قىزىلوردادا وبلىستىق «جاستار رەسۋرستىق ورتالىعى» كمم ۇيىمداستىرۋىمەن «Syr Jastary» اتتى ۆەلوجارىس ءوتتى. رەسپۋبليكا كۇنىنە وراي جاستار مەن جاسوسپىرىمدەر اراسىندا بۇقارالىق سپورتتى ناسيحاتتاپ, سالاماتتى ءومىر سالتىن قالىپتاستىرۋ مەن ۆەلوسپورتتى دامىتۋدى كوزدەگەن سايىسقا 50-گە جۋىق جاس قاتىستى.
وبلىستىق «جاستار رەسۋرستىق ورتالىعى» كمم ديرەكتورى تالعات وسپان ۇلى بارشا قاتىسۋشىلاردى ۇلتتىق مەرەكەمەن قۇتتىقتاپ, سايىسقا ساتتىلىك تىلەدى.
«بولاشاق» ۋنيۆەرسيتەتى جانىنان باستالىپ «ەدەلۆەيس» اينالما جولىنان مارەگە قايتا ورالعان 20 شاقىرىمدىق توپتىق سايىسقا №3 وبلىستىق ۆەلومەكتەبى بەكىتكەن تورەشىلەر القاسى قازىلىق ەتتى. سايىس قورىتىندىسىنا سايكەس, جەڭىس تۇعىرىنىڭ ءبىرىنشى ورنىنا اسىلحان تۇرار كوتەرىلسە, II ورىن جۇلدەسىن سايات ايدارحان يەلەندى. ۇزدىك ۇشتىك قاتارىن دياس تۇرات تۇيىندەدى.
قىزدار اراسىندا ءاليا وتەگەن I ورىندى يەلەنسە, عاليا قۋاتباەۆا ەكىنشى, ءىنجۋ اسىلبەك ءۇشىنشى ورىن يەسى اتاندى.
جارىس جەڭىمپازدارى مەن جۇلدەگەرلەرىنە وبلىستىق قوعامدىق دامۋ باسقارماسى جاستار رەسۋرستىق ورتالىعىنىڭ ديپلومدارى, ارنايى مەدالدارى جانە قارجىلاي سىيلىقتارى تابىستالدى.
جالپى, وبلىستاعى مەرەكەلىك ءىس-شارالارعا جاستار ۇلكەن ۇلەس قوستى. ايماقتا ءبىر مەزەتتە 40 مىڭعا جۋىق ادام مەملەكەتتىك ءانۇران ورىنداپ, «پاتريوتيزم داۋىسى» دەپ اتالعان وسى ءىس-شاراعا وڭىردەگى مەكتەپتەر مەن وقۋ ورىندارىنىڭ شاكىرتتەرى قاتىستى. ودان بولەك, قالا ورتالىعىنداعى «اراي سيتي مولل» ساۋدا ۇيىندە جاستاردىڭ قاتىسۋىمەن كونتسەرتتىك باعدارلاما ۇيىمداستىرىلادى.
قىزىلوردا