تۇركىستان وبلىسىندا براكونەرلەردەن ءجۇز كەلىگە جۋىق بالىق تاركىلەندى

شاردارا اۋداندىق پوليتسيا ءبولىمىنىڭ پوليتسەيلەرى كەزەكتى رەيد بارىسىندا شاردارا سۋ قويماسىندا گارپۋندى پايدالانىپ زاڭسىز بالىق اۋلاعان ەكى جەرگىلىكتى تۇرعىندى انىقتادى. براكونەرلەردەن 100 كەلىگە جۋىق بالىق, 3 گارپۋن جانە 2 سۇڭگۋىر كوستيۋمى تاركىلەندى. بۇل دەرەك قازاقستان رەسپۋبليكاسى قىلمىستىق كودەكسىنىڭ 335-بابى «بالىق رەسۋرستارىن, باسقا دا سۋ جانۋارلارىن نەمەسە وسىمدىكتەرىن زاڭسىز ءوندىرۋ» بويىنشا تىركەلدى.

«جىل باسىنان بەرى وبلىستا بارلىعى 32 ەكولوگيالىق قىلمىس جاسالعان. ولاردىڭ ىشىندە بالىق اۋلاۋ, جەر قويناۋىن رۇقساتسىز پايدالانۋ, وسىمدىكتەر مەن جانۋارلاردىڭ سيرەك تۇرلەرىن زاڭسىز اۋلاۋ جانە ءوندىرۋ جاتادى. پوليتسيا قىزمەتكەرلەرى زاڭسىز بالىق اۋلاۋعا قاتىستى 18 قىلمىستىڭ جولىن كەستى, ونىڭ ىشىندە 14 ءىس سوتقا جولداندى», دەپ حابارلادى تۇركىستان وبلىسىنىڭ پوليتسيا دەپارتامەنتى.

سونداي-اق براكونەرلەردەن 3 تونناعا جۋىق زاڭسىز اۋلانعان بالىق, 33 قايىق, 4 بورتتىق موتور جانە زاڭسىز بالىق اۋلاۋعا ارنالعان 44 ءتۇرلى قۇرال تاركىلەندى.