«ەگەمەندىك – ەل تىرەگى» اتتى دوڭگەلەك ۇستەل ءوتتى

1990 جىلى قازان ايىنىڭ 25-ءى كۇنى قازاق كسر جوعارعى كەڭەسىنىڭ شەشىمىمەن «قاز كسر-ءنىڭ مەملەكەتتىك ەگەمەندىگى تۋرالى» قابىلدانعان دەكلاراتسيا ەلىمىزدىڭ ناعىز تاۋەلسىزدىگىنە اپاراتىن قۇقىقتىق باستاماسى, ەل تاۋەلسىزدىگىنىڭ ىرگەتاسى بولدى. 2022 جىلعى 16 ماۋسىمىندا مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ I وتىرىسىندا رەسپۋبليكا كۇنىنە ۇلتتىق مەرەكە مارتەبەسىن قايتارۋدى ۇسىندى جانە ول ەلىمىزدىڭ باستى مەرەكەسى رەتىندە اتاپ ءوتىلۋى قاجەت دەپ ايتتى.

قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ ۇيىمداستىرۋىمەن «ەگەمەندىك – ەل تىرەگى» اتتى دوڭگەلەك ۇستەلدە رەسپۋبليكا كۇنى مەرەكەسىنىڭ ماڭىزى ايتىلدى. ءماجىلىس بارىسىندا تاريحي كۇنگە قاتىستى كەلەسى ماڭىزدى ماسەلەلەر تالقىلاندى: ەگەمەندىكتىڭ تاريحى, ەلىمىزدىڭ الەۋمەتتىك-ساياسي جاعدايى, ەگەمەندىكتىڭ العاشقى جارشىسى بولا بىلگەن رەسپۋبليكا كۇنىن ۇلىقتاۋ ماقساتى, تاريحي قۇجات بولىپ ەسەپتەلەتىن ەلىمىزدىڭ دەكلاراتسياسىنا انىقتاما تولىقتاي سيپاتتالدى.

جيىندا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ توراعاسى دارحان مەدەعالي ۇلى جازىقباەۆ, 1992-1993 جىلدارى قازاقستان رەسپۋبليكاسى ۇلتتىق بانكى باسقارماسىنىڭ توراعاسى بولىپ قىزمەت اتقارىپ, تەڭگەنى ەنگىزۋگە تىكەلەي قاتىسقان عالىم باينازار ۇلى باينازاروۆ, قازاقستاننىڭ سوت جۇيەسىن جانە قۇقىقتىق قورعاۋ سالاسىن جەتىلدىرۋگە ات سالىسقان سەرىك بايسەيىت ۇلى اقىلباي, ۇلتتىق قاۋىپسىزدىك ورگاندارىندا كوپ جىل جۇمىس ىستەگەن گەنەرال-مايور ەرجان بەكباۋ ۇلى يساقۇلوۆ, مەملەكەتتىك قىزمەت سالاسىن قالىپتاستىرۋ جانە جەتىلدىرۋ ىسىندە قىزمەت ىستەپ جۇرگەن استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان مۇحامەديا ۇلى بايمەنوۆ مازمۇندى بايانداما جاسادى.

ءماجىلىس سوڭىندا رەسپۋبليكا كۇنى يدەولوگياسىنىڭ نەگىزىندە بىرىگۋ ءپرينتسيپى بار, بۇل كۇندى مەرەكەلەۋ بىرلىك پەن تاتۋ كورشىلىك قۇندىلىقتارىن نىعايتۋعا بارىنشا ىقپال ەتۋى ءتيىس سەكىلدى ماڭىزدى ويلار ايتىلدى. ەلىمىزدىڭ وركەندەۋى ءۇشىن مەملەكەتتىك قىزمەتشىلەردىڭ جوعارى كاسىبيلىلىگىمەن قاتار وتاندى ءسۇيۋ, حالىققا ادال قىزمەت ەتۋ, مەملەكەتشىل بولۋ كەرەك.