قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى 2014 جىلعى 21 مامىردا VII استانا ەكونوميكالىق فورۋمى اياسىندا «الەۋمەتتىك ارىپتەستىك. ناتيجەلى جۇمىسپەن قامتۋدى جانە لايىقتى ەڭبەكتى كەڭەيتۋدى قامتاماسىز ەتۋ جونىندەگى جاۋاپكەرشىلىكتى ءبولۋ» اتتى پانەلدى سەسسياسىن وتكىزەدى.
پانەلدى سەسسيا جۇمىسىنا پرەمەر-مينيستردىڭ ورىنباسارى گ.ءابدىحالىقوۆا, ەڭبەك جانە حالىقتى الەۋمەتتىك قورعاۋ ءمينيسترى ت.ءدۇيسەنوۆا, قازاقستان رەسپۋبليكاسى پارلامەنتىنىڭ دەپۋتاتتارى قاتىسادى. سونىمەن بىرگە, بۇل شاراعا بىرقاتار حالىقارالىق ۇيىمداردىڭ وكىلدەرى شاقىرىلعان. اتاپ ايتقاندا, ولاردىڭ ىشىندە الەۋمەتتىك قامسىزداندىرۋدىڭ حالىقارالىق قوعامداستىعىنىڭ باس حاتشىسى حانس-حورست كونكولەۆسكي, شىعىس ەۋروپا جانە ورتالىق ازيا ەلدەرى ءۇشىن لايىقتى ەڭبەك ماسەلەلەرى بويىنشا تەحنيكالىق قولداۋ توپتارىنىڭ جانە حەۇ بيۋروسىنىڭ ديرەكتورى ديميترينا ديميتروۆا, «ورتاق يگىلىك ءۇشىن – جاhاندانۋ باستاماسى» ۇەۇ نەگىزىن قالاۋشى, دوكتور كامران موفيد, رەسەي-سينگاپۋر ىسكەرلىك فورۋمىنىڭ اتقارۋشى ديرەكتورى مايكل تەي, شىعىس ەۋروپا مەن ورتالىق ازيا ەلدەرى ءۇشىن حەۇ بيۋروسىنىڭ جانە لايىقتى ەڭبەك ماسەلەلەرى جونىندەگى تەحنيكالىق قولداۋ توبىنىڭ حالىقارالىق ەڭبەك نورمالارى جونىندەگى باس مامانى الان پەلسە, جەنەۆا, ەۋروپا مەن ورتالىق ازيا ەلدەرى ءۇشىن حەۇ بيۋروسىنىڭ باس كەڭەسشىسى فرانس اۋەر, رەسەي فەدەراتسياسى ەڭبەك جانە الەۋمەتتىك قورعاۋ مينيسترلىگى حالىقتى جۇمىسپەن قامتۋ دەپارتامەنتىنىڭ ديرەكتورى ميحايل كيرسانوۆ جانە باسقالار بار.
پانەلدى سەسسيا كۇن تارتىبىندە مىنا نەگىزگى تاقىرىپتاردى:
- ناتيجەلى جۇمىسپەن قامتۋعا جانە لايىقتى ەڭبەككە قول جەتكىزۋ ماقساتىندا الەۋمەتتىك ارىپتەستەردىڭ بىرىگۋى قازاقستاننىڭ الەۋمەتتىك-ەكونوميكالىق قارقىندى دامۋىن قامتاماسىز ەتۋدىڭ قاجەتتى شارتى;
- داعدارىس كەزەڭىندەگى جاستار جۇمىسسىزدىعى پروبلەمالارى;
- ۇلتتىق بىلىكتىلىك جۇيەسىن قالىپتاستىرۋ;
- ەڭبەك تاجىريبەسى جانە كادرلاردى دايارلاۋ سالاسىندا بيزنەستىڭ الەۋمەتتىك جاۋاپكەرشىلىگىن ارتتىرۋ;
- جاhاندانۋ جاعدايىندا الەۋمەتتىك قامسىزداندىرۋ جانە الەۋمەتتىك ساقتاندىرۋ ماسەلەلەرىن قاراۋ جوسپارلانعان.
سەسسيا بارىسىندا الەۋمەتتىك ءارىپتەستىك (ۇكىمەت, قىزمەتكەرلەر مەن جۇمىس بەرۋشىلەر بىرلەستىكتەرى) شەڭبەرىندە تاراپتاردىڭ جاۋاپكەرشىلىگىنە قاراي ەكونوميكالىق وسۋگە ىقپال ەتەتىن شارالاردى قابىلداۋ جانە ەڭبەكتى قورعاۋ سالاسىنداعى ىرگەلەس قۇقىق قاعيداتتارىن ساقتاۋ جاعدايىندا ناتيجەلى جۇمىسپەن قامتۋدى قامتاماسىز ەتۋ جونىندە بىرقاتار ۇسىنىمدار بەرىلەدى دەپ كۇتىلۋدە.
جىلقىباي جاعىپار ۇلى,
«ەگەمەن قازاقستان».