ارالاس جەكپە-جەكتەن الەمدەگى ەڭ بەلدى ۇيىم – UFC-ءدىڭ جاڭارتىلعان رەيتينگىندەگى توپ-15 سپورتشىنىڭ تىزىمىنەن قازاقتىڭ ەكى بىردەي سپورتشىسىنىڭ ەسىمدەرىن كەزىكتىردىك. ولار – شاۆقات راحمونوۆ پەن دامير يسماعۇلوۆ.
قازىرگى كەزدە قوس قانداسىمىزدىڭ دا اياقالىسى وتە جاقسى. اسىرەسە شاۆقات راحمونوۆتىڭ قارقىنى قۋانتادى. 27 جاستاعى سپورتشىمىز ارالاس جەكپە-جەك جارىستارىندا كۇش سىناسىپ جۇرگەن سەگىز جىلعا جۋىق ۋاقىت ارالىعىندا 16 كەزدەسۋ وتكىزىپ, بارلىعىندا ايقىن جەڭىسكە قول جەتكىزدى. سول باسەكەلەردىڭ تەڭ جارتىسىندا قارسىلاستارىن ۇرىپ جانە تەۋىپ قۇلاتسا, قالعانىن سابمينش ادىسىمەن ۇتتى. راحمونوۆ توعىز جەكپە-جەكتى ءبىرىنشى راۋندتا-اق اياقتاسا, التى ايقاس ەكىنشى كەزەڭدە توقتاتىلدى. قازاقتىڭ ءور مىنەزدى ۇلىمەن تەك ءبىر عانا فايتەردىڭ ءۇش راۋند جۇدىرىقتاسۋعا شاماسى جەتتى. ول – تاجىكستاندىق فارۋدين اديلوۆ. بىراق تاجىك تە وڭباي تاياق جەپ, اقىرىندا جەڭىلگەنىن مويىندادى. ءدال وسىنداي كورسەتكىشىمەن ماقتانا الاتىن سپورتشىلار جەر-جاھاندا كەمدە-كەم.
UFC-دە شاۆقات ءتورت جەكپە-جەك وتكىزىپ, بارلىعىندا ايقىن باسىمدىق تانىتتى. سونىڭ ارقاسىندا قازىرگى كەزدە ول جارتىلاي ورتا سالماقتاعىلاردىڭ رەيتينگىندە 11-ورىندى يەلەنۋدە. ەندى ءبىر-ەكى باسەكەدە جەڭىسكە جەتسە, ۇزدىكتەر ءتىزىمىنىڭ الدىڭعى لەگىنە شىعاتىنى انىق. ءتىپتى چەمپيوندىق بەلبەۋ ءۇشىن تالاسۋى دا مۇمكىن. بىراق بۇل سالماقتاعى مىقتىلاردىڭ كوبىنىڭ قازاق فايتەرىمەن كۇش سىناسۋعا جۇرەكتەرى داۋالامايدى. ماسەلەن, وسىدان ءبىراز ۋاقىت بۇرىن راحمونوۆ ستيۆەن تومپسونمەن كەزدەسۋگە ءتيىس ەدى. الايدا رەيتينگتە جەتىنشى ورىندا تۇرعان امەريكالىق ءاپايتوس ءبىزدىڭ جىگىتپەن جۇدىرىقتاسۋدان ءۇزىلدى-كەسىلدى باس تارتتى. اقش-تىڭ توپ-10-دىقتاعى تاعى ءبىر وكىلى شون برەديگە دە ۇسىنىس تۇسكەندە ول دا ات-تونىن الا قاشتى.
قايسارلىق قازاقتىڭ قانىندا بار. ءدال قازىر شاۆقاتتى كىممەن شىعارسا دا ونىڭ ايانباي ايقاساتىنى انىق. ءتىپتى وسى سالماقتىڭ چەمپيونى, 31 جاستاعى ۇلىبريتانيالىق لەون ەدۆارس نەمەسە تاياۋدا عانا تۇعىردان تايعانىنا قاراماستان رەيتينگتە ءبىرىنشى ورىندا تۇرعان 35 جاستاعى امەريكالىق كامارۋ ۋسمانمەن دە جەكپە-جەككە شىعۋدان باس تارتپايدى. بىراق ولاردىڭ كەلىسە قويۋى ەكىتالاي. ويتكەنى قازىرگى كەزدە ەكەۋىنىڭ دە داڭقى دۇركىرەپ تۇر. ەگەر UFC-ءدىڭ باسشىلارى «مىندەتتى تۇردە مىنامەن جۇدىرىقتاساسىڭ» دەپ قاتاڭ تالاپ قويماسا, ەدۆارس پەن ۋسماننىڭ تاۋەكەلگە بارا قويماسى انىق. ولار ءۇشىن اقشادان گورى ابىروي قىمبات.
