ءXXى عاسىردىڭ ويى شىمىر, ءسوزى جۇمىر كورەرمەنىن كۇلكىگە كومىپ, قۇرمەتكە بولەنۋ وراسان ەڭبەكتىڭ وتەۋىمەن كەلەتىنى ءسوزسىز. قازىر ساحناداعى ارزان ازىلگە كورەرمەن نازار دا سالمايدى. سوندىقتان تەاتر ونەرىندە باسەكەلەستىك كوبەيىپ, ۋاقىت وتكەن سايىن دامي تۇسۋدە.
سولاردىڭ قاتارىنداعى «كەنتاۋ شوۋ» جانە «شىمكەنت شوۋ» تەاترلارى بار. 2000 جىلى «شىمكەنت شوۋ» ءازىل-سىقاق تەاترىنىڭ العاش قازىعىن قاعىپ, شىمىلدىعىن اشقان ايتىسكەر اقىن ابدىحالىق ء(سابيت) ءابدىرايىموۆ بولاتىن. ول كەيىن تىزگىندى بىردەن بۇل سالادا بۇرىن جۇمىس ىستەمەگەن مىرزاحمەت ەگەمبەرديەۆكە تاپسىرعاندا «ەندى قالاي بولار ەكەن؟» دەپ, كوڭىلدەرى كۇپتى بولعان جۇرتتىڭ كوپكە دەيىن قاۋىپ ەتكەنى راس. سويتسەك, ءسابيت اقىن قاتەلەسپەپتى. جاستايىنان ونەر دەسە, ىشكەن اسىن جەرگە قوياتىن مىرزاحمەتتىڭ حالىقتى زاماناۋي ءازىل-قالجىڭنىڭ قاينارىمەن قاندىرا بىلەتىنىنە سەنگەن ەكەن.
ماماندىعى قۇرىلىسشى, ەكونوميست جىگىت تەاتردىڭ ونەرىن ەلگە تانىتا ءبىلدى. بۇگىندە توپتىڭ قۇرامىندا 8 ءارتىس ەڭبەك ەتەدى. «شىمكەنت شوۋدا» كۇلپاش بەينەسىمەن جۇرتقا تانىمال بەرىك تۇرسىنبەكوۆتى, سونداي-اق, داۋرەن ءجۇمادىلوۆ, نۇربولات ەسەنبەكوۆ, قارلىعاش احمەتوۆا سىندى ونەرپازداردى كاسىبي ارتىستەر قاتارىنا قوسا الدى.
2007 جىلدىڭ جەلتوقسان ايىندا كەنتاۋ قالاسىندا «كەنتاۋ شوۋ» ءازىل-سىقاق تەاترىنىڭ اشىلۋ سالتاناتى وتكەن بولاتىن. قۇرامىندا 10 ءارتىس بار. كوبىسىنىڭ ارنايى ءبىلىمى بار. بۇل تەاتردىڭ وزگە ساتيرالىق تەاترلاردان ايىرماشىلىعى – باعدارلاماسىندا سكەتچ, ءان, بيدەن باسقا تسيرك ونەرىنىڭ ءتۇرلى جانرلارى – فوكۋس, يوگا بويىنشا قىزىقتى قويىلىمدار قامتىلعان. «كەنتاۋ شوۋ» رەسەيگە گاسترولدىك ساپارمەن بارىپ, استراحان وبلىسىندا, ساراتوۆ, ۆولگوگراد, سامارا جانە ومبى قالالارىندا ونەر كورسەتكەن, وزىندىك كەسكىن-كەلبەتى, مىنەز-بولمىسى قالىپتاسقان ۇجىم. سونىڭ ءبىر دالەلى – م.ەگەمبەرديەۆكە تالاي جاننىڭ جۇرەكتەگى لەبىزى اقتارىلعان ءۇشبۋ حاتتار ءجيى ءتۇسىپ جاتادى. مۇنداي العىس سەزىمگە تولى حاتتار بۇگىندە 1800-گە جۋىقتاپ قالىپتى. بۇل – وتە سيرەك كەزدەسەتىن وقيعا.
«كۇلكىستان» ساتيرالىق تەاترى دا بىرتە-بىرتە تانىمال ونەر توبىنا اينالدى. بۇگىندە ولار ءوزىن-ءوزى قارجىلاندىراتىن دەڭگەيگە جەتىپ وتىر. وعان م.ەگەمبەرديەۆتىڭ ءسىڭىرگەن ەڭبەگىن ايتىپ تاۋىسا المايسىز. ديرەكتور دا, پروديۋسەر دە ءوزى. رەجيسسەرلەرى سايدىڭ تاسىنداي – سەيىل يباتوۆ, مەدەۋ دوستاەۆ, ماعاۋيا قوزىباعاروۆ ەسىمدى ازاماتتار.
ايتا كەتۋ كەرەك, 2002 جىلى الماتىدا وتكەن ءازىل-سىقاق تەاترلارىنىڭ رەسپۋبليكالىق العاشقى فەستيۆالىندە «شىمكەنت شوۋ» ءبىرىنشى ورىندى يەلەندى. 2006 جىلى اقتاۋداعى «كاسپي – دوستىق تەڭىزى» اتتى حالىقارالىق كۇلكى جارمەڭكەسىندە «شىمكەنت شوۋ» تەاترى باس جۇلدەنى جەڭىپ الدى. ال 2013 جىلدىڭ جەلتوقسان ايىندا الماتىدا وتكەن رەسپۋبليكالىق كوڭىلدى تاپقىشتار كلۋبى سايىسىندا «كەنتاۋ شوۋ» تەاترىنىڭ ارتىستەرى ىبىراي بەردىقۇلوۆ پەن نۇرسۇلتان جاقىپبەكوۆ باس جۇلدەنى قانجىعالارىنا بايلاپ قايتقانى جۇرت جادىنان شىعا قويعان جوق.
