پارلامەنت سەناتىندا ۇكىمەتتىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2013 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىنىڭ تانىستىرىلىمى بولدى, دەپ حابارلادى سەناتتىڭ ءباسپاسوز قىزمەتى.
دەپۋتاتتاردىڭ الدىندا پرەمەر-ءمينيستردىڭ ورىنباسارى – قارجى ءمينيسترى باقىت سۇلتانوۆ پەن ەسەپ كوميتەتىنىڭ توراعاسى قوزى-كورپەش جاڭبىرشين بايانداما جاسادى.
ب.سۇلتانوۆ جىل قورىتىندىسى بويىنشا ەكى ناقتىلاۋدى ەسەپكە الا وتىرىپ, رەسپۋبليكالىق بيۋدجەتكە تۇسەتىن تۇسىمدەر جوسپارى 100,6 پايىزعا نەمەسە 5 272,4 ميلليارد تەڭگەگە اتقارىلعانىن ايتتى. ۇكىمەتتىڭ ەسەبى بويىنشا كىرىستەر ءىس جۇزىندە 2012 جىلمەن سالىستىرعاندا, 7,8 پايىزعا وسكەن. بيۋدجەتكە كىرىستەر 5 179,5 ميلليارد تەڭگە سوماسىندا نەمەسە 100,5 پايىز تۇسكەن.
2013 جىلعا ارنالعان رەسپۋبليكالىق بيۋدجەت شىعىستارىنا قاتىستى ايتار بولساق, ولار 5 990,5 ميلليارد تەڭگەنى نەمەسە جوسپارعا 99,3 پايىزدى قۇرايدى. 2012 جىلمەن سالىستىرعاندا, ونىڭ ءوسىمى 194,8 ميلليارد تەڭگەنى قۇرادى.
رەسپۋبليكالىق بيۋدجەت شىعىستارىنىڭ قۇرىلىمىندا نەگىزگى ۇلەستى الەۋمەتتىك سالا شىعىستارى الىپ وتىر – 2 336,4 ميلليارد تەڭگە نەمەسە 36,0 پايىز, ونىڭ 1 239,9 ميلليارد تەڭگەسى زەينەتاقىلار مەن جاردەماقىلاردى قۇرايدى.
قارجىنىڭ 42,9 ميلليارد تەڭگەسى پايدالانىلماي قالعان.
ق.جاڭبىرشين 2013 جىلعى رەسپۋبليكالىق بيۋدجەتتىڭ اتقارىلۋى تۋرالى نەگىزگى قورىتىندىنى ايتا وتىرىپ, بيۋدجەت قارجىسىن ءتيىمدى پايدالانۋدى ارتتىرۋ, بيۋدجەت قارجىسىنىڭ ماقساتتى جانە اتاۋلى پايدالانىلۋىن قامتاماسىز ەتۋ, سونداي-اق, رەسپۋبليكالىق بيۋدجەت قاراجاتىنىڭ اتقارىلۋىن جەتىلدىرۋ جانە مەملەكەت اكتيۆتەرىن پايدالانۋدىڭ تيىمدىلىگىن ارتتىرۋ تۋرالى ۇسىنىستار ايتتى. بيۋدجەتتىك باعدارلامالار اكىمشىلەرىنىڭ رەسپۋبليكالىق بيۋدجەتتى بىرنەشە مارتە ناقتىلاپ, تۇزەتۋلەرىنە قاراماستان 2013 جىلعى رەسپۋبليكالىق بيۋدجەت قارجىسىن پايدالانۋ بارىسىندا تيىمدىلىكتىڭ جەتىسپەۋشىلىگى ورىن الدى. 2014 جىلعى 1 قاڭتاردا ورتالىق مەملەكەتتىك ورگاندار 43,2 ميلليارد تەڭگەنى يگەرمەدى, جەرگىلىكتى اتقارۋشى ورگاندار يگەرىلمەگەن جانە ءوز ماقساتىنا پايدالانىلماعان 26,0 ميلليارد تەڭگە ماقساتتى ترانسفەرتتەردى بيۋدجەتكە قايتاردى.
كۆازيمەملەكەتتىك سەكتور سۋبەكتىلەرىنىڭ ەسەپشوتتارىنداعى قالدىق قاراجات 62,6 ميلليارد تەڭگەنى قۇرادى.
ەسەپ قۇجاتتارىنىڭ تانىستىرىلىمى بارىسىندا سەناتورلار جەرگىلىكتى بيۋدجەتتەردىڭ كىرىس بازاسىن ودان ءارى جەتىلدىرۋ, مەملەكەت اكتيۆتەرىن باسقارۋ تەتىكتەرى, اتقارۋشىلىق تارتىپتەردى بۇزعانى ءۇشىن جاۋاپتىلىق, قارجى مونيتورينگى جۇيەسىنىڭ پارمەندىلىگى, سالىق جانە كەدەن اكىمشىلەندىرۋلەرىنىڭ تيىمدىلىگىن جەتىلدىرۋ, جۇمىس ورىندارىن ۇلعايتۋ ماسەلەلەرىن كوتەردى.
ەسەپتەردى تالقىلاۋ پارلامەنت سەناتى قارجى جانە بيۋدجەت كوميتەتىنىڭ توراعاسى راشيت احمەتوۆ جەتەكشىلىك ەتەتىن جۇمىس توبىندا جالعاساتىن بولدى.