استانا. 15 مامىر. پاۆلودار وبلىسى اقسۋ اۋدانىنداعى ەۆگەنەۆكا اۋىلىندا 14 جاسار اناستاسيا شاريپوۆانى ايۋاندىقپەن ولتىرگەن ۆيكتور باحارەۆ 25 جىلعا سوتتالدى. بۇل تۋرالى Tengrinews.kz ءتىلشىسى حابارلادى.
كەشە وتكەن القا بيلەر سوتى ونى ءجاسوسپىرىم مەكتەپ وقۋشىسىن ءولتىرىپ, زورلادى دەگەن تۇجىرىمعا توقتادى.
«سوتتىڭ شەشىمىمەن ۆيكتور باحارەۆ 25 جىل مەرزىمگە باس بوستاندىعىنان ايىرىلدى», - دەدى سۋديا قادىربەك ساتاباەۆ. قىلمىسكەر مەرزىمىن قاتاڭ رەجىمدەگى كولونيادا وتەيتىن بولادى. بۇعان قوسا, سوتتاۋشى ءوزى ولتىرگەن قىزدىڭ وتباسىنا 2 ملن. تەڭگە كولەمىندە وتەماقى تولەيدى. وسىلايشا سوت ايىپتاۋدى تولىق ماقۇلداپ شىقتى.
ايىپتالۋشىنىڭ قورعاۋشىسى باۋىرجان ازانوۆتىڭ ايتۋىنا قاراعاندا, قايتىس بولعان قىزدىڭ شەشەسى قىلمىسكەردى ءولىم جازاسىنا كەسۋدى سۇراعان. ال ۆيكتور باحارەۆتان سوڭعى ءسوزىن ايتۋدى سۇراعاندا, ول ناستيا شاريپوۆانى ولتىرمەگەنىن ايتىپ, كىناسىن مويىننا الماعان.
بۇعان دەيىن حابارلانعانداي, باحارەۆكە قاتىستى سوت پروتسەسى بيىلعى جىلدىڭ اقپان ايىندا باستالدى. ايىپتالۋشىنى ازانوۆپەن بىرگە ونىڭ اپكەسى انتونينا زۆەرەۆا دا قورعادى.
ەسكە سالا كەتەيىك, 2013 جىلى 21 قازاندا ەۆگەنەۆكا اۋىلىنداعى ورتا مەكتەپتىڭ 14 جاسار وقۋشىسى اناستاسيا شاريپوۆا مەكتەپتەن شىعىپ, ۇيىنە قايتىپ بارا جاتقان جولدا جوعالىپ كەتكەن. ارادا ەكى اپتا وتكەندە, 3 قاراشا كۇنى قىزدىڭ ءمايىتى ءوزى تۇراتىن ۇيدەن 250 مەتر قاشىقتاعى شۇڭقىردان شىققان. ال 6 قاراشادا پوليتسەيلەر كىسى ولىمىنە قاتىسى بار دەگەن كۇدىكپەن سول اۋىلدا تۇراتىن 20 جاسار ۆيكتور باحارەۆتى قامادى.
تەرگەۋ بارىسى كورسەتكەندەي, قىزدىڭ تابىلعانى جونىندە مالىمەت تاراعاندا, ول الدىمەن اسىلىپ ولمەكشى بولىپ, ارتىنشا قاشىپ كەتۋگە ارەكەت جاساعان. ۆيكتور باحارەۆتى ۇستاعاندا, ول ىستەگەن قىلمىسىن مويىنداعان. وعان ادام ءولتىردى جانە زورلادى دەگەن ايىپ تاعىلدى. الايدا, باحارەۆتىڭ تۋىستارى ونىڭ كىسى ولتىرگەنىنە سەنبەيتىنىن, قىسىم بولعاننان كەيىن عانا كىنانى ءوز موينىنا العانىن ايتقان. ونىڭ بۇل قىلمىسقا قاتىسى بارىن دنق قورىتىندىلارى دالەلدەپ بەرگەن.
قۇرىش نۇرىمبەت.
دەرەككوز: Tengrinews.kz.
فوتو: Tengrinews.kz.