24 قىركۇيەكتە ماسكەۋدە بىرنەشە مەملەكەتتەن كەلگەن كاسىپقوي بوكسشىلاردىڭ قاتىسۋىمەن ءىرى حالىقارالىق جارىس ۇيىمداستىرىلادى.
كەشتىڭ باستى باسەكەسىندە ارالاس جەكپە-جەكتىڭ حاس شەبەرلەرى الەكساندر ەمەليانەنكو مەن ۆياچەسلاۆ داتسيك كۇش سىناسادى. رەسەيدىڭ اتىشۋلى قوس الىبى بۇل جولى بوكس ەرەجەسى بويىنشا سايىسقا تۇسەدى. وسى جارىستا قازاقستاندىق ءالي بالوەۆ تا ءوز ونەرىن ورتاعا سالادى. اسا اۋىر سالماقتا كۇش سىناسىپ جۇرگەن 29 جاستاعى الماتىنىڭ تۋماسى كەزىندە اۋەسقويلار رينگىندە ءبىراز تابىسقا قول جەتكىزدى. كەيىننەن ساعاتبەك مۇساحانوۆتىڭ شاكىرتى كاسىپقويلار اراسىندا كۇش سىناسۋعا بەل بۋدى. بەس جىلدان اسا ۋاقىت ارالىعىندا 10 كەزدەسۋ وتكىزگەن ول بارلىعىندا باسىمدىق تانىتتى. جەتى قارسىلاسىن ەسىنەن تاندىردى.
Hardcore Boxing كەشەنىندە ءالي رەسەيلىك كۋرەيش ساگوۆپەن ايقاسادى. 31 جاستاعى ينگۋش جىگىتى ءوزىنىڭ سەگىز كەزدەسۋىنىڭ التاۋىندا جەڭىسكە جەتىپ, ەكى باسەكەنى مەرزىمىنەن بۇرىن اياقتادى.