«قازحروم» تۇك» اق-تىڭ فيليالى اقتوبە فەرروقورىتپا زاۋىتىنىڭ مەتاللۋرگتەر مادەنيەت ۇيىندە «ءبىز – قاۋىپسىز ەڭبەك ءۇشىن» اتتى تاقىرىپتا كوڭىلدىلەر مەن تاپقىرلار كوماندالارىنىڭ سايىسى بولىپ ءوتتى.
جىلداعى ءداستۇر بويىنشا بيىل دا زاۋىتتىقتار اراسىندا كوڭىلدىلەر مەن تاپقىرلار سايىسى ءوز جالعاسىن تاپتى. سايىسقا تسەح, بولىمشەلەردەن ون كوماندا قاتىسىپ, ءازىل-شىنى ارالاس تاماشا ويىن ورنەگىن كورسەتتى. تەحنيكا قاۋىپسىزدىگىنە ارنالعان سايىس ادەتتەگىدەي ءۇش تاپسىرمادان تۇردى. مادەني شارانىڭ ارقاۋى تەحنيكا قاۋىپسىزدىگى بولعاندىقتان ءاربىر كوماندا كۇندەلىكتى وندىرىستە ورىن العان جاعدايلاردى استارلى ازىلمەن كورەرمەندەرگە وي تاستاي وتىرىپ جەتكىزىپ, كەمشىلىكتىڭ زاردابى قانداي بولاتىنىن كوز الدارىنان وتكىزۋى اسەرلى شىقتى.
كوڭىلدەرگە ءتۇرلى وي تاستار ازىلىمەن ۇزدىكتەر قاتارىنان كورىنگەن №2 بالقىتۋ تسەحى مەن حيميالىق ساراپتاما زەرتحاناسىنان قۇرىلعان «ەكشن» كومانداسى باس جۇلدەنى جانە 70 مىڭ تەڭگە اقشالاي سىيلىقتى قانجىعاسىنا بايلادى. ەكىنشى ورىندى يەلەنگەن شيكىقۇرام دايىنداۋ تسەحى جانە تەحنيكالىق قاداعالاۋ ءبولىمىنىڭ «سيز» كومانداسى 50 مىڭ تەڭگە, ءۇشىنشى ورىن العان ءوندىرىستى اۆتوماتتاندىرۋ جانە بايلانىس تسەحى مەن اكتى كۇيدىرۋ جانە كومىرقىشقىلىن ءوندىرۋ ۋچاسكەسىنىڭ جاستارىنان قۇرىلعان «White» قۇراما كومانداسى 35 مىڭ تەڭگە اقشالاي سىيلىقتى ولجالادى. جۇلدەلى ورىندارعا ىلىكپەگەن قوماندالارعا دا ىنتالاندىرۋ سىيلىقتارى مەن العىس حاتتار تابىستالدى. ال كورەرمەندەردىڭ كوزايىمى بولعان جەكەلەگەن ويىنشىلار دا ماراپاتتان قۇرالاقان قالمادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.