عوسمان تولەعۇلمەن دوستىعىمىز وتكەن عاسىردىڭ 80-جىلدارى باستالدى. ول – ومىردە قاق-سوقپەن ءىسى جوق, بار ويى مەن ماقساتى ادامدارعا ادال بولسام, سولارعا جاقسىلىق جاساسام, كومەكتەسىپ قولۇشىن بەرسەم دەپ تۇراتىن جۇرەگى جىلى جانداردىڭ ءبىرى.
تۋعان جەرىنەن تابان اۋدارماي ەڭبەك ەتىپ, جىرى دا, سىرى دا تەك كىندىك قانى تامعان قاسيەتتى كوكشە وڭىرىمەن بايلانىستى بولدى. تالاي جاۋاپتى قىزمەتتەردىڭ تۇتقاسىن ۇستادى. قازىر قادىرمەندى ەل اعاسى, ارداگەرلەر كەڭەسىنىڭ توراعاسى, زەرەندى اۋدانىنىڭ قۇرمەتتى ازاماتى.
عوسمان تولەعۇل ۇلى ەلىمىزدە, وبلىس, قالا كولەمىندە بولىپ جاتقان ءتۇرلى وزگەرىستەرگە لايىقتى باعاسىن بەرىپ, وڭ ۇدەرىستەرگە ۇلەس قوسۋ ءۇشىن ءوزىنىڭ كۇش-جىگەرىن اياماي جۇمساپ كەلەدى جانە قاجەت كەزىندە كوزقاراسى مەن ۇستانىمىن باتىل كورسەتە بىلەتىن قاسيەتكە دە يە ازامات.
بۇگىندە كەزىندە بەلگىلى سەبەپتەرمەن قاساقانا وزگەرىسكە ۇشىراعان ەلدى مەكەن, جەر-سۋ اتاۋلارىن قايتا قالپىنا كەلتىرۋدىڭ كەلەشەك ۇرپاق ءۇشىن ماڭىزى اسا جوعارى ەكەنى ايتپاسا دا تۇسىنىكتى. كەز كەلگەن ەلدىڭ وتكەنى مەن بۇگىنىنىڭ ساباقتاستىعى جەر-سۋ اتاۋلارى – توپونيمدەرى ارقىلى كورىنىس تاباتىنى بەلگىلى. قازاق ەلىنىڭ جەر-سۋ اتاۋلارىنىڭ ءاربىرى حالىقتىڭ سان عاسىرلىق تاريحىنان سىر شەرتەتىنى بارشامىزعا ايان. وسى ورايدا عوسمان تولەعۇلدىڭ ەڭبەگى ەرەن.
اتاپ ايتساق, ول وبلىس كولەمىندەگى 144 ەلدى مەكەن مەن 1 717 كوشەنىڭ قايتا اتالۋىنا مۇرىندىق بولدى. سونىڭ ىشىندە, اسىرەسە شوقتىعى بيىك, الەمدىك دەڭگەيدەگى كۋرورتتىق ايماقتاردىڭ ءبىرى بولىپ تابىلاتىن ششۋچە اۋدانىنىڭ بۋراباي اۋدانى بولىپ قايتا اتالۋىنا كوپ ەڭبەك سىڭىرگەنىن بولە-جارا اتاپ كورسەتكەن ءجون. سونداي-اق اتادان بالاعا ميراس بولىپ دارىعان ۇلتىمىزدىڭ سال-سەرىلىك ءداستۇرىن ۇستانعان كوكشە جەرىندە قايمانا قازاقتىڭ ماقتانىشى, جەزتاڭداي ءانشى, سازگەر ءبىرجان سال قوجاعۇل ۇلىنىڭ وشپەس اتىن جاڭعىرتۋعا ايتارلىقتاي ۇلەس قوستى. ءسويتىپ, شىعۋ تەگى بەلگىسىز ءارى تۇسىنىكسىز ەڭبەكشىلدەر اۋدانى ءبىرجان سال اۋدانى بولىپ وزگەرتىلدى.
مۇنىڭ ءبارىنىڭ ايتۋعا عانا وڭاي, شىن مانىندە, ۇلان-عايىر ەڭبەك پەن تاباندىلىقتى تالاپ ەتەتىن اۋقىمدى شارۋا ەكەنى انىق.
مۇرات قاجى ىدىرىس ۇلى
اقمولا وبلىسى