ۇلتتىق ەكونوميكا ءمينيسترى الىبەك قۋانتىروۆ ۇكىمەت وتىرىسىندا ەلدىڭ 2022 جىلعى توعىز ايداعى الەۋمەتتىك-ەكونوميكالىق دامۋى تۋرالى اقپارات بەردى, دەپ حابارلايدى Egemen.kz.
ۇلتتىق ەكونوميكا مينيسترلىگىنىڭ باسشىسى قاڭتار-قىركۇيەك ايلارىندا قازاقستان ەكونوميكاسىنىڭ ءوسۋ قارقىنى 2,8%-دى قۇراعانىن, ونىڭ ىشىندە ناقتى سەكتورداعى ءوسىم 3,1%, قىزمەت كورسەتۋ سالاسى 1,9%-عا وسكەنىن ايتتى.
مينيستر اتاپ وتكەندەي, سالالار اراسىندا اۋىل شارۋاشىلىعى, اقپارات جانە بايلانىس, قۇرىلىس, كولىك جانە قويما, وڭدەۋ ونەركاسىبى, ساۋدا جانە تاۋ-كەن ونەركاسىبى وڭ ءوسىم كورسەتتى.
«نەگىزگى كاپيتالعا ينۆەستيتسيالاردىڭ ءوسۋ قارقىنىنىڭ 7%-عا دەيىن جەدەلدەۋى بايقالادى», دەدى الىبەك قۋانتىروۆ.
قر ۇەم باسشىسىنىڭ دەرەكتەرى بويىنشا بىلىمگە ينۆەستيتسيالار اعىنى 45,7%-عا, ساۋداعا 23,3%-عا, قۇرىلىسقا - 22,9%-عا, جىلجىمايتىن م ۇلىكپەن وپەراتسيالار بويىنشا - 17,5%-عا, تاۋ-كەن ءوندىرۋ ونەركاسىبىنە - 10,7%-عا, كولىك پەن قويمالاۋعا - 9,2%-عا, اۋىل شارۋاشىلىعىندا - 7,5%-عا ءوستى.