«ديماش ارقىلى قازاق ءان-كۇيىنە اڭسارىم اۋدى»

وعان دەيىن ديماش اندەرىن ناسيحاتتايتىن مۇنداي راديو ارگەن­تينادا اشىلعان ەدى. وسى تاقىرىپتى زەرتتەۋ بارىسىندا بىلگەنىمىز – RadioDimash.pl رەسمي تۇردە تىركەلگەن حابار تاراتۋ ستانساسى ەكەن. ۇيىمداستىرۋشى­لار پولياك باسپاسوزىندە ديماش قۇداي­بەرگەن تۋرالى كونتەنتتىڭ ازدىعىنان, تۆ مەن راديودا اندە­رىنىڭ از بەرىلەتىندىگىنەن وسىنداي شەشىم قابىلداعان.

پولياك جانكۇيەرلەرىنىڭ جوباسىنان ءبىزدىڭ ديماش حاباردار بولعانىن الەۋمەتتىك جەلىدەگى جازباسىنان بىلدىك.

«بۇگىن پولشادا Dimash راديوسى جۇمىسىن باستادى. مەنىڭ قىمباتتى كورەرمەندەرىم, وسى ءساتتى پايدالانىپ وزدەرىڭىزگە العىسىمدى بىلدىرگىم كەلەدى. سىزدەر مەن ءۇشىن كوپ جۇمىس ىستەپ جاتىرسىزدار. الەم تالانتتى ۆوكاليستەردەن كەندە ەمەس ەكەنىن بىلەمىن. بىراق سىزدەر ماعان قولداۋ ءبىلدىرۋ ارقىلى سوعان سەنىپ وتىرسىزدار», دەيدى ديماش Instagram-داعى پاراقشاسىندا.

تاياۋدا سول كلۋبتىڭ جەتەكشىسى تەرەزا كاكول بىرەر كۇنگە الما­تىعا كەلگەنىن ەستىپ, كەزدەسۋگە اسىق­تىق. ءبىزدىڭ ديماشقا دەگەن ىس­تىق ىقىلاسىنىڭ ويانۋىنا نە سەبەپ بولعانىن وزىنەن سۇراپ-بىل­دىك. بارىنشا سالقىنقاندى مۋزىكا زەرتتەۋشىسى ديماش جاي­لى سىرتتاي بىلسە دە اسا نازار اۋدار­ماي, داۋسى ءتاۋىر كوپ ءانشى­نىڭ ءبىرى شىعار دەپ ويلاعان. ءتىپ­تى اينالاسىنداعىلاردىڭ ارتىس­تەر­گە تابىنىپ جۇرگەنى وعان وعاش كو­رىنىپتى. 53 جاسقا دەيىنگى قالىپ­تا­سىپ قالعان كوزقاراسىنىڭ ­مۇل­دەم باسقا باعىتقا وزگەرۋىنە ديماشتىڭ قىتايدا وتكەن I am a Singer بايقاۋىنىڭ ءبىرىنشى تۋرىندا ايتقان S.O.S ءانى سەبەپ بولعان. ءاننىڭ ءون بويىن باۋراپ العانى سونشالىقتى ءبىر جىل بويى تىڭداپ, باياعى بوزىم بويجەتكەن كەزىندەگى كۇيدى قايتا باستان كەشتى. ودان كەيىن 2020 جىلى ماسكەۋدەگى كرەمل ساحناسىندا تۇساۋىن كەس­كەن, ءسوزىن ەسىمى الەمگە ءماشھۇر لارا فابيان, ءانىن يگور كرۋتوي جازعان Your Love ءانى دە ەركىن بيلەپ العان.

«قانداي اسەر العانىمدى سي­پات­تاۋعا ءسوزىم جەتپەيدى. ءاننىڭ اعزا­داعى بۇكىل جاسۋشالاردى قوزعاپ جىبەرەتىن قۇدىرەتى بارىن ديماش داۋسى ارقىلى ءبىلدىم. تۇڭعىش رەت اعزامداعى مىڭ-ميلليون جاسۋشا ءبىر مەزگىلدە ويانعانداي, جۇ­رەگىم كەۋدەمدەگى بەكىنىستى جارىپ جىبەرەردەي كۇيدى ءوز باسىمنان وتكەردىم. سودان كەيىنگى ارەكەت ينتەرنەتتەن فان-كلۋبتاردى ىزدەۋ­دەن باستالدى. ول تۋرالى دەرەكتىڭ تۇگەلىن كوز مايىم تاۋسىلعانشا وقىپ شىقتىم, زەرتتەدىم. سوسىن ديماشتىڭ شىعارماشىلىعى مەن قازاق مادەنيەتىن پولشادا ناسي­حاتتاعىسى كەلەتىن ادامدارمەن جولىمىز ءتۇيىستى. ناتيجەسىندە, Dimash Kudaibergen Fanklub Poland دەگەن اتپەن فان-كلۋب اشتىق», دەيدى ك. تەرەزا حانىم.