مىرزاحمەتتىڭ اناسى ءومىرىش – 9 ۇل, 6 قىز تاربيەلەگەن التىن قۇرساقتى انا. وتباسىنىڭ تۇڭعىشى بولعان وعان كوپ سالماقتىڭ ارتىلۋى زاڭدى ەدى. اكەسى قوزىمەت 33 جىل شاحتەر بولىپ جۇمىس ىستەپ, بالالارى كامەلەتتىك جاسقا تولا بەرە دۇنيە سالعان ەكەن. ءبىر-بىرىنە باۋىرمال بولىپ وسكەن ۇل مەن قىز كەيىن ءبىرى تاۋداي اكەگە, ءبىرى ابزال اناعا اينالعان. ۇيادا ۇلاعات كورىپ وسكەن مىرزاحمەتتىڭ بالالار ۇيلەرى مەن جەتىم-جەسىرگە جاساعان قايىرىمدىلىق كومەگى ءوز الدىنا بولەك اڭگىمە.
وتكەن جىلدىڭ مامىر ايىندا ءوزى وقىعان كەنتاۋ قالاسىنداعى ى.التىنسارين اتىنداعى مەكتەپكە ۇلى ۇستازدىڭ ەسكەرتكىش-ءبيۋستىن ءوز قارجىسىمەن ورناتقانى ۇلكەن-كىشىگە زور عيبرات. ەسكەرتكىشتىڭ اينالاسى بۇگىندە گۇلزارعا اينالعان. مەكتەپتى 40 جىل بۇرىن بىتىرگەن سىنىپتاستارىنىڭ باسىن قوسقانى تۋعان جەرگە دەگەن سۇيىسپەنشىلىكتىڭ تاعى ءبىر ۇمىتىلماس جارقىن بەتى ىسپەتتى. وعان بۇۇ جانىنداعى «بەيبىتشىلىك الەمى» حالىقارالىق قازاق شىعارماشىلىق بىرلەستىگىنىڭ ارنايى وكىلدەرى قاتىستى. تاۋەلسىزدىك مەرەكەسى قارساڭىندا بۇۇ-نىڭ «UNCOPA» ءبولىمىنىڭ حالىقارالىق «قۇرمەت بەلگىسى» وردەنىمەن ماراپاتتالدى.
ول – اۋعان سوعىسىنا, چەرنوبىل اپاتىنىڭ سالدارىن جويۋعا قاتىسقان ارداگەر. حالىقارالىق كوركەمونەرپازدار وداعىنىڭ مۇشەسى, شىمكەنت جانە كەنتاۋ قالالارىنىڭ قۇرمەتتى ازاماتى, رەسپۋبليكالىق بازارلار جانە كاسىپكەرلەر قاۋىمداستىعىنىڭ وقو بويىنشا فيليالىنىڭ ۆيتسە-پرەزيدەنتى.
مىرزاحمەت قوزىمەت ۇلىنان «جەتىستىككە جەتۋىڭىزدىڭ سىرى نەدە؟» دەپ سۇراعانىمىزدا, ومىرلىك جارى عاليا مۇساقىزىنىڭ ەڭبەگىنە ەرەكشە توقتالدى. «ۇيدەن ەشقاشان قوناق ۇزىلگەن ەمەس. تەاتر ارتىستەرى ۇيىمىزدە قونا جاتىپ, ءوز بالامىزداي بولىپ كەتكەن. ءبارىنىڭ كوڭىلىن تابا بىلەتىن سۇيىكتى جارىمنىڭ جان دۇنيەسى جادىراپ تۇرماسا, وسىنشا شاتتىق شاڭىراققا ورناماس ەدى عوي», – دەپ كۇلە ءتىل قاتتى.
«كەنتاۋ شوۋ» تەاترى بۇگىندە «ءبىزدىڭ ءومىر» اتتى تەلەۆيزيالىق كومەديالىق فيلم ءتۇسىرۋدى قولعا الۋدا. سونىمەن بىرگە, قازاقستان قالالارىنا گاسترولدىك ساپارلارعا شىقپاق.
شىرايلى شىمكەنتتىڭ شىرايىن كۇلكىسىمەن, ءازىل-وسپاعىمەن كىرگىزگەن ساتيرالىق تەاترلاردىڭ حالىققا قالتقىسىز قىزمەت كورسەتۋىنە ايانباي تەر توگىپ جۇرگەن وسىنداي ءبىتىم-بيىگى بولەك جاندارمەن سويلەسكەندە, رۋحتانىپ, ءسىزدىڭ دە بويىڭىزدى اياۋلى ءبىر سەزىم بيلەپ العانداي كۇي كەشەسىز. ونەرگە جاقىنداپ بارا جاتاسىز. ادامعا كۇلە ءبىلۋ دە, كۇلگىزە ءبىلۋ دە كەرەك ەكەن عوي.
دىلداگۇل نۇرماحانبەت.
شىمكەنت.