سۆياتوسلاۆ تيماشەۆ,
نوبەل سىيلىعىنىڭ لاۋرەاتى, رەسەي «ماشينالاندىرۋ جۇيەسىنىڭ ۇلكەن ۇمىتتەرى مەن مۇمكىندىكتەرى» عىلىمي-زەرتتەۋ ورتالىعىنىڭ ديرەكتورى:
– مەن عالامدىق جىلىنۋ ماسەلەسىمەن ۇلتتىق دەڭگەيدە اينالىساتىندىعىن مالىمدەگەن العاشقى ەل قازاقستان ەكەندىگىن ايتقىم كەلەدى. بۇل كليماتتىق قۇبىلىس بولعاندىقتان, ادامزات ارنايى ەشتەڭە ىستەي المايدى, بىراق سول ءۇشىن ەكى باعىتتا جۇمىس ىستەي الادى. ءبىرىنشىسى – اداپتاتسيا, ەكىنشىسى – پرەۆەنتيۆتى ءىس-ارەكەت. بۇل تۇرعىدا VII استانا ەكونوميكالىق فورۋمىندا جاسىل ەكونوميكاعا ارنالعان سەسسيالار ناتيجەلى بولادى دەگەن ويدامىن.
راسيم ليايچ,
سەربيا رەسپۋبليكاسى پرەمەر-ءمينيسترىنىڭ ورىنباسارى, سىرتقى جانە ىشكى ساۋدا, تەلەكوممۋنيكاتسيالار ءمينيسترى:
– استانا ەكونوميكالىق فورۋمىنىڭ ماڭىزى ۋاقىت وتكەن سايىن ارتىپ كەلە جاتقاندىعىنا وسى فورۋمعا قاتىسۋ بارىسىندا تاعى دا كوز جەتكىزىپ وتىرمىن. بۇل باسقوسۋعا الەمنىڭ 150 ەلىنەن 10 مىڭنان استام ساراپشىلار مەن بىلىكتى ماماندار جينالعان ەكەن. وسىعان قاراپ-اق وعان حالىقارالىق قاۋىمداستىق تاراپىنان تۋىنداپ وتىرعان قىزىعۋشىلىقتى انىق بايقاۋعا بولادى.
مىنە, وسىنشاما قوناقتى ءبىر ساتتە قابىلداپ وتىرعان استانانىڭ الەۋەتى دە مەنى ويلاندىرىپ تاستادى. مەنىڭ بايقاۋىمشا, قالا بولاشاعى وتە ۇلكەن. ونىڭ قازىرگى سالتاناتتى كەيپى كىمدى دە بولسىن قىزىقتىرعانداي.
ەندى فورۋم جاعدايىنا قايتادان ورالسام, العاشقى كۇننىڭ وزىندە قانشاما ماڭىزدى باسقوسۋلار بولىپ جاتىر. ولار جالپى ادامزاتقا قاتىستى كۇردەلى پروبلەمالاردى قوزعاۋىمەن-اق ءوزىنىڭ تيىمدىلىگىن دالەلدەۋدە. شىنىن ايتسام, وسىندا ءوتىپ جاتقان سەكتسيالاردىڭ, بيزنەس-فورۋمداردىڭ ەشقايسىسىن قۇر جىبەرگىم كەلمەيدى-اق. بىراق وعان مۇمكىندىك شەكتەۋلى. سوندىقتان وزىمە قاجەتتى باسقوسۋلارعا قاتىسىپ ءاربىر ۋاقىتىمدى بارىنشا ءتيىمدى پايدالانۋعا ۇمتىلىپ وتىرمىن. فورۋم جۇمىسىنا ساتتىلىك تىلەيمىن.
برەندا حاللوران,
ۆاتەرلوو قالاسىنىڭ مەرى:
– استانا ەكونوميكالىق فورۋمى بۇگىندە ادامزات الدىندا تۇرعان كەلەلى مىندەتتەردىڭ شەشىمىن ىزدەيتىن جاھاندىق ۇنقاتىسۋ الاڭىنا اينالدى. الەمگە تانىمال ەكونوميستەر مەن دۋالى اۋىز ساراپشىلار بۇل الەمدىك ماڭىزدى جيىننىڭ كۇن تارتىبىندە تالقىلاناتىن ماسەلەلەرگە ەرەكشە باسىمدىق بەرەدى. سوڭعى ەكى جىلدان بەرى فورۋم شەڭبەرىندە وتكىزىلىپ كەلە جاتقان دۇنيەجۇزىلىك داعدارىسقا قارسى كونفەرەنتسيادا بەلگىلەنگەن داعدارىسقا قارسى دۇنيەجۇزىلىك جوسپار الەمنىڭ الدىڭعى قاتارلى اقىل-ويىن ادامزات بولاشاعى ماقساتىنداعى ۇلكەن ىسكە جۇمىلدىرىپ وتىر. مەن وسى حالىقارالىق فورۋم اياسىندا وتكىزىلىپ وتىرعان V «Astana Invest-2014» حالىقارالىق ينۆەستيتسيالىق فورۋمىنا قاتىسىپ, بايانداما جاسادىم. وسى ورايدا استانا قالاسىنىڭ ەكونوميكالىق دامۋ قارقىنىنا ەرەكشە ءتانتى بولدىم. اقيقاتىندا قازاقستان ەلورداسىنىڭ ينۆەستيتسيالىق الەۋەتىنىڭ ايرىقشا زور ەكەندىگىنە كوز جەتكىزدىم. جالپى, بۇگىندە الەمدىك ەكونوميكالىق داعدارىستاردىڭ الدىن الۋدا استانا ەكونوميكالىق فورۋمىنا جۇكتەلەتىن مىندەت جۇگى اۋقىمدى.