ونىڭ ويىنشا, ديماش قا­زاق­تىڭ حانزاداسى دەڭگەيىنە كوتەرىل­گەن بەكزات بولمىستى تۇلعا. لون­دون, پراگا, سانكت-پەتەربۋرگ, ديۋس­­سەلدورفتاعى كونتسەرتتەرىنە قا­تىستى. داۋسىن جاقىننان ەستۋ ءۇشىن ماسكەۋگە ءۇش رەت كەلىپ كەتتى. ال دۋبايدا وتكەن كونتسەرتىنە پولشادان 50 ادام بارىپتى. كلۋب مۇشەلەرىنىڭ قاتارى كۇن سايىن كوبەيىپ جاتقاندىقتان كونتسەرتتەرگە بارۋ ءۇشىن ارنايى اۆتوبۋس جالداپ جۇرۋگە تۋرا كەلىپتى.

«ماعان ديماشتىڭ فەنومەنى جاقسى تانىس. ەڭ العاش ەستىگىندە وسىنداي تالانتتى 30 جىل كۇتكە­نىمدى جانە ەندى تابىسقانىمدى ويلادىم. ول ءان قۇدىرەتىن تۇسىنەتىن جانكۇيەرلەرىنىڭ ءومىرىن تۇبەگەيلى وزگەرتتى» – دەپ ەسكە الادى تەرەزا.

تەرەزا اڭگىمە بارىسىندا ديماشتىڭ اتاسىن, اجەسىن, اناسىن كورگەنىن دە تىلگە تيەك ەتىپ ءوت­تى. «ونىڭ بويىنداعى بەكزاتتىق قاننان بەرىلگەنىنە كوزىم جەتتى. ەتنوگراف عالىم گريگوري پوتا­نين «ماعان بۇكىل قازاق دالاسى ءان سالىپ تۇرعانداي كورىنەدى» دەسە, مەن قازاقتىڭ بولمىسى بەك­زاتتىق پەن سۇلۋلىقتىڭ بالاما­سى دەر ەدىم. سوسىن سىزدەردە «اتا­سى جاقسى قانداي-دى, اناسى جاقسى قانداي-دى» دەگەن ءسوز بار عوي. مە­نىڭ ەلىمدە دە تۇلعانىڭ شىق­قان تەگىنە كوپ ءمان بەرىلەدى, ديماش­تىڭ ونەرىنە تولىققاندى باعا بە­رەتىن ساراپشىلار ءالى تۋعان جوق. ولاردىڭ كوزقاراسى تەك تاڭعالۋ­مەن شەكتەلەدى. ديماش ححI عا­سىردىڭ فەنومەنى. ونى وزىنە دە­يىنگى جانە وزىنەن كەيىنگىلەرمەن سا­لىستىرۋ مۇمكىن ەمەس. ديماش ازىرگە ەكسكليۋزيۆ», دەيدى تەرەزا حانىم.

پولشا تەلەديدارى مەن را­ديو­­سىندا ديماش اندەرى سيرەك بەرىلەدى. مۇنىڭ سەبەبى, پروديۋس­سەرلەرىمەن اۆتورلىق قۇقىق تۋرالى كەلىسىمشارت جوق ەكەن. ەۋروپا زاڭى اۆتورلىق قۇقىقتىڭ قاتاڭ ساقتالۋىنا باسىمدىق بەرەدى. زاڭ بويىنشا تۆ نەمەسە راديودان بەرىلگەن انگە تيەسىلى قارجى اۆتوردىڭ جەكە ەسەپشوتىنا اۋدارىلادى. ساراپشى ايتىپ وتكەندەي, ديماش اندەرىنىڭ ەفيردەن از وتۋىنە وسى جايت جولدى بايلاپ وتىر ەكەن.

«ديماشتىڭ اكەسى قانات قۇداي­بەرگەنوۆپەن قازاقستاندا كەزدەسىپ, وسى تاقىرىپ توڭىرەگىندە سويلەستىك. ول بۇل ماسەلەنى الداعى ۋاقىتتا قاراستىراتىنىن ايتتى, ديماش ءبىر سۇحباتىندا «پولشاعا مىندەتتى تۇردە بارامىن» دەگەنى ەسىمدە. بۇيىرسا, ول كۇنگە دە جەتەرمىز» دەيدى .

اڭگىمە بارىسىندا بەلگىلى بول­عا­نىنداي, پولشانىڭ ءار ايما­عىندا ديماشتىڭ ونەرىن ناسيحاتتاۋ, اندەرىن كوپشىلىككە جەتكىزۋ جۇمىستارى قالىپتى جاعدايدا ءجۇرىپ جاتىر. ۆارشاۆاداعى قازاق­ستان ەلشىلىگىمەن, گدا-نسكتەگى قا­زاقستان كونسۋلدىعىمەن بايلا­نىس ورناپ, قازاقستان جاعىنان ۇيىم­داستىرىلعان بارلىق مەملەكەت­تىك ءىس-شاراعا قاتىسۋعا مۇمكىندىك تۋدى.

