مەملەكەت باسشىسى قاسىم-جومارت توقاەۆ قازاقستانعا مەملەكەتتىك ساپارمەن كەلگەن قاتار ءامىرى شەيح ءتاميم بەن حاماد ءال تانيمەن شاعىن قۇرامدا كەلىسسوز جۇرگىزدى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
قاسىم-جومارت توقاەۆ قاتار ءامىرى ءتاميم بەن حاماد ءال تانيگە شاقىرۋىن قابىل الىپ, قازاقستانعا مەملەكەتتىك ساپارمەن كەلگەنى ءۇشىن العىس ايتتى.«جوعارى مارتەبەلى شەيح ءتاميم مىرزا, وزىڭىزبەن قازاقستاندا كەزدەسىپ وتىرعانىما وتە قۋانىشتىمىن. مەنىڭ شاقىرۋىمدى قابىل الىپ, مەملەكەتتىك ساپارمەن قازاقستانعا كەلگەنىڭىز ءۇشىن شىن جۇرەكتەن ريزاشىلىعىمدى بىلدىرگىم كەلەدى. ءبىز بۇگىن ەكىجاقتى قارىم-قاتىناستىڭ ەڭ ماڭىزدى ماسەلەلەرى بويىنشا ءتيىستى ۋاعدالاستىقتارعا قول جەتكىزەمىز. ءبىز ءۇشىن قاتار مەملەكەتى – تاياۋ شىعىستاعى ەڭ ماڭىزدى سەرىكتەس. سوندىقتان قارىم-قاتىناسىمىزدى ودان ءارى دامىتۋ ءۇشىن بار كۇش-جىگەرىمىزدى سالامىز», دەدى مەملەكەت باسشىسى.
قاتار ءامىرى پرەزيدەنت قاسىم-جومارت توقاەۆقا قازاقستانعا شاقىرعانى ءۇشىن العىس ايتىپ, قوناقجايلىق كورسەتكەنى ءۇشىن ريزاشىلىعىن ءبىلدىردى. «جوعارى مارتەبەلى پرەزيدەنت مىرزا, ەلىڭىزگە مەملەكەتتىك ساپارمەن شاقىرعانىڭىز ءۇشىن العىس ايتامىن. ەكى ەل اراسىندا جاقسى قارىم-قاتىناس ورناعان. كەيىنگى جىلدارى ءارتۇرلى سالاداعى بايلانىستارىمىز قارقىندى دامىپ كەلەدى. بۇگىنگى مەملەكەتتىك ساپار اياسىندا ماۋسىم ايىندا دوحادا وتكەن ەكونوميكالىق فورۋم كەزىندەگى بىرقاتار ۋاعدالاستىقتاردى بۇگىن تالقىلايمىز. بۇل كەلىسىمدەردىڭ ماقساتى – بىرنەشە سالادا ىنتىماقتاستىقتى دامىتۋ. بۇگىن ءبىز كەڭەيتىلگەن قۇرامدا مينيستەرلەردىڭ قاتىسۋىمەن وسى ماسەلەلەردى جان-جاقتى قاراستىرامىز. سونداي-اق ەرتەڭ وتەتىن ازياداعى ءوزارا ءىس-قيمىل جانە سەنىم شارالارى جونىندەگى كەڭەس ءسامميتىنىڭ ءساتتى وتۋىنە تىلەكتەستىك بىلدىرەمىن», دەدى قاتار ءامىرى.