قازاقستان رەسپۋبليكاسى پارلامەنتى ءماجىلىسى توراعاسىنىڭ ورىنباسارى داريعا نازارباەۆا VII استانا ەكونوميكالىق فورۋمىنا كەلگەن اۋعانستان يسلام رەسپۋبليكاسىنىڭ ايەلدەر ءىسى بويىنشا ءمينيسترى حۋسن بانۋ گازانفارمەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
ءماجىلىستىڭ ۆيتسە-سپيكەرى اۋعانستاندا پرەزيدەنت سايلاۋىنىڭ ءبىرىنشى كەزەڭى تابىستى وتكەنىمەن قۇتتىقتاپ, وسى سايلاۋ ەل ءومىرىنىڭ الداعى تۇراقتىلىعىنىڭ جاڭا كەزەڭى بولاتىنىنا سەنىم ءبىلدىردى.
داريعا نازارباەۆا, سونىمەن قاتار, قازاقستان اۋعانستاندا بەيبىتشىلىك پەن تۇراقتىلىق ورناعانىن قولدايتىنىن جانە ەكى ەل اراسىنداعى دوستىق بايلانىستاردىڭ جالعاسىن تابۋى ءۇشىن ارەكەت ەتەتىنىن اتاپ ءوتتى.
سونداي-اق, ءماجىلىستىڭ ۆيتسە-سپيكەرىنىڭ ايتۋىنشا, اۋعان قوعامى ءۇشىن اۋعانستان جاستارىنىڭ ءبىلىم الۋ باعدارلاماسى ەرەكشە ورىن الاتىن كورىنەدى.
– بۇل اعارتۋ جوباسىنا قازاقستان پرەزيدەنتىنىڭ تاپسىرماسىمەن 50 ميلليون دوللار ءبولىنىپ, جۇزەگە اسىرىلىپ وتىر. بۇل اۋعان جاستارىنىڭ مەديتسينالىق, تەحنيكالىق جانە ارنايى ءبىلىم الىپ شىعۋىنا مۇمكىندىك تۋعىزادى, – دەدى داريعا نازارباەۆا.
ءوز كەزەگىندە حۋسن بانۋ گازانفار ءبىزدىڭ مەملەكەتتىڭ باسشىسىنا اۋعانستاننىڭ بەيبىت دامۋىنا اسەر ەتىپ, قولداپ وتىرعاندىعى ءۇشىن العىسىن ايتىپ, ءبىلىم بەرۋ باعدارلاماسىنىڭ ەلى ءۇشىن ماڭىزىنا توقتالدى.
تاراپتار اڭگىمە بارىسىندا ورتالىق ازيا ەلدەرى ايەلدەرىنىڭ ايماق مەملەكەتتەرىنىڭ ءوزارا بايلانىسىندا, سونىڭ ىشىندە ەكونوميكالىق بايلانىستى نىعايتۋداعى ورنىنا ەرەكشە نازار اۋداردى.
ءماجىلىس توراعاسىنىڭ ورىنباسارى قازاقستاندىق ايەلدەردىڭ ەلىمىز دامۋىنىڭ وركەندەۋىنە, اسىرەسە, قازاقستان تاۋەلسىزدىگىنىڭ العاشقى جىلدارىندا قوسقان ۇلەسىنە توقتالدى.
اۋعانستاننىڭ ايەلدەر ءىسى بويىنشا ءمينيسترى ءبىزدىڭ ەلىمىزدىڭ تاجىريبەسى, ءاسىرەسە, الەۋمەتتىك سالاداعى جانە ايەلدەردىڭ كاسىپكەرلىككە ارالاسۋىنىڭ اۋعانستان ءۇشىن ماڭىزىن اتاپ ءوتتى.
داريعا نازارباەۆا پارلامەنتارالىق بايلانىستار جايىندا ءسوز قوزعاعاندا, اۋعانستاندا پارلامەنتاريزمدى دامىتۋ قاجەتتىگىنە نازار اۋدارتتى. سونىمەن بىرگە, ءماجىلىستىڭ ۆيتسە-سپيكەرى اۋعاندىق دەپۋتات-ايەلدەردىڭ جەتىستىگىن, اۋعانستان پارلامەنتىندە سانى ۇنەمى ءوسىپ, بۇگىندە 28%-عا جەتكەنىن اتاپ ءوتتى.
د. نازارباەۆا مەن ح. گازانفار قازاقستان مەن اۋعانستان پارلامەنتشىلەرىنىڭ, ونىڭ ىشىندە ايەل-دەپۋتاتتار اراسىنداعى بايلانىستار ەكىجاقتى ىنتىماقتاستىقتى ۇلعايتۋعا وراسان ۇلەس قوساتىندىعى ءجونىندە ورتاق پىكىر ءبىلدىردى.