«ديماش ارقىلى قازاقتىڭ ءان-كۇيىنە ىقىلاسىم اۋدى. سوڭعى بىرەر ايدا دومبىرا شەرتۋگە دەن قويىپ ءجۇرمىن. گيتارادا جاقسى ويناعاندىقتان, دومبىرانىڭ ءتىلىن مەڭگەرۋ ماعان قيىنعا تۇسپەيدى دەپ ۇمىتتەنەمىن. شىلدەنىڭ ورتاسىندا گدانسك قالاسىندا «قازاقستانمەن تانىسايىق» دەگەن اتپەن وتكەن جيىنعا ۆارشاۆادا تۇراتىن جۋرناليست جاندوس قارىنباەۆتى ارنايى شاقىردىم. ول قازاقستان تۋرالى كوپ دەرەك ايتتى», دەيدى تەرەزا.

تەرەزامەن اڭگىمە بارىسىندا فان-كلۋبتىڭ مۇشەلەرى راديو ارقىلى ديماشتىڭ قازاق تىلىندەگى اندەرىنىڭ ءمان-مازمۇنىن زەردەلەۋگە دەن قويعانىن بىلدىك.

«قازاق ءتىلىنىڭ الەمدەگى ەڭ قۇ­نارلى, باي ءتىل ەكەنىن ديماش اندەرى ارقىلى ءبىلدىم, ديماش اندەرى ار­­قى­لى قازاق تىلىنە عاشىقپىن. ديماشتىڭ رەپەرتۋارىنداعى «قارا تورعاي» انىندە «كەلەدى قارا تورعاي قانات قاعىپ, استىنا قاناتىنىڭ مارجان تاعىپ» دەگەن تىركەستەر بار. ءاننىڭ تاريحىن بىلمەگەندەر ونىڭ مازمۇنىن تۋرا ماعىناسىندا ءتۇسىنىپ قالۋى مۇمكىن. جاقىندا ناق وسى انگە قاتىستى جاندى تولقىتىپ جىبەرەتىن اڭگىمە ەستىدىم. ونىڭ اۆتورى حح عاسىردا ءومىر سۇرگەن اقان سەرى ەكەنىن جاقىندا ءبىلدىم. جەرگە قونا الماي جانى قينالعان قىران بۇركىتتىڭ قاناتىنان تامشىلاعان تەر كۇننىڭ ساۋلەسىمەن لاعىل تۇسكە بويالعان ءساتى اقىننىڭ نازارىنا ءىلىنىپ قالعان. ءبىر اۋىز سوزىنەن تاريحى تاڭبالانىپ قالعان مۇنداي تاعدىرلى ءان قازاقتان وزگە حالىقتا از. كلۋب مۇشەلەرى ديماشتىڭ بارلىق ءانىن پولياك تىلىنە اۋدارادى. قىسقاسى, مازمۇنىن بىلە­تىن, تۇسىنەتىن دەڭگەيدەمىز. قازىر ءبىزدىڭ فان-كلۋب ءارى ۇيىمعا 26 000 ادام مۇشە. Facebook جەلىسىندەگى جەكە پاراقشامىزدى 14 مىڭنان استام جانكۇيەر باقىلايدى. ءتىپتى كلۋبىمىزدىڭ ەڭ جاس مۇشەلەرى­نىڭ ءبىرى اتا-اناسىنىڭ كۇندەلىكتى جول پ ۇلىنا بەرگەن قارجىسىنان ۇنەمدەپ, قارجى اۋدارعان. قىس­قاسى, ولار كەز كەلگەن باستامانى, ءىس-شارانى قارجىلاندىرۋعا دايىن. جاقىندا قازاقستاندىق دوستارىمنىڭ ءبىرى تانىمال اندەر­دىڭ تاريحىن زەردەلەگەن كىتاپ سىيلادى. ەندى الداعى ۋاقىتتا قازاق اندەرىن ناسيحاتتاعان كەزدە ونىڭ تاريحىنان دا قىسقاشا دەرەكتەر بەرىپ وتىرامىز», دەيدى تەرەزا.

سپيكەرىم اڭگىمە بارىسىندا پولشانىڭ استاناسىندا قازاق ءتىلى كۋرسىن اشۋ تۋرالى جوسپارىن ايتىپ بەردى. جوسپار بويىن­شا كۋرس وسى جىلدىڭ قاڭتار ايىندا اشىلۋى كەرەك ەدى. بىراق كەي­بىر جاعدايلارعا بايلانىستى كەشەۋىلدەپ جاتىر. قازاق ءتىلىن ۇيرەنۋگە دەن قويىپ وتىرعان ىنتالى توپ ءتىپتى ونلاين كۋرس ارقىلى دا مەڭگەرۋگە دايىنبىز دەپ وتىر.

الماتى