تەكەلىنىڭ تەمىر زاۋىتى

مۇندا ءبىرىنشى كەزەڭدە 100 جاڭا جۇمىس ورنى اشىلدى. الداعى ۋاقىتتا جۇمىسشىلار سانىن 500-گە دەيىن ۇلعايتۋ كوزدەلگەن. تارتىلعان ينۆەستيتسيا كولەمى 4 ملرد تەڭگەدەن اسادى. ەكسپورتقا باعىتتالعان كاسىپورىننىڭ سالتاناتتى اشىلۋىنا جەتىسۋ وبلىسىنىڭ اكىمى بەيبىت يساباەۆ, «گورنوە بيۋرو» جشس كومپانيالار توبىنىڭ ديرەكتورى ابدرامان ەدىلباەۆ, زاۋىت جۇمىسشىلارى مەن تەكەلىلىك تۇرعىندار قاتىستى. تەكەلى تۇرعىندارىن كاسىپورىننىڭ رەسمي اشىلۋىمەن قۇتتىقتاعان ءوڭىر باسشىسى جىل باسىنان بەرى وبلىس ەكونوميكاسىنا 129 ملرد تەڭگە ينۆەستيتسيا تارتىلىپ, 15 جوبا ىسكە اسىرىلعانىن اتاپ ءوتتى. سولاردىڭ ءبىرى – تەكەلىدە اشىلىپ وتىرعان «ەلەكترومارگانەتس» جشس. بۇل – مەتاللۋرگيا سالاسىنداعى عىلىمي جەتىستىكتەردى وندىرىسكە ەنگىزىپ وتىرعان ايتۋلى نىسان.

«ەلەكترومارگانەتس» جشس-ءنىڭ تەمىردى تىكەلەي قايتا قالپىنا كەلتىرەتىن زاۋىتى تەكەلى قالاسىنىڭ عانا ەمەس, وبلىستىڭ الەۋمەتتىك-ەكونوميكالىق دامۋىنا جاڭا سەرپىن بەرەدى دەپ ويلايمىن. ءوندىرىستىڭ ەكولوگيالىق جەتىستىگى – عىلىمي ىزدەنىستەر مەن زاماناۋي تەحنو­لوگيانى قابىستىرۋدىڭ قانداي تابىس­قا جەتكىزەتىنىنىڭ ايقىن ايعاعى. ەل پرە­زي­دەنتىنىڭ الدىمىزعا قويعان باستى مىن­دەتتەرىنىڭ ءبىرى دە وسى. بۇل العاشقى قار­لىعاشى دەسەك تە بولادى. كاسىپ­ورىن­نىڭ بولاشاعى زور, جوسپا­رى اۋقىمدى. الدا جۇمىس ورنىن بۇدان ءارى كوبەيتىپ, كاسىپورىننىڭ قۋاتىن ارتتىرا ءتۇسۋ مەجەلەنىپ وتىر. وسىعان وراي جەرگىلىكتى وقۋ ورىندارى­نا تەحنولوگتار دايارلاۋ, وڭىردەگى كول­لەدج­دەردە سالاعا قاجەتتى جاڭا مامان­دىقتار اشۋ ماسەلەسىنىڭ دە وزەكتى ەكەنىن ايتۋ كەرەك. سوندىقتان ءبىز جاڭا كاسىپ­ورىنداردى زاماناۋي, جوعارى تەحنولوگيالى قۇرال-جابدىقتارمەن جۇمىس ىستەي الاتىن, باسەكەگە قابىلەتتى ماماندارمەن قامتاماسىز ەتۋىمىز كەرەك», دەدى ب.يساباەۆ.

