استانادا رەسپۋبليكا كۇنىنە وراي «ارعىماق» اتتى جاڭا ات-ساۋىقتىرۋ كەشەنى اشىلدى. جاڭا كەشەن الاڭىندا كونكۋر بويىنشا تۋرنير ءوتتى, دەپ حابارلايدى Egemen.kz ەلوردا اكىمدىگىنىڭ سايتىنا سىلتەمە جاساپ.
«ارعىماق» ات-ساۋىقتىرۋ كەشەنىنىڭ اشىلۋ قۇرمەتىنە ونىڭ الاڭىندا ۇلتتىق ات سپورتى ءتۇرى - 14 جانە 20 كم قاشىقتىقتاعى بايگە, جۇلدە قورى 17 ملن تەڭگەنى قۇرايتىن جارىستار جانە وليمپيادالىق تۇرلەر – «اشىق سىنىپ», «جاس جىلقىلار گانديكاپ» جانە «بالالار» نوميناتسياسى بويىنشا كونكۋرس ءوتتى. اتالعان جارىستاردىڭ جالپى جۇلدە قورى شامامەن 7 ملن تەڭگەنى قۇرادى.
«جارىستىڭ باستى ماقساتى - ۇلتتىق جانە وليمپيادالىق سپورت تۇرلەرىن ناسيحاتتاۋ, پەرسپەكتيۆالى شاباندوزدار مەن جىلقىلاردى انىقتاۋ», دەلىنگەن حابارلامادا.
ءىس-شارانى استانا قالاسىنىڭ ۇلتتىق جانە وليمپيادالىق ات سپورتى تۇرلەرىنىڭ فەدەراتسياسى مەن ەلوردالىق دەنە شىنىقتىرۋ جانە سپورت باسقارماسى ۇيىمداستىردى.
وليمپيادالىق ات سپورتى تۇرلەرى بويىنشا مەملەكەتتىك جاتتىقتىرۋشى امانجول حاسەنوۆتىڭ ايتۋىنشا, كونكۋرعا قاراعاندى, الماتى, اقمولا وبلىستارى مەن استانادان ءتورت كوماندا قاتىستى.
«بالالار» ساناتىنداعى سايىستا ءۇشىنشى جانە ەكىنشى ورىندى لاۋرا الدابەرگەنوۆا كۇرەڭ ەسىمدى اتپەن جانە دارينا دۋرجۋباەۆا عايساق ەسىمدى اتپەن يەلەندى. ءبىرىنشى ورىن امىرە قابجانوۆاعا شاح اتتى جىلقىمەن بۇيىردى.«اشىق سىنىپ» ساناتىندا جۇلدەلى ورىندار كەلەسىدەي ءبولىندى:
1-ءشى ورىندى «دجافار» اتتى اتپەن ەرجان ماعجاەۆ يەلەندى;
2-ءشى ورىن - ولەگ سوكولەنكو «كۇرەڭ» اتتى جىلقىمەن;
3-ءشى ورىن - «كاپريا» اتتى جىلقىسى بار نيكا سيم.جەڭىمپازدار 1 ملن تەڭگەدەن الدى.
ءىس-شارا اياسىندا ۇلتتىق ويىندار, سونداي-اق كونتسەرتتىك باعدارلاما وتكىزىلدى.
ايتا كەتسەك, جاڭا ات-ساۋىقتىرۋ كەشەنىندە ەلوردا تۇرعىندارى ات سپورتى تۇرلەرىمەن اينالىسا الادى, ال ەرەكشە قاجەتتىلىكتەرى بار بالالار يپپوتەراپيادان وتە الادى. ورتالىق بازاسىندا حالىقارالىق جارىستار دا وتەدى. جالپى, كەشەن ەلوردادا بالالار مەن جاسوسپىرىمدەر سپورتىنىڭ دامۋىنا ىقپال ەتەتىن بولادى.