قازاقستان QR-كودتاردىڭ بىرىڭعاي بانك جۇيەسىنە كوشەدى. بۇل تۋرالى ەلىمىزدىڭ باس قالاسىندا وتكەن e-commerce Day فورۋمىندا حابارلاندى. ساۋدا جانە ينتەگراتسيا ۆيتسە-ءمينيسترى اسەل جاناسوۆانىڭ ايتۋىنشا, 2021 جىلى ۆەدومستۆو وسى ماسەلە بويىنشا جۇمىس ىستەگەن. جوبا تولىق ىسكە قوسىلعان جاعدايدا كليەنتتەر ساتىپ الۋ اقىسىن بارلىق قازاقستاندىق بانكتەرمەن جۇمىس ىستەيتىن بىرىڭعاي تەرمينالدار ارقىلى تولەي الادى.
ء«سىز كىمنىڭ كليەنتىسىز دەگەن ماسەلە ماڭىزدى ەمەس. QR بار – كەز كەلگەن بانك ءبىر-ءبىرىن وقي الۋعا ءتيىس. ونداي جاعدايدا ون شاقتى POS-تەرمينال ۇستاپ, ءار تەرمينالدى جەكە-جەكە پايدالانىپ جاتۋدىڭ قاجەتى بولماي قالادى. بيزنەستىڭ قولىندا ءبىر عانا تەرمينال بولادى جانە بۇل بۇكىل بانكپەن جۇمىس ىستەيتىن بولادى. ءبىز وسىعان تالپىنۋىمىز كەرەك. بيىل بارلىق بانك ءوز جۇيەسىن جەتىلدىرەدى جانە ءاربىر ازاماتتا كەز كەلگەن QR تەرمينالى ارقىلى تولەمدەردى قابىلداۋ, تولەۋ مۇمكىندىگى بولادى دەپ سەنەمىن», دەدى حالىقارالىق فورۋمدا ءا.جاناسوۆا.
ستاتيستيكا بويىنشا وسىدان ءۇش جىل بۇرىن, ياعني, 2019 جىلى بولشەك ساۋداداعى ونلاين-ساۋدا ۇلەسى 3,7 پايىز بولسا, قازىر ول 9,6 پايىزعا جەتكەن. بۇل رەتتە تاۋار مەن قىزمەت اقىسىن QR-كود ارقىلى تولەۋ تانىمال ترەندكە اينالىپ جاتىر.
«QR كومەگىمەن تولەم جاساۋدا Kaspi Bank ءسوزسىز جەتەكشى بولىپ تۇر. الايدا مەملەكەت بۇل سالانى ءوز قولىنا الىپ, ءبىر جۇيەگە كەلتىرۋگە بەل بۋعان كورىنەدى. ساتىپ الۋشىلار تۇرعىسىنان قاراعاندا بۇل جۇيە ىڭعايلى. ويتكەنى كەز كەلگەن بانك قوسىمشاسىنىڭ كومەگىمەن تولەۋ مۇمكىندىگى تۋادى. بىراق بانكتەردىڭ ءوزى ءۇشىن بۇل اسا قولايلى ەمەس. ولار ورتاق جۇيەنى پايدالانعانى ءۇشىن پايىز تولەيتىن بولادى. ال ءوز جۇيەلەرىندە تەگىن جۇمىس ىستەۋشى ەدى. Kaspi مينۋستا قالدى. ول وسى تەحنولوگيانى ويلاپ تاۋىپ, ەنگىزدى. ەندى بۇل جۇيە ءبارى ءۇشىن ورتاق ەتىلمەك. ياعني حالىققا كومەكتەسەمىز دەگەن جەلەۋمەن ۇكىمەت تاعى دا اقشا تابۋدىڭ جولىن قاراستىرماق», دەپ جازادى تەلەگرامداعى marketanatomy كانالى.
بۇعان دەيىن ۇلتتىق بانك ءارتۇرلى بانكتەردىڭ كليەنتتەرى اراسىندا جەدەل اۋدارىمدار مەن تولەمدەر ءۇشىن جەدەل تولەم جۇيەسىنىڭ جاڭارتىلعان پلاتفورماسىن ەنگىزەتىنىن حابارلاعان ەدى. اتالعان جۇيە بۇكىل بانكتىڭ كليەنتتەرى ءۇشىن قولجەتىمدى بولادى. ءتۇرلى بانكتەردىڭ كليەنتتەرى اراسىنداعى اۋدارىمداردى ۇيالى تەلەفون ءنومىرى ارقىلى, ال تولەمدەردى QR كود ارقىلى جۇزەگە اسىرۋعا بولادى.