كانادانىڭ مونرەال قالاسىندا ۇيىمداستىرىلعان شورت-ترەكتەن بيىلعى الەم كۋبوگىنىڭ العاشقى كەزەڭى مارەسىنە جەتتى. كوماندالىق ەستافەتادا فينالعا شىققان قازاقستان ەرلەر قۇراماسى كۇمىس جۇلدەگە قول جەتكىزدى.
بەس مىڭ مەتر قاشىقتىققا جارىسۋدا قازاقستان قۇراماسىنىڭ شورت-ترەكشىلەرى بيىل بەيجىڭدە وتكەن قىسقى وليمپيا ويىندارىنىڭ جەڭىمپازى مەن جۇلدەگەرلەرى – كانادا (وليمپيادا چەمپيونى), كورەيا (كۇمىس) جانە يتاليا (قولا جۇلدەگەر) سپورتشىلارىمەن سايىسقا ءتۇستى. ۇزدىكتەرمەن ءبىر دەڭگەيدە ونەر كورسەتكەن جەرلەستەرىمىز مارە سىزىعىن ەكىنشى بولىپ قيىپ, الەم كۋبوگىنىڭ كۇمىس جۇلدەگەرى اتاندى (7:07.972). باس جۇلدەنى كورەيا قۇراماسى جەڭىپ الدى. ولاردىڭ ۋاقىت كورسەتكىشى – 7:01.850. قولا جۇدە كانادا سپورتشىلارىنا بۇيىردى. ال قازاقستان مەن كانادا سپورتشىلارىنا قارسى ويىن ەرەجەسىن بۇزعانى ءۇشىن يتاليا قۇراماسى جارىستان شەتتەتىلدى.
ايتا كەتەيىك, شورت-ترەكتەن العاشقى الەم كۋبوگىندە قازاقستان قۇراماسى ساپىنان ابزال اجعاليەۆ, نۇرتىلەك قاجىعالي, ءادىل عالياحمەتوۆ پەن دەنيس نيكيشا ونەر كورسەتتى. الەم كۋبوگىنىڭ ەكىنشى كەزەڭى 4-6 قاراشا كۇندەرى اقش-تىڭ سولت-لەيك-سيتي قالاسىندا وتەدى.