مۇنايلى اتىراۋدا بىرنەشە جىلدان مەكتەپ تۇلەكتەرىنە وبلىس اكىمىنىڭ ءبىلىم گرانتى بەرىلىپ كەلەدى. وبلىستىق ءبىلىم باسقارماسى باسشىسىنىڭ ورىنباسارى ايناگۇل دۇيسەكەنوۆانىڭ ايتۋىنشا, بيىلعى گرانت وڭىردەگى كادر تاپشىلىعىن شەشۋ ماقساتىندا دەنساۋلىق, ءبىلىم جانە باسقا دا ماڭىزدى سالالار ءۇشىن ءبولىنىپ وتىر. ءبىلىم گرانتىن يەلەنۋ ءۇشىن كونكۋرسقا 231 تالاپكەر ءوتىنىش بەرگەن.
– بيىل وبلىس اكىمىنىڭ ءبىلىم گرانتى 107 تۇلەككە بەرىلدى. اكىم گرانتىن يەلەنگەندەردىڭ دەنى – بولاشاق مۇعالىمدەر مەن دارىگەرلەر. ولاردىڭ ىشىندە 32 تۇلەك م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىنە, 19 ورەن س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنە وقۋعا ءتۇستى. ال ت.جۇرگەنوۆ اتىنداعى قازاق ۇلتتىق ونەر اكادەمياسىنا ءبىلىم الۋ گرانتىنا 5 جاس يە بولدى, 9 جاس «نۇر-مۇباراك» ەگيپەت يسلام مادەنيەتى ۋنيۆەرسيتەتىنە, 40 تۇلەك ح.دوسمۇحامەدوۆ اتىنداعى اتىراۋ ۋنيۆەرسيتەتىنە, 1 تۇلەك م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنە, تاعى ءبىرى قازاق ۇلتتىق قىزدار پەداگوگيكالىق ۋنيۆەرسيتەتىنە وقۋعا قابىلداندى, – دەيدى ا.دۇيسەكەنوۆا.
اكىم گرانتىن يەلەنبەسە دە ءوز بىلىمىمەن شەتەلدەگى ۇزدىك وقۋ ورنىنا وقۋعا قابىلدانعاندار بار. ماسەلەن, اتىراۋ قالاسىنداعى ءبىلىم-يننوۆاتسيا ليتسەي-ينتەرناتىنىڭ بيىلعى تۇلەگى ريزابەك الپامىس ۇبت-دان 132 بالل جيناعان ەدى. ول وڭتۇستىك كورەياداعى Ulsan National Institute of Science and Technology (UNIST) جوعارى وقۋ ورنىنا وقۋعا ءتۇستى. ويتكەنى تالاپتى جاس اتالعان ەلدىڭ عىلىمي-زەرتتەۋ جانە تەحنولوگيا ۋنيۆەرسيتەتى مەن گونكونگتاعى عىلىم جانە تەحنولوگيالار ۋنيۆەرسيتەتىنەن وقۋعا شاقىرتۋ العان.
بىلتىر ريزابەك الپامىس ەۋروپالىق فيزيكا وليمپياداسىنان كۇمىس, بيىل ازيا وليمپياداسىنان قولا مەدالدى قورجىنىنا باستى. ال 2021-2022 جىلدارى حالىقارالىق فيزيكا وليمپياداسىنان ەكى مارتە كۇمىس مەدال, بيىل و.جاۋتىكوۆ اتىنداعى حالىقارالىق وليمپيادادان التىن مەدال يەمدەنگەن.
– مەنىڭ العا قويعان ماقساتىم بار. بۇل – جاڭا تەحنولوگيالاردى ويلاپ تابۋعا ۇلەسىمدى قوسۋ. قازاقستانداعى عىلىم مەن تەحنيكا سالاسىن دامىتۋعا اتسالىسۋدى كوزدەپ ءجۇرمىن. سول سەبەپتەن, بوس ۋاقىتىمدا ءتۇرلى باعدارلامانى قۇراستىرعاندى, فۋتبول ويناعاندى جاقسى كورەمىن. بىراق ۋاقىتىمنىڭ كوبىن عىلىممەن اينالىسۋعا ارنايمىن, – دەيدى ول.
وڭتۇستىك كورەياداعى وقۋ ورداسى ءبىلىم دەڭگەيى بويىنشا الەمدەگى ەڭ ۇزدىك 200 ۋنيۆەرسيتەتتىڭ قاتارىنا كىرەدى. ەندى بۇل وقۋ ورنىندا ريزابەك الپامىسپەن بىرگە حالىقارالىق دودالاردىڭ ۇزدىگى اتانعان اتىراۋلىق ءۇش ورەن بىرگە ءبىلىم الادى. ولار – نۇرداۋلەت حاجەنوۆ, ءادىل سۇلتانوۆ, ادىلەت زاۋىتحان.
اتىراۋ وبلىسى