باس پروكۋرور اسحات داۋىلباەۆ كەزەكتى رەت ازاماتتاردى جەكە قابىلداۋ جۇرگىزدى. ارىز بەرۋشىلەردىڭ وتىنىشتەرى قىلمىستىق, ازاماتتىق جانە اكىمشىلىك ىستەر بويىنشا سوت اكتىلەرىنە, سونداي-اق, الەۋمەتتىك-ەكونوميكالىق جانە قىلمىستىق پروتسەستىڭ سوتقا دەيىنگى ساتىسى سالاسىنداعى ۋاكىلەتتى ورگانداردىڭ شەشىمدەرىنە شاعىمدانۋمەن بايلانىستى بولدى.
ا.داۋىلباەۆ باس پروكۋراتۋرانىڭ ءتيىستى قۇرىلىمدىق بولىمشەلەرىنىڭ باسشىلارىنا ءوتىنىش بەرۋشىلەردىڭ ايعاقتارىن تولىق جانە جان-جاقتى تەكسەرۋدى قامتاماسىز ەتۋدى, زاڭ بۇزۋشىلىقتى انىقتاعان جاعدايدا پروكۋرورلىق قاداعالاۋ اكتىسىن ەنگىزۋدى جانە بۇزىلعان قۇقىقتاردى قالپىنا كەلتىرۋ بويىنشا تۇبەگەيلى شارالار قابىلداۋدى تالاپ ەتە وتىرىپ, تاپسىرمالار بەردى.
باس پروكۋروردىڭ وسىعان دەيىنگى قابىلداۋىنان كەلىپ تۇسكەن «ەلىم-اي» تۇرعىن ءۇي كەشەنىنىڭ وكىلى چ.ۆاليەۆتىڭ ءوتىنىشىن قاراۋ ناتيجەسى بويىنشا باس پروكۋراتۋرا الاياقتىق جاساعان تۇلعالارعا قاتىستى قىلمىستىق ءىستى توقتاتۋ تۋرالى مەرزىمىنەن بۇرىن شىعارىلعان قاۋلىنى بۇزدى. الماتى قالاسىنىڭ پروكۋرورىنا ءتيىستى تۇردە قوسىمشا تەرگەۋدى ۇيىمداستىرۋ تۋرالى تاپسىرما جىبەرىلدى, دەپ حابارلادى باس پروكۋراتۋرانىڭ ءباسپاسوز قىزمەتى.