استانادا بايلانىس جانە اقپارات اگەنتتىگى, «زەردە» ۇلتتىق ينفوكوممۋنيكاتسيالىق حولدينگى» اق پەن «اكت-نى دامىتۋ قورى» كق ۇيىمداستىرۋىمەن ASTEX-2014 حالىقارالىق كورمە-كونفەرەنتسياسى ءوتتى. بۇل تۋرالى egemen.kz ءتىلشىسى حابارلادى.
بۇل كورمە ەلىمىزدە جىل سايىن ەلەكتروندى كوممەرتسيانى, ەلەكتروندى ۇكىمەتتى دامىتۋ ماقساتىندا وتكىزىلەدى. بيىلعى شاراعا وتاندىق كومپانيالارمەن بىرگە شەتەلدىك ءىرى كاسىپورىنداردىڭ باسشىلارى دا قاتىسىپ, قازاقستاننىڭ ەلەكتروندى كوممەرتسيانى دامىتۋدا اتقارىپ جاتقان جۇمىستارىمەن كەڭىرەك تانىستى.
كورمەنىڭ اشىلۋ سالتاناتىنا بايلانىس جانە اقپارات اگەنتتىگىنىڭ توراعاسى اسقار جۇماعاليەۆ قاتىسىپ, شەتەلدىڭ كومپانيا جەتەكشىلەرىنە, ماماندارىنا ەلىمىزدە ەلەكتروندى كوممەرتسيانى دامىتۋعا ارنالعان كەشەندى شارالار تۋرالى ايتىپ بەردى. وندا اگەنتتىك توراعاسى بۇگىنگى كۇنى ەلىمىز بۇۇ-نىڭ دەرەكتەرىنە سايكەس, ەلەكتروندى ۇكىمەتتى دامىتۋ بويىنشا الەمنىڭ 190 ەلىنىڭ اراسىندا 38-ءشى ورىنعا ورنالاسقانىن, ال 2010 جىلى بۇدان 16 ورىنعا تومەن بولعانىن, سوندىقتان ءتورت جىلدىڭ ىشىندە وسىنشاما ورىنعا كوتەرىلگەنىنىڭ ءوزى ەلىمىز ءۇشىن ۇلكەن جەتىستىك ەكەنىن ايتتى.
وسىدان كەيىن «اكت-نى دامىتۋ قورى» كق باس ديرەكتورى سانجار كەتتەبەكوۆ پەن «سكولكوۆو» تەحنوپاركىنىڭ باس ديرەكتورى رەنات باتىروۆ زياتكەرلىك قىزمەتتىڭ ناتيجەلەرىن يننوۆاتسيالىق دامىتۋ جانە كوممەرتسيالاندىرۋ سالاسىنداعى ىنتىماقتاستىق تۋرالى مەموراندۋمعا قول قويدى. سونىمەن بىرگە قازاقستاندىق قور مەن Muckerlab اتتى امەريكالىق كومپانياسىنىڭ اراسىندا اقپاراتتىق تەحنولوگيالار سالاسىنداعى ستارتاپ-كومپانيالاردى دامىتۋ جونىندەگى مەموراندۋم جاسالدى.
كورمەنىڭ ەكىنشى كۇنى بايلانىس جانە اقپارات اگەنتتىگىنىڭ ماماندارى شەتەلدىك كومپانيالاردىڭ باسشىلارى س.فرانزەن, يانگ يم چو, ر. بەللاك, ە.راننالا مەن ر.باتىروۆپەن ەلىمىزدە ەلەكتروندى كوممەرتسيانى دامىتۋ جانە ءىت-كلاستەر قۇرۋ بويىنشا ەكى جاقتى كەزدەسۋلەر وتكىزدى. جالپى, «زەردە» ۇلتتىق ينفوكوممۋنيكاتسيالىق حولدينگى» اق توراعاسىنىڭ ورىنباسارى بيكەش قۇرمانعاليەۆانىڭ ايتۋىنشا, ASTEX-2014 حالىقارالىق كورمە-كونفەرەنتسياسىنا 3 200 ادام كەلىپ, 41 سپيكەر ءسوز سويلەدى. ەكى كۇندە 9 سەسسيا, ەكى شەبەرلىك ساباق, ءۇش دوڭگەلەك ۇستەل, ستارتاپ-جوبالاردىڭ كورسەتىلىمى, 17 ەكى جاقتى كەزدەسۋلەر ءوتتى.
داستان كەنجالين.
دەرەككوز: قازاقستاننىڭ ورتالىق كوممۋنيكاتسيالار قىزمەتى.
فوتو: ەرلان وماروۆ.