ءوز كەزەگىندە «گورنوە بيۋرو» جشس كومپانيالار توبىنىڭ ديرەكتورى, تەحنيكا عىلىمدارىنىڭ دوكتورى ابدرامان ەدىلباەۆ كاسىپورىننىڭ ەرەكشەلىكتەرىنە توقتالدى. ونىڭ ايتۋىنشا, كاسىپورىنداعى تاجىريبەلىك-ونەركاسىپتىك قوندىرعىلار الەمدىك ونەركاسىپتىڭ جاڭا تالاپتارىنا ساي. زاۋىتتا ەكولوگيالىق تازا وندىرىسكە كوشۋگە سەرپىن بەرەتىن, تەمىردى تىكەلەي قالپىنا كەلتىرەتىن تەحنولوگيا ەنگىزىل­گەن. وندىرىستە وتاندىق كونتسەنتراتتار, كەن مەن كومىر قولدانىلادى, ال وندى­رىل­گەن ونىمگە سۇرانىس جوعارى. قازىر ەۋروپا, قىتاي, تۇركيا, رەسەي ەلدەرى­مەن كەلىسىم ءجۇرىپ جاتىر. مۇنداي ءونىم الەم­دىك نارىققا تۇڭعىش رەت شىعارىلماق. سوندىقتان نارىقتاعى ءوز ورنىن بەكىتىپ, ماركاسىن تانىتۋ اسا قاجەت ءىس. جاھاندىق باسەكەلەستىكتەگى ەڭ ماڭىزدىسى – ساپا, سوندىقتان, ءوندىرىس بارىسىندا ساپاعا ەرەكشە ەكپىن تۇسىرىلەدى.

«الداعى ۋاقىتتا قولدانىلىپ وتىر­عان تەحنولوگيامىزدى ودان ءارى دامى­تۋ­عا, تۇراقتى جۇمىس ورىندارىن ۇلعايتا وتىرىپ, قۋاتتىلىعى جوعارى تاجىريبەلىك-ونەركاسىپتىك قوندىرعىلاردىڭ قولدانىس اياسىن كەڭەيتۋگە, وسىلايشا تەكەلىنىڭ, جالپى وتاندىق مەتاللۋرگيانىڭ ەلدىڭ الەۋمەتتىك-ەكونوميكالىق دامۋىنا ءوز ۇلەسىن قوسۋىنا اتسالىسۋعا نيەتتىمىز. جالپى, الەمدە دومەندىك ءوندىرىس تەحنولوگياسىن قولداناتىن شامامەن 3 500 كاسىپورىن جانە تەمىردى تىكەلەي قالپىنا كەلتىرۋ تەحنولوگياسىن قولداناتىن 30-داي كاسىپورىن بار ەكەنىن اتاپ وت­كىم كەلەدى. ەندى بۇل تەحنولوگيا, مىنە, ءبىزدىڭ ەلىمىزدە دە ەنگىزىلىپ وتىر», دەدى ا.ەدىلباەۆ.

سول سياقتى ول تىكەلەي قالپىنا كەلتىرۋ مەن دومەندىك ءوندىرىس ءبىر-بىرىمەن جاقسى ۇيلەسەتىنىن ايتتى. بۇل تۇراقتى ىسكە قوسىلعاننان كەيىن تەكەلى تاۋ-كەن وڭدەۋ كەشەنىمەن ءوزارا بىرلەسىپ جۇمىس ىستەۋگە, سونداي-اق ونى شيكىزاتپەن قام­تاماسىز ەتۋ جاعىنان جاقسى مۇمكىن­دىكتەرگە جول اشپاق.

كادر دايارلاۋ ماسەلەسىنە كەلسەك, كاسىپورىن باسشىلىعى رەسەيدىڭ يركۋتسك وبلىسىنداعى وسىنداي كاسىپورىننىڭ ماماندارىن تارتا وتىرىپ, بىرنەشە اي بويى زاۋىت قىزمەتكەرلەرىن وقىتقان, تەحمينيمۋم, وندىرىستەگى قاۋىپسىزدىك بويىنشا, جاڭا تەحنولوگيانى قولدانۋ نەگىزدەرى مەن مۇمكىندىكتەرى جونىندە دارىستەر ۇيىمداستىرعان.

زاۋىتتىڭ سالتاناتتى اشىلۋىندا ىسكە قوسۋدىڭ سيمۆولدىق نۇكتەسى باسى­لىپ, كەلۋشىلەر زاۋىتتىڭ ىشكى جۇمى­سىمەن تانىستى.

اتاپ وتسەك, مونوقالادا قۇرىلىس ماتەريالدارى (قۇرىلىسقا ارنالعان قۇرعاق قوسپالار, جيەكتاس, بەتون بۇيىمدار), اشىتقى, تاۋريت, ءسۇت ونىمدەرى جانە باسقا دا تاۋارلار وندىرىلەدى.

جەتىسۋ وبلىسى,

تەكەلى قالاسى