قازاقستان رەسپۋبليكاسى پرەزيدەنتتىگىنە جالپىۇلتتىق سوتسيال-دەموكراتيالىق پارتياسى اتىنان ۇمىتكەر نۇرلان اۋەسباەۆ اقتوبە وبلىسىنا باردى.
ايماقتاعى سايلاۋالدى ناۋقان اياسىنداعى ساپارىنىڭ العاشقى نۇكتەسى بەستاماق اۋىلىنا سوعىپ, جەرگىلىكتى تۇرعىندارمەن كەزدەسۋ وتكىزدى. اۋىل تۇرعىندارى ۇمىتكەرگە تىكەلەي كەنت ارقىلى وتەتىن اقتوبە-استراحان تاس جولىنا بايلانىستى شاعىمداندى. بۇگىندە جوباعا سايكەس كەڭەيتىلىپ جاتقان بۇل جول ەلدى مەكەندى ەكىگە ءبولىپ تۇر. سونىمەن قاتار جولداعى كولىك اعىنى قوزعالىسى وتە قارقىندى, تاس جول بويىمەن جەڭىل اۆتوكولىكتەر دە, جۇك كولىكتەرى دە قاتار جۇرەدى. بۇل جەرگىلىكتى تۇرعىندار ءۇشىن بەلگىلى ءبىر قيىندىقتار تۋدىرۋدا. بىرىنشىدەن, جول بويىندا ورنالاسقان ءۇي تۇرعىندارىن كۇندىز-ءتۇنى تىنبايتىن كولىك دىبىسى مازالايدى. ەكىنشىدەن, تۇرعىندار ۇنەمى جولدى كەسىپ وتۋگە ءماجبۇر, ال بۇل وتە قاۋىپتى.
اۋىل تۇرعىندارىنىڭ مۇڭ-زارىمەن تانىسقان نۇرلان اۋەسباەۆ ادامداردىڭ قاۋىپسىزدىگى مەملەكەتتىڭ باستى مىندەتى ەكەنىن اتاپ ءوتتى. اينالما جول سالۋ قاجەتتىلىگى انىق. نە سەبەپتى اكىمدىك پەن جول قۇرىلىسى باسقارماسى ەلدى مەكەن تۇرعىندارىنىڭ قاجەتتىلىكتەرىن ەلەمەي جۇرگەنى سۇراق تۋدىرادى. ۇمىتكەر بۇل ماسەلەنى تەز ارادا شەشۋ كەرەك ەكەنىنە باسا نازار اۋداردى. مۇنداي جاعدايلاردىڭ قايتالانباۋى ءۇشىن ول قازاقستاندا مەملەكەتتىك باسقارۋ جۇيەسىن رەفورمالاۋ قاجەت ەكەنىن اتاپ ءوتتى.