-اق جاستاردىڭ سايلاۋ بەلسەندىلىگىن ارتتىرۋ بويىنشا بىرلەسكەن جوبالاردى پىسىقتاۋدى ۇسىندى. كەزدەسۋ سوڭىندا ەكى تاراپ سايلاۋدى ۇيىمداستىرۋ مەن وتكىزۋ جانە ولاردى بايقاۋ بويىنشا جۇمىستارعا ءوزارا تابىس تىلەدى.
سايلاۋ كوميسسيالارىنا ادىستەمەلىك كومەك كورسەتۋ, ەلەكتورالدىق وقىتۋ ۇدەرىسىن ۇيلەستىرۋ جانە داۋىس بەرۋ كۇنىنە ولاردىڭ دايىندىعىن انىقتاۋ ءۇشىن سايلاۋ ۋچاسكەلەرىنە بارۋ ماقساتىندا ورتسايلاۋكوم مۇشەلەرى ەل وڭىرلەرىنە ساپارلارىن جالعاستىرۋدا. وسىلايشا, 1-3 قاراشادا وسك توراعاسىنىڭ ورىنباسارى كونستانتين پەتروۆ پەن وسك مۇشەسى ءسابيلا مۇستافينا ۇلىتاۋ وبلىسىنا, وسك حاتشىسى مۇحتار ەرمان جامبىل وبلىسىنا باردى.
وڭىرلەردە ورتسايلاۋكوم مۇشەلەرى اۋماقتىق جانە ۋچاسكەلىك سايلاۋ كوميسسيالارىنىڭ, مەملەكەتتىك ورگانداردىڭ, كانديداتتاردىڭ سايلاۋالدى شتابتارىنىڭ, ساياسي پارتيالار مەن باق وكىلدەرىمەن سەمينار-كەڭەستەر وتكىزدى. وسك مۇشەلەرى قاتىسۋشىلاردى پرەزيدەنت سايلاۋىن دايىنداۋ مەن وتكىزۋدىڭ ەرەكشەلىكتەرى تۋرالى حاباردار ەتتى. سايلاۋ ناۋقانىنىڭ نەگىزگى كەزەڭدەرىنىڭ ەرەكشەلىكتەرى, پرەزيدەنتتىككە كانديداتتاردى ۇسىنۋ جانە تىركەۋ قورىتىندىلارى, مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ, ەلەكتورالدىق وقىتۋ جانە باسقا دا ماسەلەلەر ەگجەي-تەگجەيلى قارالدى.
ءوز كەزەگىندە ۋاكىلەتتى مەملەكەتتىك ورگاندار وسك مۇشەلەرىنە وڭىرلەردە سايلاۋشىلار تىزىمدەرى بويىنشا جۇرگىزىلىپ جاتقان جۇمىستار, سايلاۋدى ۇيىمداستىرۋشىلىق, ماتەريالدىق-تەحنيكالىق قامتاماسىز ەتۋ, مۇگەدەكتىگى بار ازاماتتار ءۇشىن سايلاۋ ۋچاسكەلەرىنىڭ قولجەتىمدىلىگىن قامتاماسىز ەتۋ, سايلاۋ ۇدەرىسىنە قاتىسۋشىلاردىڭ سايلاۋ زاڭناماسىن زاڭدىلىقتىڭ ساقتالۋىن قاداعالاۋدى جۇزەگە اسىرۋ, داۋىس بەرۋ كۇنى سايلاۋ ۋچاسكەلەرىندە قۇقىقتىق ءتارتىپتى قامتاماسىز ەتۋ, سايلاۋ بيۋللەتەندەرىن كۇزەتۋ جانە جەتكىزۋ تۋرالى باياندادى.