قازاق حالقى ءاۋ باستان «كەلىنى جاقسىنىڭ كەرەگەسى التىن» دەپ بوساعادان اتتاعان جاۋلىقتى جاننىڭ تاربيەسى مەن كورگەن-تۇيگەنىنە ءمان بەرگەن. عاسىرلاردان كەلە جاتقان وسى ءۇردىس بۇگىن دە ءوز ماڭىزدىلىعىن جويعان جوق. وعان كوكسۋ اۋدانىنىڭ مامبەت اۋىلىندا وتكەن كەلىندەر سايىسى تاعى ءبىر رەت دالەل بولدى.
سايىسقا وتباسىنىڭ كوركىن كەلتىرىپ, جان-جاقتىلىعىمەن تانىلىپ جۇرگەن كەلىندەر قاتىسىپ, باق سىنادى. ءىس-شارا بارلىق سانيتارلىق تالاپتى ساقتاي وتىرىپ وتكىزىلدى.
قازاقتىڭ ادەت-عۇرپىن قۇرمەتتەپ, سالت-ءداستۇرىن بەرىك ۇستاناتىن يناباتتى قازاق كەلىندەرىن دارىپتەۋ ماقساتىندا ۇيىمداستىرىلعان بايقاۋدا 25-35 جاس ارالىعىنداعى شەبەر دە پىسىق 10 كەلىن باق سىنادى.
قازاق كەلىنى قاي كەزدەن دە وتباسىنىڭ بەرەكەسىن كەلتىرىپ, تاتۋلىعىن بەكەمدەي بىلگەن. ءار ءۇيدىڭ ونەرلى كەلىندەرى وزدەرىنىڭ شىققان تەگى مەن تۇسكەن شاڭىراعىنان ماعلۇمات بەرىپ تانىستىرعان بولسا, سايىستا وزدەرىنىڭ ونەرلەرىن ورتاعا سالدى. قازاقى داستارقانىن جايناتىپ, سالت-داستۇرگە قاتىستى سۇراقتارعا مۇدىرمەي جاۋاپ بەردى.
«وتان وتباسىنان باستالادى, وتباسىندا بالا قانداي تاربيە السا, وسكەندە سونداي بولادى, دۇرىس تاربيە السا, دۇرىس تاربيەلى, ءبىلىمدى, ەلىنە جاناشىر بولادى, ال بۇرىس تاربيە السا, قانداي بولاتىنى ايتپاسا دا تۇسىنىكتى. وسىنداي اۋىز بىرلىكتە, ۇيىمشىلدىقتا, بەرەكەدە ءومىر ءسۇرىپ, ەلىمىز بەن جەرىمىزدىڭ گۇلدەنۋىنە ايانباي ەڭبەك ەتەيىك», دەدى كوكسۋ اۋدانىنىڭ اكىمى مارلەن كولباەۆ.
جان-جاقتى دايىندىعىمەن كەلگەن كەلىندەر وزدەرىنىڭ ەرەكشەلىكتەرىمەن تانىلىپ, كوپتىڭ كوڭىلىنەن شىقتى. سايىس قورىتىندىسى بويىنشا باس جۇلدەنى لاباسى اۋىلىنىڭ كەلىنى ۇلار جىلقىباەۆا, 1-ورىندى مۇسابەك اۋىلىنىڭ كەلىنى ءاليا ارىستان, 2-ورىندى قابليسا اۋىلىنىڭ كەلىنى شىنار جۇماعالي, 3-ورىندى جارلىوزەك اۋىلىنىڭ كەلىنى جاننا قاليساقاروۆا جەڭىپ الدى.
سايىس سوڭىندا 9 بالا تاربيەلەپ وتىرعان گۇلزيرا بەكتەمىسوۆاعا اۋداننىڭ جاناشىر ازاماتتارى ءۇيدىڭ كىلتىن سىيلادى.
جەتىسۋ وبلىسى