قاسىم-جومارت توقاەۆ پاۆلودار وبلىسىنىڭ جۇرتشىلىعىمەن كەزدەسۋىن ءوڭىردىڭ تاريحي كەلبەتى مەن بۇگىنى جايلى سوزبەن باستادى, دەپ جازادى Egemen.kz.
«ابىلايدىڭ اقىلشىسى بۇحار جىراۋ, عۇلاما ويشىل ءماشھۇر ءجۇسىپ, الاش ارداقتىسى جۇسىپبەك ايماۋىتوۆ وسىندا دۇنيەگە كەلگەن. جاياۋ مۇسا, ەستاي اقىن, سۇلتانماحمۇت تورايعىروۆ, شاكەن ايمانوۆ سىندى رۋحانيات سالاسىنىڭ ايتۋلى وكىلدەرى وسى وڭىردەن شىققان. قانىش ساتباەۆ, الكەي مارعۇلان, ەرمۇحان بەكماحانوۆ, كەمەل اقىشەۆ, شاپىق شوكين سياقتى ايگىلى عالىمدار – ەرتىس بويىنىڭ پەرزەنتتەرى. ءبىر سوزبەن ايتساق, باياناۋىل باۋرايى – تەكتىلەردىڭ بەرەكەلى بەسىگى», دەدى مەملەكەت باسشىسى.
سونداي-اق ايماقتا «قۋاتتى وڭىرلەر – قۋاتتى ەل» قاعيداتى ايقىن كورىنىس تاپقانىن تىلگە تيەك ەتتى.
«بۇل ايماقتى ەكونوميكامىزدىڭ ەنەرگەتيكالىق جۇرەگى دەۋگە بولادى. ەلىمىزدەگى ەلەكتر قۋاتىنىڭ 40 پايىزدان استامى وسىندا وندىرىلەدى. قازاقستاندا شىعارىلاتىن كومىردىڭ دە جارتىسىنان استامى پاۆلوداردىڭ ەنشىسىندە. وبلىستىڭ ءاربىر بەسىنشى تۇرعىنى وڭدەۋ ونەركاسىبىندە نەمەسە وتىن-ەنەرگەتيكا كەشەنىندە جۇمىس ىستەيدى. ەلىمىزدەگى مۇناي-حيميا ونىمدەرىنىڭ ۇشتەن ءبىرى, فەرروقورىتپالاردىڭ جارتىسىنان كوبى وسى وڭىردە شىعادى. سونداي-اق بۇل ولكە وڭدەۋ ونەركاسىبىنىڭ جانە شيكىزاتتىق ەمەس ەكسپورتتىڭ كولەمى بويىنشا الدىڭعى ورىندا تۇر», دەدى پرەزيدەنت.