ەلەكتروندىق ەڭبەك بيرجاسىنىڭ پورتالىندا قازاقستاندا جاڭارتىلاتىن ەنەرگيا كوزدەرىن دامىتۋ جانە وسى سالاداعى جۇمىس پەرسپەكتيۆالارى تۋرالى اقپارات بەرەتىن جاڭا ءبولىم پايدا بولدى. الداعى ۋاقىتتا بولىمدە «جاسىل ەكونوميكا» سەكتورىنا لايىقتى بوس جۇمىس ورىندارى مەن تۇيىندەمەلەردى ورنالاستىرۋ جوسپارلانۋدا.
جاڭارتىلاتىن ەنەرگيا كوزدەرى سەكتورىن دامىتۋ, سونداي-اق وسى باعىتتا ايەلدەرگە تەڭ جاعدايلار مەن مۇمكىندىكتەر جاساۋ ءۇشىن ەۋروپالىق قايتا قۇرۋ جانە دامۋ بانكىنىڭ قولداۋىمەن قازاقستاندا ءتيىستى باعدارلاما ىسكە قوسىلدى. بۇل كوپتەگەن جوبا مەن ءىس-شارانى جۇزەگە اسىرۋدى قامتيدى. وسىلايشا, جاس ماماندارعا تالىمگەرلىك جۇيەسى ەنگىزىلىپ, الىنعان اكادەميالىق بىلىمدەرىن مامان قىزمەتكەرلەردىڭ جەتەكشىلىگىمەن جەك جۇمىس ىستەپ تۇرعان نىساندارىندا قولدانۋعا مۇمكىندىكتەر اشىلدى, حالىقارالىق تاجىريبە نەگىزىندە جاستارعا كاسىپتىك باعدار بەرۋ جۇيەسى ەنگىزىلۋدە.
ء«بىز جۇرتشىلىققا ەلەكتروندىق ەڭبەك بيرجاسىندا جاڭارتىلاتىن ەنەرگيا سەكتورىنداعى مۇمكىندىكتەر تۋرالى ارنايى بەتتى ۇسىنۋعا قۋانىشتىمىز. جاڭا كاسىپتەر مەن قۇزىرەتتەر اتلاسىندا اتاپ وتىلگەندەي, الداعى جىلداردا قازاقستانعا وسى سالانىڭ ماماندارى كوبىرەك قاجەت بولادى. ەلدە جاڭارتىلاتىن ەنەرگيا كوزدەرىنە ارنالعان قۇرامداس بولىكتەردى جوبالاۋ, ءوندىرۋ, سونداي-اق ولاردى سالۋ, تەحنيكالىق قىزمەت كورسەتۋ جانە باسقارۋمەن بايلانىستى كاسىپتەر داميتىن بولادى. سالانىڭ دامۋى تۇراقتى جانە ينكليۋزيۆتى جولمەن ءجۇرۋى كەرەك, ونى ءبىز ۇسىنىلعان بەت ارقىلى العا جىلجىتۋعا تىرىستىق», دەدى «ەڭبەك رەسۋرستارىن دامىتۋ ورتالىعى» اق پرەزيدەنتى داۋلەت ارعاندىقوۆ.
جەك سەكتورىندا جۇمىسقا تارتىلۋى مۇمكىن جاستاردى قامتۋدى كەڭەيتۋ, ولارعا مانساپتىق كەلەشەگىن ايقىن كورسەتۋ, جۇمىس بەرۋشى ماماندارعا قىزىعۋشىلىق تانىتاتىن داعدىلار تۋرالى حاباردار ەتۋ ماقساتىندا ەەب بويىنشا ارنايى ءبولىم قۇرىلدى. ول ەۋروپالىق قايتا قۇرۋ جانە دامۋ بانكى باعدارلاماسىنىڭ قولداۋىمەن «ەڭبەك رەسۋرستارىن دامىتۋ ورتالىعى» اق مەن Ernst & Young كومپانيالار توبىنىڭ بىرلەسكەن جۇمىسى اياسىندا, سونداي-اق جاسىل كليماتتىق قورمەن بىرلەسىپ جۇزەگە اسىرىلدى.