باقىتىما وراي وسىدان ەكى جىل بۇرىن ۆەنا ۇلتتىق وپەرا جانە لا سكالا تەاترلارىندا م.مۋسورگسكيدىڭ «بوريس گودۋنوۆ», دج. ءپۋچچينيدىڭ «بوگەما» وپەرالارىن تاماشالاۋىما ءمۇمكىندىك تۋدى. دۇنيەجۇزىلىك وپەرا مادەنيەتىنىڭ ءىرى ورتالىقتارى بولىپ سانالاتىن تەاترلاردىڭ قويىلىمدارىن كورىپ, ءبىزدىڭ قازاقستاندا دا وسىنداي ادەمى ونەر ورداسى بولسا دەپ تامسانىپ ەدىم. ەندى مىنە, سول ارمانىما جەتىپ وتىرمىن. ەلوردامىزدىڭ ورتالىعىنان بوي كوتەرگەن «استانا وپەرا» مەملەكەتتىك وپەرا جانە بالەت تەاترى قازىرگى كەزدە جاڭا پرەمەرالاردى كورەرمەندەرگە ۇسىنۋدا. سونىڭ ىشىندە م.تولەباەۆتىڭ «ءبىرجان-سارا», دج.ۆەرديدىڭ «اتتيلا» وپەرالارى, پ.چايكوۆسكيدىڭ «ۇيقىداعى ارۋ», س.پروكوفەۆتىڭ «رومەو مەن دجۋلەتتا» جانە حورەوگراف ب.ەيفماننىڭ «رودەن» بالەتتەرى الەمدىك ساحنالاردا ۇلكەن تابىسپەن ءوتتى.
وسى جاقىندا عانا تەاتر ساحناسىندا قويىلعان دج.ءپۋچچينيدىڭ «توسكا» وپەراسىنا ءتانتى بولدىم. وپەرانى يتاليالىق ديريجەر انتونەللو اللەماندي قويدى. باستى رولدەردى اننا پيروتستسي, مارسەلو الۆارەس, البەرتو ماسترومارينا ورىندادى.
بۇل وپەرا العاش رەت ريمدە 1900 جىلعى قاڭتار ايىندا قويىلىپتى. وپەرانىڭ «استانا وپەراداعى» پرەمەراسى, الەمدىك ءداستۇر بويىنشا, يتاليان تىلىندە ءوتتى. «توسكا» – رەاكتسيا داۋىرىندەگى يتاليادا بولعان جاعدايلاردى سۋرەتتەيتىن, ەركىندىككە تالپىنعان كەڭ پافوستى دراما.
وپەرانىڭ نەگىزگى ءۇش كەيىپكەرىنىڭ دە پارتياسى الەمدىك كلاسسيكالىق انشىلەر اراسىندا كەڭىنەن تارالعان. ولاردىڭ اريالارى وپەرالىق مۋزىكانىڭ ءىنجۋ-مارجانى قاتارىندا. سپەكتاكلدىڭ دەكوراتسياسى, كەيىپكەرلەردىڭ كوستيۋمدەرى – ءبارى درامانىڭ ءوتىپ جاتقان كەزەڭىن, ىشكى اتموسفەرانى كورسەتۋگە مۇمكىندىك تۋعىزادى.
بۇل الەمدەگى 5 وپەرانىڭ قاتارىندا تۇرعان ايگىلى تۋىندى. ونى ورىنداعان انشىلەر قۇرامى دا جوعارى دەڭگەيلى, اسىرەسە, مارسەلو الۆارەستى بولە-جارا ايتامىز. شىن مانىندەگى كورەرمەننىڭ قوشەمەتىن كورسەڭىز... ناعىز الەمدىك دەڭگەيدەگى ورىنداۋ, شىرقاۋ تاڭداي قاقتىردى دەسەڭىز دە ابدەن بولادى.
الەمگە ايگىلى انشىلەردىڭ جوعارى كاسىبي دارەجەدە ورىنداۋ مانەرى تىڭداۋشىلاردى راحاتقا بولەدى. ءبىرىنشى بولىمدە ءدىني قىزمەتكەر ريزاشىنىڭ پارتياسىن ورىنداعان قر ەڭبەك سىڭىرگەن قايراتكەرى سۇندەت بايعوجيننىڭ كاسىبي دەڭگەيىن ەرەكشە اتاپ وتكىم كەلەدى. ول پارتيانى زور ىنتامەن, بيىك كاسىبي دەڭگەيدە ورىندادى. ساحناداعى بالالار حورى دا جارقىن ءارى ويناقى ونەر كورسەتىپ, جانداندىردى. «استانا وپەراداعى» دج. ءپۋچچينيدىڭ «توسكا» وپەراسىنىڭ پرەمەراسى تىڭداۋشىلارعا ۇلكەن اسەر بەرىپ, وركەستردىڭ سوڭعى اككوردىنان كەيىن ولار قويۋشى رەجيسسەر, مۋزىكالىق جەتەكشى, بۇكىل ترۋپپاعا ۇزاق قوشەمەت كورسەتتى.
تويجان ەگىنباەۆا,
قازاق ۇلتتىق ونەر ۋنيۆەرسيتەتىنىڭ پروفەسسورى.