سلوۆەنيانىڭ پورتوروجە قالاسىندا جۇلدە قورى 203 024 ەۋرونى قۇرايتىن حالىقارالىق تۋرنير باستالدى. بۇل جارىستا ەلەنا رىباكينا دا باق سىناۋدا.
قازاقستاننىڭ ءبىرىنشى راكەتكاسى تۇساۋكەسەر كەزدەسۋىندە لاۋرا زيگەمۋندپەن شەبەرلىك بايقاستى. 34 جاستاعى گەرمانيانىڭ وكىلى قازىرگى كەزدە الەمدىك رەيتينگتە 173-ورىندى قاناعات تۇتۋدا. كەزىندە ول رولان گارروستىڭ شيرەك فينالىندا ويناپ, توپ-30 تەننيسشىنىڭ قاتارىنا ەنگەن ەدى. 3 ساعات 25 مينۋتقا سوزىلعان بۇل تارتىستا رىباكينا 6:7, 6:4, 7:6 ەسەبىمەن جەڭىسكە جەتتى. ەكىنشى كەزەڭدە جەرلەسىمىز تەرەزا مارتينتسوۆامەن كەزدەسەدى. 27 جاستاعى چەحيالىق ويىنشى WTA تىزىمىندە 66-ورىندى يەلەنگەن.
سلوۆەنياداعى تۋرنيردە ەلەنا رىباكينادان بولەك, ۇلىبريتانيالىق ەممۋ رادۋكانۋ, چەحيالىق كاتەرجينا سينياكوۆا, ۋكراينالىق لەسيا تسۋرەنكو, اۋستراليالىق ايلا تومليانوۆيچ جانە برازيليالىق بەاتريس حادداد-مايا سىندى تانىمال تەننيسشىلەر ونەر كورسەتۋدە.