25-26 قىركۇيەك كۇندەرى جامبىل اتىنداعى قازاق مەملەكەتتىك فيلارمونياسىندا العاش رەت حالىقارالىق «ديريجەرلەر شەرۋى» مۋزىكا فەستيۆالى وتەدى, دەپ حابارلايدى Egemen.kz.
فەستيۆال اياسىندا قازاقستان رەسپۋبليكاسىنىڭ مەملەكەتتىك ۇرمەلى اسپاپتار وركەسترى (قر ءمۇاو) ءوزىنىڭ 33-كونتسەرتتىك ماۋسىمىن اشادى. كوركەمدىك جەتەكشىسى جانە باس ديريجەرى - قر ەڭبەك سىڭىرگەن قايراتكەرى قانات احمەتوۆ, ديريجەر - قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى الەكساندر بەلياكوۆ.
الىس-جاقىن شەتەلدەن كەلەتىن 10 ديريجەر قازاقستاندىق كورەرمەن الدىندا ءوز ونەرلەرىن پاش ەتپەك. ەستونيادان مارگۋس كاسەماا, لاتۆيادان سپودريس كاچانس, رەسەيدەن ۆيكتور حۋدولەي, (پولشادان داريۋش ادام لەدجيون, يزرايلدەن سامۋەل حاگين, گرەتسيادان نيكولاس حريسچوحوۋ, سلوۆەنيادان ميرو سايە, وزبەكستاننان تيمۋر ميرزاەۆ, قازاقستاننان قانات احمەتوۆ پەن الەكساندر بەلياكوۆ قاتىسادى. فەستيۆال شارتتارىنا سايكەس, ولاردىڭ ارقايسىسى ءوز ەلىنىڭ ۇزدىك تۋىندىلارىن ۇسىنادى. اتاپ ايتقاندا, باعدارلاماعا سايكەس ە.تاممنىڭ «ەستون راپسودياسى», ر.كۋللدىڭ «تۋلياك», ر. پاۋلستىڭ «مەلوديا», ۆ. كيلياردىڭ «رەسەي دالاسى», «پان تادەۋش» فيلمىنەن «پولونەز», ن.شەمەردىڭ «التىن يەرۋساليم», ن.سكالكوتاستىڭ «گرەك بيلەرى», ە. جيۆاەۆتىڭ ارانجيروۆكاسىنداعى «باتىر زاكيروۆتىڭ اندەرى», ءا.بەستىباەۆتىڭ «تويباستار» , «ازيا داۋىسى» شىعارمالارى ورىندالادى.
فەستيۆالدىڭ ماڭىزدىلىعى – تاجىريبە الماسۋ, كاسىبي قاسيەت-قارىمىن شىڭداۋ. الداعى ۋاقىتتا «ديريجەرلەر شەرۋى» فەستيۆالى ءداستۇرلى تۇردە وتكىزىلەدى دەپ جوسپارلانۋدا.
كەش باعدارلاماسىندا ۇسىنىلاتىن ءار حالىقتىڭ مۋزىكالىق ونەرىندەگى بىرەگەي فورمات, شىعارمالاردىڭ الۋان تۇرلىلىگى, وزىندىك ەرەكشەلىگى مەن قايتالانباس اۋەنى ونەر سۇيەر قاۋىمعا عاجايىپ كوڭىل-كۇي سىيلايتىنى ءسوزسىز.
كەش جامبىل اتىنداعى قازاق مەملەكەتتىك فيلارمونياسىنىڭ ۇلكەن زالىندا ساعات 18.00-دە باستالادى.
1990 جىلى قۇرىلعان مەملەكەتتىك ۇرمەلى اسپاپتار وركەسترى قازاق كومپوزيتورلارى شىعارمالارىن ورىنداۋ شەبەرلىگىمەن الەمنىڭ تۇكپىر-تۇكپىرىنەن كەلگەن تىڭدارمانداردىڭ نازارىنا ىلىكتى. بۇگىنگى تاڭدا وركەستردە رەسپۋبليكالىق جانە حالىقارالىق كونكۋرستاردىڭ لاۋرەات مۋزىكانتتارى مەن ديپلومانتتارى جۇمىس ىستەيدى. وركەستر رەپەرتۋارىندا 200-دەن استام كونتسەرتتىك باعدارلامالارى بار. رەسەي, گەرمانيا, اقش, فرانتسيا, انگليا, قىتاي ەلدەرىنىڭ اتاقتى ديريجەرلەرى مەن مۋزىكانتتارى ءاردايىم ۇجىمنىڭ جوعارى كاسىبيلىگىن, ءمىنسىز ينتوناتسياسى مەن اسپاپتاردى اسقان شەبەرلىكپەن مەڭگەرۋىن, وركەستر مۇشەلەرىنىڭ تاماشا ۇيلەسىمدىلىگىن, باي دىبىستالۋ تەمبرىن, باي رەپەرتۋارىن ايىرىقشا اتاپ وتەدى. باس ديريجەر – قازاقستاننىڭ ەڭبەك سىڭىرگەن قايراتكەرى, پروفەسسور قانات احمەتوۆ. ديريجەر – قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى الەكساندر بەلياكوۆ. قازاقستان كومپوزيتورلارىنىڭ شىعارمالارى توپتاستىرىلعان رەسپۋبليكا تاريحىنداعى تۇڭعىش كومپاكت-ديسك وركەستردىڭ ورىنداۋىندا جازىلدى. ۇجىمنىڭ سوڭعى جەتىستىكتەرىنىڭ ءبىرى – «مارشي ناشيح پوبەد» (رەسەي) حالىقارالىق ونلاين-بايقاۋىنداعى باس جۇلدەسى.