«قاسىم-جومارت توقاەۆ الەمدەگى جانە امەريكاداعى ءىرى كومپانيالاردىڭ, زەرتتەۋ ورتالىقتارىنىڭ باسشىلارىمەن كەزدەستى. ولاردىڭ قاتارىندا Goldman Sachs, Grupo Los Grobo, JPMorgan Chase & Co., Eurasia Group, S&P Global جانە ەرام systems, Coursera سىندى كومپانيا وكىلدەرى بار», دەپ جازدى رۋسلان جەلدىباي فەيسبۋكتەگى پاراقشاسىندا.
بۇل كەزدەسۋلەردە ەكىجاقتى ورتاق جوبالار, كەيبىر كومپانيالاردىڭ قازاقستاندا ءوندىرىس ورىندارىن اشۋ, مامانداردى وقىتۋ جانە باسقا دا ماسەلەلەر تالقىلانعان.
«سونداي-اق مەملەكەت باسشىسى دۇنيەجۇزىلىك ەكونوميكالىق فورۋمنىڭ نەگىزىن قالاۋشى كلاۋس شۆابپەن, USAID جەتەكشىسى سامانتا پاۋەرمەن جولىقتى. شۆاب مىرزا پرەزيدەنتتى 2023 جىلى قاڭتاردا داۆوستا وتەتىن كەزەكتى الەمدىك ەكونوميكالىق فورۋمعا قاتىسۋعا شاقىردى. بۇدان بولەك, جاھاندىق كونسالتينگ كومپانيالاردىڭ وكىلدەرىمەن, بەدەلدى ساراپشىلارمەن مازمۇندى كەزدەسۋلەر ءوتتى», دەدى ول.
پرەزيدەنت ماماندارمەن الەمدە بولىپ جاتقان وزگەرىستەر, جاڭا ترەندتەر مەن قاۋىپ-قاتەرلەر جايىندا پىكىر الماسقان.
«ال تۇسكە قاراي اقش-تا IT سالادا قىزمەت ەتىپ جۇرگەن قازاق جاستارىمەن جولىقتى. Digital Nomads قاۋىمداستىعى – بۇگىندە 400-گە جۋىق جاستىڭ باسىن قوساتىن ىرگەلى ۇيىم. جاس ماماندار ەلىمىزدە IT سەكتوردى دامىتۋ جولدارىنا قاتىستى ءوز ۇسىنىستارىن ايتتى. پرەزيدەنت جەرلەستەرىمىزگە زور تابىس تىلەپ, ولار ەلىمىزدىڭ دامۋى مەن وركەندەۋىنە ەلەۋلى ۇلەس قوساتىنىنا سەنىم ءبىلدىردى», دەپ تۇيىندەدى جازبا سوڭىن رۋسلان جەلدىباي.
ايتا كەتەيىك, پرەزيدەنتتىڭ تۇستەن كەيىنگى كەزدەسۋلەرى جايلى سايتىمىزدان وقي الاسىزدار.