سەمەي يادرولىق پوليگونى كەسىرىنەن قولسىز مۇگەدەك بولىپ تۋعان كارىپبەك كۇيىكوۆتىڭ كارتينالارى الەم نازارىندا قازىر. اقش, جاپونيا, ۇلىبريتانيا, تاعى باسقا وركەنيەتتى ەلدەردە كورمەلەرى ءوتىپ تۇرادى. سۋرەتشى بۇرىنىراقتا نوبەل سىيلىعىنا ۇمىتكەر رەتىندە ۇسىنىلعان. ءبىز بۇگىن قىلقالامدى تىسىمەن تىستەپ سالاتىن اۆتوردىڭ تۋىندىسىنا توقتالماقپىز.
سۋرەتشىنىڭ «اۆتوپورترەتى»
مەن بۇل سۋرەتكە ءمان بەرمەي وتە شىعار ەم, راسى. «اۆتوپورترەت» دەگەن تاقىرىبى بولماعاندا. ادەبيەتتە نەبىر ۇلىلاردىڭ اۆتوپورترەتىن وقىپ قالعان باس. «ماحاڭدار جوق, ماحاڭداردىڭ سارقىتى, مۇقاعالي ماقاتاەۆ بار مۇندا» دەگەندە, ماحامبەتتى ايتپاۋشى ما ەدى مۇقاڭ؟! كارىپبەكتىڭ مىنا «اۆتوپورترەتىنە» اينالىپ ەكى سوقتىق. ايتاقىر دالادا جۇرتتا قالعان بوس بەسىكتى تالاي كورگەنبىز. بالاسىمەن قوسا قالعانىن كىم كورىپتى؟! تاقىر جوندا بەسىكتە جاتقان بالانىڭ قوس قولى جوق. اللا-اۋ, نە كۇيگە دۋشار ەتكەن؟! قۇنداعى اعىتۋلى بەسىكتىڭ. اناسى قايدا بالانىڭ؟ بەسىكتىڭ باسىندا اق بايلامى تۇر, اناسى جوق. قۇنداقسىز بەسىكتەن بالا قۇلاپ كەتپەي مە بۇل دەيسىڭ. ايتارعا اۋىز بارمايدى. اناۋ ايتاقىر ارقانىڭ دالاسى, ءشوپسىز, شالعىنسىز بولماۋشى ەدى بۇل دالا. كوز ۇشىندا قاراۋىتقان تاۋلارعا ۇلاسقانشا ءبىر جىلت ەتكەن جىلۋ ۇيىرسەشى كوزگە. جوق. انادايدا الىستا جۋساعان قوس جىلقى, ولار دا جايىمەن جۋساعان جانۋارعا ۇقساسا جارار ەدى-اۋ. ارتى ءبۇرىسىپ, الدى قاۋىپ كۇتىپ, قالشيىپ, قۇلاق تىگىپ قاراپ تۇرعان جىلقىنىڭ باس ءبىتىسىن اڭعارتادى. بۇلىڭعىر كۇننىڭ استىندا بولماشى شۋاق جوق, بىراق تاقىر ۇستىمەن قوڭىرقاي سارعىشتانىپ كوشكەن قويۋ جالقىن كوشىپ جاتىر-اۋ. بۇل نە گاپ؟ الگى كوشكەن ساپ-سارى, كەي تۇسى قوڭىرقاي جالقىن كوڭىلدى تىپتەن كۇپتى ەتىپ بارىپ, ءاربىر جەردەن الاباجاقتانادى. كۇلدىبادام كۇن استىنداعى الگى بالا ءتىرى مە, قايدام؟! تىپتەن ونى ويلاۋدىڭ ءوزى وپىندىرىپ جىبەرەر ەدى. ال كارىپبەك قولسىز تۋعانىن كورگەن اناسى شوشىعاننان ءۇش كۇن بويى باۋىرىنا باسپاي قويعانى ودان دا ۇرەيلى قۇبىلىس شىعار…
قاسىرەتتىڭ بۇعاۋى
حاميت ەرعاليەۆتىڭ قايعىلى انا تاقىرىبىنداعى پوەماسىن مىنا سۋرەتتەن سوڭ وقىماسا دا بولعانداي. ۇرەي شاقىرادى بۇل سۋرەت. كوز توقتاتا قاراپ تۇرساڭىز, اللاعا جالبارىندىرادى. «بەتىن اۋلاق قىلا گور مۇندايدىڭ» دەگىزەدى. ءبىر ءسابيى قارا جولدىڭ بەتىندە قالىپتى ايەلدىڭ. شاماسى, ءولى تۋعان. سەبەبى اللا كوكتەن بالا بەرمەك بولسا دا قابىلداعىسى جوق. كوك دەيمىن-اۋ, اسپان جانىپ تۇرعان ءورت – ءتىلسىز جاۋعا ۇقساعان مۇندا. قاسىرەتتىڭ قارا تۇمانىنا باتقان ايەل كوكتەن ءۇمىتسىز. اسپان قىپ-قىزىل ورتتەي ۇرەي شاشقاندا, ايەل سۇيەنگەن ىرگە قاراۋىتىپ كەتكەن. كەلىنشەككە بولماشى عانا جارىق بالا جاقتان تۇسكەنىمەن, قايعىدان زاپى بولعان زارلىق جاننىڭ زاۋقى سوقپايدى. الدە كوكتەن بولماشى جارىق سەپكەن جەردە جاتقان بالانىڭ جانى ما ەكەن, كىم ءبىلىپتى؟ قالاي جورىسا دا, ۇمىتسىزدىك ۇرەي كىندىگىنە اكەپ بايلاي بەرەدى, بايلاي بەرەدى. ايەلگە قاراپ بالانى ايايسىڭ, بالاعا قاراپ ايەلدى ايايسىڭ. سويتە تۇرا, جەر بەتىنە زاۋال توككەن اتومدى قارعايسىڭ!