مەملەكەت باسشىسى قاسىم-جومارت توقاەۆ تۇركىستان وبلىسىنا باردى. ماڭىزدى ساپار.
قازىر اشىق زامان. اشىق قوعام. قازاق قاي داۋىردە بولسا دا تاريحىن ۇمىتپاعان. قينالعاندا دا, قۋانعاندا دا اتا-بابا رۋحىنا سۇيەنگەن: وسى ەجەلگى ءداستۇر بۇگىنگى زاماندا جالعاسىن تاۋىپ جاتىر. پرەزيدەنتتىڭ قوجا احمەت ياساۋي بابامىزدىڭ باسىنا بارىپ مەدەت سۇراعانى تەكتەن تەك نارسە ەمەس, مۇندا قازاقتىڭ حاندارى مەن بيلەرى, باتىرلارى مەن بەكتەرى ماڭگى مەكەن تاپقان!
پرەزيدەنتىمىز تۇركىستان وبلىسى تۇرعىندارىمەن كەزدەسىپ, ەلدەگى جانە الەمدەگى جاعدايدى تۇگەل سارالاپ ايتىپ بەردى.
بىرىككەن ۇلتتار ۇيىمىنىڭ تورىنەن ءسوز العاندا قازاق ەلىنىڭ تەرريتوريالىق تۇتاستىعى مەن ەگەمەندىگىن قورعاۋ مەن ساقتاۋدىڭ امالىن نەگىزگە العانىن اتاپ ءوتتى. مەككەگە بارعان ساپارىندا ەلدىڭ اماندىعى مەن يگىلىگى ءۇشىن ارنايى دۇعا جاساعانىن دا قاپەرگە سالدى.
تايتالاسقان زامان. دۇنيەنى دۇنيە بيلەگەن ءداۋىر. الپاۋىتتار ايقاسى ءجۇرىپ جاتىر. قازاق ەلى وسىنداي الاعاي دا بۇلاعاي قانشا كەزەڭدى باسىنان وتكەردى. بۇل – ۇلكەن سىناق. ءبىلىمىڭ مەن بىلىگىڭە سۇيەنبەسەڭ, اباي ايتقانداي «اقىلىڭ مەن قايراتىڭا, ەڭبەگىڭە جۇگىنبەسەڭ, كورىنگەن كۇشتىنىڭ قانجىعاسىنا بوكتەرىلىپ كەتۋ وڭاي». ىنتىماق پەن بىرلىك – حالقىمىزدىڭ قۋاتى مەن قالقانى! مەملەكەت باسشىسىنىڭ قاسيەتتى تۇركىستانعا ءتاۋ ەتۋى – ەجەلدەن قالىپتاسقان ەلدىك ءداستۇردى ۇستانۋى. مۇندا ۇلكەن ماعىنا بار.
پرەزيدەنت اۋقىمدى رەفورمالاردى قولعا الدى. كەيبىرەۋلەر «قاڭتاردان بەرى نە وزگەردى, ءبارى باياعى قالىپتا» دەگەندى ايتادى. جۇيەلى رەفورما ءبىر كۇندە جاسالمايدى. وسىنى تۇسىنگەن ابزال. ءىت ماماندارىنىڭ تىلىمەن ايتار بولساق, ماتريتسانى جاڭالاۋ, ياعني قوعامدا ۇلكەن «پەرەزاگرۋزكا» ءجۇرىپ جاتىر. ەڭ مىقتى دەگەن سۋپەر كومپيۋتەردىڭ وزىنە «قايتا تىنىستاۋ» قاجەت بولاتىنىن ەسكەرسەك, قازاق قوعامىنا دا سونداي كەزەڭ تۋعانىن ءتۇسىنۋ قاجەت.
پرەزيدەنتتىڭ سوزىنە قۇلاق تۇرەيىك: «پرەزيدەنتتىك لاۋازىمعا كوپ جىل بويى ءبىر عانا ادام يە بولماۋى كەرەك. الەمدە بولسىن, ءبىزدىڭ ەلىمىزدە بولسىن كوپ جىل بويى ءبىر عانا ادام ەڭ جوعارى لاۋازىمعا يە بولسا, مۇنداي جاعداي ەلگە دە, مەملەكەت باسشىسىنا دا ابىروي اكەلمەيدى. ءبىز بولاشاققا نىق سەنىممەن قاراپ, ادال, دارىندى ساياساتكەرلەرگە جول اشۋىمىز كەرەك».
بارىنشا ايقىن. مەيلىنشە ناقتى. ەشتەڭەنى جابا جاسىرىپ, بۇركەمەلەپ وتىرعان جوق. سوندىقتان ەلدىڭ بۇتىندىگى مەن بەرەكەسىن ويلايتىن زەردەلى ازاماتتار مەملەكەتشىلدىك باعىتتان جاڭىلماي, ۋايىمعا سالىنباي, قايراتىنا قايرات, ايباتىنا ايبات قوسسا دەيمىز.
نۇرتورە ءجۇسىپ,
سەنات دەپۋتاتى