سالادا سالماقتى جەتىستىكتەر بار

توتەنشە جاعدايلار مينيسترلىگىنىڭ توتەنشە جاعدايلاردىڭ الدىن الۋى جانە ولاردى جويۋ سالاسىنداعى 2013 جىلداعى جانە ۇستىمىزدەگى جىلدىڭ ءى توقسانىنداعى قىزمەتىنىڭ قورىتىندىلارى تۋرالى ەسەبى كەشە ءماجىلىس توراعاسىنىڭ ورىنباسارى سەرگەي دياچەنكونىڭ جەتەكشىلىگىمەن وتكەن ۇكىمەت ساعاتىندا تىڭدالدى. – ەلباسىنىڭ «قازاقستان-2050» سترا­تەگياسىندا حالىقتىڭ الەۋ­مەتتىك قاۋىپسىزدىگى جانە ونىڭ تۇر­مىس جاعدايى الەۋمەتتىك سايا­ساتتىڭ باستى باعىتى رەتىندە اي­قىن­دالدى. جولداۋدا قويىلعان تا­لاپتارعا سايكەس, توتەنشە جاع­دايلار مينيسترلىگىنە بىرقاتار مەملەكەتتىك مىندەتتەر قويىلعان جانە ىسكە اسىپ كەلەدى, – دەدى ۆيتسە-سپيكەر. بۇل ماسەلەلەر دەپۋتاتتار نازارىندا ەكەنىن مالىمدەگەن س.دياچەنكو وسى جىلدىڭ ساۋىرىندە «ازاماتتىق قورعاۋ تۋرالى» نەگىزگى جانە ىلەسپە زاڭدار قابىلدانعانىن جانە حالىققا قاجەت زاڭعا ەلباسى قول قويىپ, كۇشىنە ەنگەنىن قاپەرگە سالدى. بۇدان كەيىن توتەنشە جاعدايلار ءمينيسترى ۆلاديمير بوجكو ءسوز الدى. مينيستر 103 422 كاسىپكەرلىك وبەكتىنى (جەكە كاسىپكەرلىكتىڭ 65 پايىزىن قۇرايدى) تەكسەرۋ توق­تاتىلعاندىعىن جەتكىزدى. اسىرەسە, ءورت قاۋىپسىزدىگى سا­لا­سىنداعى تەكسەرۋلەر 46 پايىزعا, ال ونەركاسىپتىك تەكسەرىستەر 42 پاي­ىزعا ازايعان. جالپى, 2013 جىلى تجم كۇشتەرى 6 748 ادامدى قۇتقارىپ, توتەنشە جاعدايلار اي­ماعىنان 6 651 ادامدى ەۆاكۋا­تسيا­لاعان جانە 3 667 زارداپ شەگۋشىگە ال­عاشقى مەديتسينالىق كومەك كور­سەتىپتى. مينيستر جىل بويىنا ءار ءتاۋ­لىكتە 100-دەن 450-گە دەيىن شاقى­رۋ­لار ورىن العاندىعىمەن دە ءبو­لىستى. دەي تۇرعانمەن, 2012 جىلمەن سالىستىرعاندا, تابيعي جانە تەحنوگەندىك سيپاتتاعى توتەن­شە جاعدايلار 2013 جىلى 17,6 پاي­ىز­عا, ونىڭ سالدارىنان زارداپ شەك­كەندەر – 13,3 پايىزعا, قازا تاپ­قاندار سانى 15,9 پايىزعا ازايىپتى. اعىمداعى جىلعى ءبىرىنشى توقساندا كوز جۇمعاندار سانى 16,6 پايىزعا, ال زارداپ شەككەندەر 7,1 پايىزعا تومەندەگەن. بۇل رەتتە قىس مەزگىلىندە رەسپۋبليكا جولدارىندا 14 423 ادام مەن 5 366 بىرلىك اۆتوموبيل تەحنيكاسى ەۆاكۋاتسيالانعانىن دا ايتا كەتۋ كەرەك. ال تاسقىنعا قارسى رەجىمدە جۇمىس ىستەگەن كوكساراي سۋ رەتتەگىشى 3 ملرد. تەكشە مەتر سۋ جيناعانى بەلگىلى بولىپ وتىر. ەسىل وزەنىنىڭ تاسقىندى سۋلارىنان ەلوردانى قورعاۋ ماقساتىندا استانا (ۆياچەسلاۆسك) سۋ قويماسى ارناسىنان 120 ملن.-نان استام تەكشە مەتر سۋ اسىپ كەتكەندىكتەن, ونى كەشەن سىيىمدىلىعىنا قايتا قۇيۋ جۇزەگە اسىرىلعان. بۇدان باسقا, اپاتتار مەديتسيناسى جانە سانيتاريالىق اۆياتسيا جۇيەسىن دامىتۋ جالعاسۋدا ەكەنى دە اتالماي قالمادى. اپاتتار مەديتسيناسى ورتالىعى ەسەپتى كەزەڭدە 3 305 شىعۋ جاسادى, 4 054 زارداپ شەككەنگە مەديتسينالىق كومەك كورسەتتى, ەمدەۋ مەكەمەلەرىنە 1 213 ادام جاتقىزىلعان. رەسپۋبليكالىق ماڭىزى بار اۆاريالى اۆتوموبيل جولدارى ۋچاسكەلەرىندە جۇمىس ىستەپ جاتقان 12 كۇرە جول مەديتسينالىق-قۇت­قارۋ پۋنكتتەرىنە قوسا, تاعى 14-ءى پايدالانۋعا بەرىلگەندىگىن جەت­كىزگەن مينيستر ولاردىڭ كۇش­تەرىمەن ەسەپتى كەزەڭدە 903 شىعۋ جۇزەگە اسىرىلىپ, 2 680 زارداپ شەككەنگە كومەك كورسەتىلگەندىگىن دە قاپەرگە سالا كەتتى. «سالاماتتى قازاقستان» مەم­لەكەتتىك باعدارلاماسى شەڭبەرىندە سانيتارلىق اۆياتسيانى دامىتۋ ماقساتىندا 14 ەس-145 تىكۇشاعى مەن 2 كا-32 تىكۇشاعى ساتىپ الىنسا, تىكۇشاقتار ءار وبلىس ور­تالىقتارىندا تاۋلىك بويى كەزەكشىلىكتە تۇرادى ەكەن. ءۇش مەديتسينالىق پويىز 2013 جىلى بارلىق وبلىستاردىڭ 300 شالعاي ستانساسىنىڭ 64 418 تۇرعىنىنىڭ دەنساۋلىعىن تەكسەرىپتى. اپاتتار مەديتسيناسىنىڭ تەمىرجول گوس­پيتالدارىندا 2013 جىلى 57 258 اۋرۋ ەمدەلسە, 2 ميلليون ادام قارالىپ, 12 361 وپەراتسيا جاسالعانى ءمالىم بولدى. تجم تەز دەن قويۋ كۇشتەرىنىڭ ماتەريالدىق-تەحنيكالىق بازاسىن نىعايتۋ ماقساتىندا 2013 جىلى 4 بىرلىك ەس-145 تىكۇشاعى, 166 بىرلىك ءورت ءسوندىرۋ جانە اۆاريالىق-قۇت­قارۋ تەحنيكاسى ساتىپ الىنعان. مينيسترلىك قىزمەتكەرلەرى تۇ­راقتى نەگىزدە كوكشەتاۋ تەحني­كالىق ينستيتۋتىندا, اقتوبە ءوڭىر­لىك ورتالىعىندا, ازاماتتىق قور­عاۋدىڭ رەسپۋبليكالىق وقۋ-ادىستەمەلىك ورتالىعىندا بىلىك­تىلىكتى ارتتىرۋ جانە قايتا دايارلاۋ كۋرستارىنان وتەدى. بارلىعى 252 ادام, 99 كۋرسانت ماسكەۋ, سانكت-پەتەربۋرگ جانە مينسك قا­لالارىنداعى تجم ينستيتۋتتارىندا وقۋدا. جانە دە الماتى قالاسىندا ءورت ءسوندىرۋ-قولدانبالى سپورت بويىنشا 10-شى الەم چەمپيوناتىن وتكىزۋ جوسپارلانىپ وتىر ەكەن. مينيسترلىك 6 ءىرى ءزىلزالادان زارداپ شەككەن شەت مەملەكەتتەرگە گۋمانيتارلىق كومەك كورسەتىپتى. 2013 جىلى گۆاتەمالاعا, اۋ­عان­ستانعا, ليۆانعا, شري-لانكاعا اقشالاي بالامادا تاماق ونىمدەرى تۇرىندە 978 مىڭ اقش دوللارى شاماسىندا كومەك كورسەتىلىپتى. اۋعانستانعا 1 ميلليون 985 مىڭ 917 دوللار كولەمىندە تاماق ءونىم­دەرى جونەلتىلسە, رەسەي­دىڭ بلاگوۆەششەنسك قالا­سىندا 240 ورىنعا ارنالعان با­لا­باق­شانى سالۋعا 379,3 ميلليون تەڭگە بولىنگەن. ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى الەكساندر ميليۋتين اتالعان تاقىرىپقا قوسىمشا بايان­داما جاسادى. كوميتەت توراعاسى وڭتۇستىك قازاقستان, پاۆلودار جانە اقمولا وبلىستارىندا قار سۋىنان ەلدى مەكەندەردىڭ زارداپ شەككەندىگىن جەتكىزىپ, قاراعاندى وبلىسىنداعى جاعدايدى ەسكە سالدى. وسىعان وراي سۋ قويمالارىنا مەملەكەتتىك باقىلاۋدى كۇشەي­تۋ ماقساتىندا ءتيىستى نورما­لار ەنگىزىلىپتى. سونىمەن قاتار, اۋىلدىق ايماقتار ءورت ءسون­دى­رۋ بولىمشەلەرىنەن الشاق ورنا­لاس­قاندىقتان, ولاردىڭ قىزمەتى جەتە بەرمەيتىندىگى دە اتالماي قالمادى. سوندىقتان دا قوسىمشا ءورت ءسوندىرۋ ورىندارى قۇرىلىپ, سۋدان قۇتقارۋ ستانسالارىنىڭ جۇمىسى ءبىر رەتكە كەلتىرىلۋى ءتيىس. باياندامالار اياقتالىسىمەن دەپۋتاتتار مينيسترگە كوپتەگەن سۇراقتار قويىپ, ءوز ۇسىنىس-پىكىرلەرىن ءبىلدىردى. وتىرىستى ءماجىلىس توراعاسىنىڭ ورىنباسارى قورىتتى. ءسوز سوڭىندا ايتارىمىز, ۇكىمەت ساعاتى ۇزاققا سوزىلا قويمادى. وعان ءمينيستردىڭ جان-جاقتى دايىندالىپ كەلگەنى سەبەپ بولدى. ونىڭ ۇستىنە, دەپۋتاتتىق كورپۋس بۇل سالانىڭ دامۋىنا ارقاشان زاڭنامالىق تۇرعىدان قولداۋ كورسەتەتىندىگىن دە ءبىلدىرىپ جاتتى. ارتىنان ۇكىمەتكە ءبىر­قاتار ۇسىنىستار جوباسى دايىندالدى. اسقار تۇراپباي ۇلى, «ەگەمەن قازاقستان».