استانا. 16 مامىر. مەملەكەت باسشىسىنا وڭتۇستىك قازاقستان وبلىسىندا اتقارىلىپ جاتقان يگى ىستەر تانىستىرىلدى. بۇل تۋرالى akorda.kz حابارلادى.
ساپار بارىسىندا سارىاعاش اۋدانىنداعى «بيو سەمەنا» جشس-نا بارعان نۇرسۇلتان نازارباەۆقا وڭىردەگى اۋىل شارۋاشىلىعىنىڭ احۋالى مەن ونى دامىتۋ پەرسپەكتيۆالارى جونىندە اقپارات بەرىلدى. سونداي-اق, پرەزيدەنت كوكونىستەر تۇقىمىن جانە كوشەنى بەزەندىرۋگە ارنالعان اعاش كوشەتتەرىن ءوسىرۋ ءىسىن كوردى. سونداي-اق, ول اۋىل شارۋاشىلىعى تاۋارلارىن وندىرۋشىلەرمەن جانە سارىاعاش اۋدانىنىڭ جۇرتشىلىعى وكىلدەرىمەن اڭگىمەلەستى.
«بيو سەمەنا» جشس باعى ەگىستىگىنىڭ جالپى كولەمى 60 گەكتار, ونىڭ 27 گەكتارىن كوشە بەزەندىرۋگە ارنالعان اعاشتار الىپ جاتىر, 33 گەكتارى تۇقىمدىق ەگىستىككە تيەسىلى. بۇگىنگە دەيىن كاسىپورىن 250 جۇمىس ورنىن اشقان.
بۇدان كەيىن ول شىمكەنت قالاسىنداعى «بال تەكستيل» جشس-نىڭ كىلەم جانە كىلەم بۇيىمدارىن شىعاراتىن فابريكاسىنا كەلدى.
بۇل جەردە مەملەكەت باسشىسىنا «وڭتۇستىك» ارنايى ەكونوميكالىق ايماعى اۋماعىنداعى جوبالاردىڭ جۇزەگە اسىرىلۋ بارىسى جانە اتالعان فابريكانىڭ توقىما جانە تىگىن جەلىسى تەحنولوگيالىق پروتسەسى باياندالدى.
«بال تەكستيل» جشس – وڭىردەگى كىلەم جانە كىلەم بۇيىمدارىن شىعاراتىن العاشقى فابريكا. جوبانى جۇزەگە اسىرۋ بارىسىندا 700 جۇمىس ورنىن اشۋ كوزدەلىپ وتىر.
نۇرسۇلتان نازارباەۆقا مۇنداعى تەحنيكالىق جابدىقتار جايلى ماقتانىشپەن ايتىلدى. بەلگيالىق كومپانيا شىعارعان قۇرىلعىلار ەلىمىزدىڭ باسقا ەش جەرىندە جوق كورىنەدى.
سونىمەن قاتار, نۇرسۇلتان نازارباەۆ شىمكەنتتەگى №3 ەمحانا ۇجىمىمەن كەزدەستى. ەمحانادا پرەزيدەنتكە وبلىستاعى دەنساۋلىق ساقتاۋ سالاسىنىڭ نەگىزگى كورسەتكىشتەرى, سونىڭ ىشىندە جاڭا تەحنولوگيالاردى ەنگىزۋ ۇدەرىسى حابارلاندى. ءبىر اۋىسىمدا 500 ادامدى قابىلداي الاتىن №3 ەمحانا «100 مەكتەپ, 100 اۋرۋحانا» جوباسى اياسىندا سالىنعان. ول دياگنوستيكانىڭ ساۋلەلىك, فۋنكتسيونالدىق, ەندوسكوپيالىق, بيوحيميالىق جانە يممۋنولوگيالىق تۇرلەرىن قامتيتىن جاڭا دياگنوستيكالىق قۇرىلعىمەن جابدىقتالعان.
مەملەكەت باسشىسى: «وبلىستىڭ الەۋمەتتىك نىساندارىن دامىتۋعا كوپ قاراجات بولىنۋدە. مەملەكەتتىڭ دەنساۋلىق ساقتاۋ سالاسىنا ۇلكەن قامقورلىعى ارقاسىندا وڭتۇستىك قازاقستان حالقىنىڭ ءومىر جاسى 3 جىلعا ۇزارىپ, 71 جاسقا جەتتى. بۇل - ەڭ باستى جەتىستىك. انا مەن بالا ءولىمى كۇرت ازايدى», - دەدى.
ساپار بارىسىندا شىمكەنتتەگى «كورمە ورتالىعىنا» بارعان پرەزيدەنت وڭتۇستىك قازاقستان وبلىسىنىڭ كاسىپكەرلەرىمەن كەزدەستى. كورمە ورتالىعىندا ول شىمكەنت قالاسىنىڭ جاڭا اكىمشىلىك ورتالىعى قۇرىلىسى جوباسىمەن جانە وڭتۇستىك قازاقستان وبلىسىنداعى كاسىپورىندار تاۋارلارىنىڭ وڭىرلىك كورمەسىنە قويىلعان ونىمدەرمەن تانىستى.
نۇرسۇلتان نازارباەۆ: «قالادا دا, وبلىستا دا كوپ جۇمىس ىستەلىپ جاتىر. وڭىردەگى تاۋار ونىمدىلىگىنىڭ قارقىنى وتە جاقسى. ول 3 جىل ىشىندە ەكى ەسە ءوستى. وبلىستا اۋىل شارۋاشىلىعىن دامىتۋ ءۇشىن ايتارلىقتاي الەۋەت جانە قولايلى كليماتتىق جاعداي بار», – دەدى.
بۇعان قوسا, پرەزيدەنتى وبلىس اۋماعى ارقىلى وتەتىن «باتىس قىتاي - باتىس ەۋروپا» اۆتوكولىك جولى, تەمىرجول جانە قۇبىر ماگيسترالدەرىن قامتيتىن دامىعان كولىك جۇيەسى بيزنەسكە قوسىمشا جاعدايلار تۋدىراتىنىن اتاپ ءوتتى.
سونىمەن قاتار, مەملەكەت باسشىسى وڭىردەگى بىرقاتار پروبلەمالارعا, اتاپ ايتقاندا, كەيبىر جاڭا وندىرىستەردىڭ توقتاپ قالۋى مەن مەكتەپتەردەگى ورىن جەتىسپەۋشىلىگى ماسەلەلەرىنە دە توقتالدى.
كەزدەسۋ كەزىندە وڭتۇستىك قازاقستان وبلىسىنىڭ اكىمى اسقار مىرزاحمەتوۆ ءوڭىردىڭ الەۋمەتتىك-ەكونوميكالىق دامۋى تۋرالى بايانداما جاسادى.
جولدىباي بازار.
دەرەككوز: akorda.kz.
فوتو: Facebook.com.