اقتاۋ. 16 مامىر. اقتاۋدا 8 جاسار اسىلبەكتى پنەۆماتيكالىق قارۋمەن وق اتىپ جاراقاتتاعان ادامدى ءالى تابىلماۋدا. بۇل تۋرالى egemen.kz ءتىلشىسى حابارلادى.
پوليتسەيلەر ادام اتۋدى «ەرمەككە» اينالدىرعان كۇدىكتىلەردى تابۋعا كومەك بەرگەن جانعا قوماقتى قارجىلاي سىي تاعايىندالاتىنىن جاريا ەتتى.
ال اسىلبەكتەن بۇرىن پنەۆماتيكالىق قارۋ وعىنان زارداپ شەككەن ءۇش ادامنىڭ ءبىرى – 23 جاستاعى كونستانتين شۋلگا (سۋرەتتە). تاقىرىپقا وراي جۋرناليستەرمەن تىلدەسكەن ول پوليتسەيلەردىڭ ءسوزىن قۋاتتاپ, قىلمىسكەر كورشى ۇيدە ەمەس, ءدال وزدەرى تۇراتىن 22-شاعىناۋدانداعى 6-ۇيدە تۇرۋى مۇمكىن دەگەن جورامال ايتادى.
كونستانتين شۋلگا: «مەن دە گالەرەياعا تەمەكى تارتۋعا شىققان ەدىم. سول ساتتە جاڭبىر جاۋىپ, كۇن كۇركىرەپ, نايزاعاي ويناي باستادى. وسى كەزدە مەنىڭ قۇلاعىم وقىس اۋىرىپ, شىمىرلاپ الا جونەلدى. العاشىندا مەنى نايزاعاي سوقتى دەپ ويلادىم. پنەۆماتيكالىق قارۋدىڭ وعىن تاپقان سوڭ عانا وزىمە وق اتىلعانىن ءتۇسىندىم», – دەدى.
ال اسىلبەكتىڭ جاعدايى قازىر جاقسى, كۇن ساناپ ءتاۋىر بولىپ كەلەدى.
گۇلايىم شىنتەمىرقىزى.
دەرەككوز: egemen.kz.
فوتو: egemen.kz.