كيىكتەردىڭ تۇبىنە جەتكەن – پاستەرەللەز

وتكەن اپتادا شالعايداعى جانىبەك اۋدانى جاقسىباي اۋىلىنىڭ شىعىسىندا ورنا­لاس­قان ايدارلى ەلدى مەكەنى تۇسىندا دالا ەركەسى – كيىك­تەردىڭ قىرىلعانى اقجايىق ءوڭىرى جۇرتشىلىعىن قاتتى الاڭداتتى. سوڭعى دەرەكتەرگە قاراعاندا اجال قۇشقان اق­بو­كەندەردىڭ سانى 3271 باسقا جەتكەن. ونىڭ دەنى – انالىق ەشكىلەر. سونىمەن بىرگە اتالعان اۋىل تۇرعىندارىنا قاراستى ءبىر جاسقا جاقىنداعان التى بۇزاۋ دا جەر جاستانعان. وقيعا ورىن العان جەرگە باتىس قازاقستان وبلىسىنىڭ اكىمى باقتىقوجا ىزمۇحامبەتوۆ پەن توسىن جاعدايعا وراي اس­تانادان ارنايى كەلگەن  اۋىل شارۋاشىلىعى مينيسترلىگى ورمان جانە اڭشىلىق شارۋا­شى­لىعى كوميتەتىنىڭ توراعاسى ەرلان نىسانباەۆ باستاعان جۇمىس توبى تىكۇشاقپەن شۇ­عىل اتتانعان بولاتىن. وسىنداي  وقيعا ورىن العانى بەلگىلى بولعاننان كەيىن ارنايى كوميسسيا قۇرىلعان ەدى. وسى جەدەل جۇمىس توبى قا­زىر ءوزىنىڭ العاشقى قورى­تىن­دىلارىن شىعاردى. ولار جو­عارىدا ساندارى كورسەتىلگەن كيىكتەر مەن بۇزاۋلاردىڭ ءولى­مى­نە دۋشار ەتكەن – پاستەرەل­لەز اۋرۋى دەپ تاۋىپ وتىر. مۇنداي دياگنوز ازىرگە ءبىر باس بۇزاۋدان انىقتالعان. دەگەن­مەن ماماندار قالعان بۇزاۋ­لار­دىڭ دا تۇبىنە جەتكەن وسى اۋرۋ ەكەنىنە كۇمان كەلتىر­مەيدى. – بۇل حايۋاناتتار اراسىن­دا كەزدەسەتىن جۇقپالى اۋرۋ­لاردىڭ ءبىرى. كيىكتەر اراسىندا ونىڭ وتكىر ءتۇرى تاراعان دەپ ايتا الامىز. بۇل قورىتىندى ولگەن كيىكتەردىڭ ىشكى قۇرى­لىسىنان الىنعان سىنامالار مەن ساراپتامالاردان كەيىن بەلگىلى بولدى. ال توپىراق پەن ءشوپ­تىڭ, سۋدىڭ قۇرامىن تەك­سەرۋ جۇمىستارى ودان ءارى جالعاسۋدا. وسىلاردىڭ تولىق قورىتىندىلارى شىققان كەزدە بۇل اۋرۋدىڭ كيىكتەرگە قايدان جۇعىپ, قالاي تاراعانىن ايتىپ بەرۋگە بولادى, – دەدى گازەت تىلشىسىنە وبلىستىق اۋماقتىق ينسپەكتسيانىڭ اۋماقتا مەم­لە­كەتتىك ۆەتەرينارلىق-ساني­تار­لىق باقىلاۋ ۇيىمداستىرۋ ءبو­لىمىنىڭ باس مامانى فارۋح مۇ­قانوۆ. پاستەرەللەز جۇقپالى, مال, حايۋاناتتار اۋرۋلارى تىزىمىندە بار. بىراق ۇكىمەتتىڭ قاۋلىسى بويىنشا بەكىگەن وتەماقى تولەنەتىن تىزىمدە جوق. سوندىقتان التى بۇزاۋدىڭ يەسىنە وتەماقى تولەنبەيدى, – دەدى ول ودان ءارى. قازىر كيىكتەر ولگەن اۋماق­تا پروفيلاكتيكالىق ءىس-شارا­لار جۇرگىزىلۋدە. وعان ارنايى شەكتەۋ جاريالانعان. ونىڭ مەرزىمى ەڭ از دەگەندە ءبىر اي. وسى ۋاقىت ارالىعىندا بۇل ايماققا سىرتتان مال كىرگىزۋگە نەمەسە شىعارۋعا تىيىم سالى­نادى. سونداي-اق مال ازىعىن ازىرلەپ تاسىمالداۋعا دا رۇقسات جوق. جوعارىدا ايتىلعانداي, ءبۇ­گىندە شالعايداعى ايدارلى اۋى­لىندا كيىكتەردىڭ قىرى­لۋىنا بايلانىستى قۇرىلعان كوميسسيا ءوز جۇمىسىن  جال­عاستىرۋدا. تەمىر قۇسايىن, باتىس قازاقستان وبلىسى, جانىبەك اۋدانى.