رەيتينگتە ەكىنشى جانە ءۇشىنشى ورىنداردا تۇرعان كولبي كوۆينگتون مەن حامزات چيماەۆتىڭ دا تەگەۋرىندەرى وتە كۇشتى. 34 جاستاعى اقش سپورتشىسى 20 كەزدەسۋدىڭ ۇشەۋىندە عانا جەڭىلدى. شۆەتسيانىڭ تۋى استىندا ونەر كورسەتەتىن 28 جاستاعى چەشەن جىگىتى 12 باسەكەنىڭ بارلىعىندا باسىمدىق تانىتىپ, 11-ءىن مەرزىمىنەن بۇرىن اياقتادى. ول دا ءدال شاۆقات سەكىلدى قارسىلاستارىن قوعاداي جاپىرىپ كەلەدى. حامزاتتىڭ ەكپىندى شابۋىلىنا گيلبەرت بەرنس قانا شىداس بەردى. اسا شيەلەنىستى باسەكەدە برازيليانىڭ بەتكەۇستارى شۆەتسيالىق فايتەردەن ۇپاي سانىمەن عانا ۇتىلدى. سول سەبەپتى دە سان ميلليون جانكۇيەر كۇنى بۇگىنگە دەيىن ەشكىمنەن جەڭىلمەگەن راحمونوۆ پەن چيماەۆتىڭ ايقاسىن كورۋگە ايرىقشا ق ۇلىقتى. بىراق UFC-ءدىڭ ءوز ەسەبى بار. ولار ەكەۋىن توبەلەستىرۋگە اسىعاتىن ەمەس. اتالعان پروموۋشەننىڭ باسشىسى دانا ۋايت: «بۇل ءبىر كەرەمەت جەكپە-جەكە بولاتىنى انىق. بىراق, اسىقپاڭىزدار. ءالى ۋاقىتى كەلەدى», دەپ ەل-جۇرتتى ودان ارمەن قىزىقتىرىپ قويدى.
رەسەيدىڭ ورىنبور وبلىسىندا تۋىپ-وسكەن 31 جاستاعى دامير يسماعۇلوۆتىڭ دا وسى سپورت ءتۇرىن سەرىك ەتكەلى سەگىز جىلعا جۋىقتادى. 2015 جىلى ول ينگۋشەتيانىڭ نازران قالاسىندا وتكەن جارىستا جەرگىلىكتى سپورتشى رامازان ەسەنباەۆقا ۇپاي سانىمەن ەسە جىبەرگەن ەدى. بۇل – يسماعۇلوۆتىڭ كارەراسىنداعى جالعىز جەڭىلىس. ال ول قالعان 24 جەكپە-جەكتىڭ بارلىعىندا جەڭىسكە جەتتى. 13 باسەكەدە ايقىن باسىمدىق تانىتتى. قانداسىمىز UFC-دە 2018 جىلدىڭ جەلتوقسان ايىنان باستاپ ونەر كورسەتۋدە. سول ارالىقتا بەس كەزدەسۋ وتكىزىپ, بارلىعىندا ۇپاي سانىمەن جەڭىس تويىن تويلادى. دامير كۇنى كەشە عانا جەڭىل سالماقتىلاردىڭ رەيتينگىندە بىردەن ءۇش ساتىعا جوعارىلاپ, بۇگىندە 12-ورىندى يەلەنۋدە.
قازاق فايتەرى كۇش سىناسىپ جۇرگەن سالماقتا كىل مىقتىلار جينالعان. چارلز وليۆەيرا (برازيليا), داستين پورە (اقش), دجاستين گەيدجي (اقش), يسلام ماحاچەۆ (رەسەي), مايكل چەندلەر (اقش) جانە بەنەيل داريۋشتىڭ (يران) قاي-قايسىسىن الساڭىز دا, ناعىز دۇلەي كۇش يەلەرى. بارلىعىنىڭ دا داڭقى ورلەپ, اتاقتارى الىسقا جايىلعان.
سول تىزىمدە جەتىنشى ورىندا تۇرعان رافاەل فيزيەۆتىڭ دە قارقىنى وتە كۇشتى. بۇل كۇندەرى ازەربايجاننىڭ تۋى استىندا ونەر كورسەتىپ جۇرگەن 29 جاستاعى مۋاي-تايدىڭ حاس شەبەرى قازاقستاندا دۇنيەگە كەلدى. كەيىننەن ۇزاق ۋاقىت بويى قىرعىزستاندا تۇردى. سونداي-اق رافاەل دوس انوس (برازيليا), ماتەۋش گامروت (پولشا), ارمان تسارۋكيان (رەسەي) جانە كونور ماكگرەگور (يرلانديا) سىندى مىقتىلار UFC رەيتينگىندە ءبىزدىڭ دامير يسماعۇلوۆتىڭ الدىن وراپ تۇر.
مىنە, بۇگىنگى تاڭدا ارالاس جەكپە-جەكتى سەرىك ەتكەن ساڭلاقتارىمىزدىڭ اراسىنداعى ەڭ مىقتىلارى وسىلار. UFC-دە شاۆقات پەن داميردەن بولەك, جالعاس جۇماعۇلوۆ, سەرگەي موروزوۆ, ماريا اگاپوۆا جانە قىتايدا تۋىپ-وسكەن ءبىر-ەكى قانداسىمىز بار. سونداي-اق جەرلەستەرىمىز ACA, ON FC جانە تاعى باسقا بەلدى ۇيىمداردا تابىستى ونەر كورسەتىپ ءجۇر. ولاردىڭ دا ەرتەڭگى كۇنى الەمنىڭ ەڭ بەلدى پروموۋشەنىندە كۇش سىناساتىنى انىق. سوندىقتان دا قازاق جىگىتتەرىنىڭ اتوي سالاتىن كۇندەرى الدا دەپ نىق سەنىممەن ايتا الامىز.