يسپانيانىڭ سەۆيليا قالاسىندا جالاۋى جەلبىرەگەن حالىقارالىق ءتۋرنيردىڭ شيرەك فينالىندا قازاقستاندىق تەننيسشى تيموفەي سكاتوۆ ەجي يانوۆيچتەن ايلاسىن اسىردى.
ەكى ساعاتقا جۋىق ۋاقىتقا سوزىلعان سايىس 6:3, 6:2 ەسەبىمەن اياقتالدى. بۇل – سكاتوۆتىڭ سپورتتىق كارەراسىنداعى ەڭ ەلەۋلى جەڭىس. ولاي دەۋگە نەگىز, 31 جاستاعى پولشانىڭ وكىلى كەزىندە ۋيمبلدون ءتۋرنيرىنىڭ جارتىلاي فينالىندا ويناپ, حوپمان كۋبوگىن جەڭىپ العان. ءدال وسىنداي دەڭگەيدەگى ويىنشىمەن تيموفەي بۇرىن-سوڭدى كەزدەسپەگەن ەدى. بىراق جارتىلاي فينالدا جەرلەسىمىزدىڭ جولى بولمادى. اتر رەيتينگىندە 79-ورىندا تۇرعان يسپانيالىق بەرنابە ساپاتا ميراللەسپەن كۇش سىناسقان ول 2:6, 1:6 ەسەبىمەن جەڭىلىس تاپتى.
لاتۆيانىڭ استاناسى ريگادا مانەرلەپ سىرعاناۋدان جاسوسپىرىمدەردىڭ گران-پري ءتۋرنيرى ءوتتى.
قىسقا باعدارلامادا راحات برالين ءتورتىنشى ورىندى يەلەنگەندە, ەرتەڭ جەرلەسىمىز جۇلدەلى ورىنداردىڭ ءبىرىن يەلەنىپ قالۋى ىقتيمال دەگەن ءۇمىت پايدا بولدى. سەبەبى قازاقستاندىق سپورتشى ءۇشىنشى ساتىعا تابان تىرەگەن جاپونيالىق ريو ناكاتامەن بىردەي ۇپاي جيدى – 68,66. ەكىنشى ورىندى ولجالاعان كۇنشىعىس ەلىنىڭ تاعى ءبىر وكىلى تسۋدوي سۋتو دا (69,64 ۇپاي) الىسقا ۇزاي قويعان جوق ەدى. ال يتاليالىق نيكولاي مەمولا (83,04) جەكە-دارا كوش باستادى. ايتقانداي-اق, شەشۋشى تۇستا راحات ورەلى ونەرىمەن كوزگە ءتۇسىپ, 130.72 ۇپاي ولجالادى. ناتيجەسىندە, وتانداسىمىز قولا مەدال يەلەندى. ال ءبىرىنشى جانە ەكىنشى ورىنداردى مەمولا مەن ناكاتا ولجالادى.
شۆەيتساريانىڭ تسيۋريح قالاسىندا جەڭىل اتلەتيكادان «گاۋھار ليگاسىنىڭ» فينالدىق سايىسى اياقتالدى.
بۇل جارىستا نادەجدا دۋبوۆيتسكايانىڭ جەڭىس تۇعىرىنا كوتەرىلۋىنە جاقسى مۇمكىندىگى بولدى. قازاقستاندىق سىرىقپەن سەكىرۋشى 1 مەتر 91 سانتيمەترلىك مەجەنى باعىندىرىپ, ءتورتىنشى ورىندى قاناعات تۇتتى. باس جۇلدە ۋكراينالىق ياروسلاۆا موگۋچيحكە بۇيىردى. ونىڭ كورسەتكىشى – 2 مەتر 03 سانتيمەتر. ال قازاقستان قۇراماسى ساپىندا ونەر كورسەتىپ جۇرگەن كەنيالىق لەگيونەر دەيزي دجەپكەمەي 3000 مەترلىك قاشىقتىققا جۇگىرۋدە 10-ورىندى قاناعات تۇتتى.
قازاقتىڭ قوس كاسىپقوي بوكسشىسى ءابىلحان امانقۇل مەن بەك نۇرماعانبەت 1 قازاندا اقش-تىڭ كوممەرس قالاسىندا وتەتىن جارىستا كۇش سىناسادى.
بۇل جىگىتتەردىڭ ەكەۋى دە اۋەسقويلار اراسىندا ءبىراز بەلەستەردى باعىندىردى. نۇرلان اقۇرپەكوۆتىڭ قول استىندا جاتتىققان ءابىلحاننىڭ الەم چەمپيوناتى مەن ازيا ويىندارىنىڭ كۇمىس جانە قۇرلىق بىرىنشىلىگىنىڭ قولا جۇلدەگەرى دەگەن اتاعى بار. ورتا سالماقتا ونەر كورسەتىپ جۇرگەن قانداسىمىزدىڭ بۇل كاسىپقوي رينگتەگى ەكىنشى كەزدەسۋى بولماق. العاشقىسىن امانقۇل ءوز پايداسىنان شەشتى. كەزىندە ازيا چەمپيونى اتانعان جارتىلاي اۋىر سالماقتاعى بەك بۇعان دەيىنگى جەتى جەكپە-جەكتىڭ بارلىعىن دا ايقىن جەڭىسپەن اياقتادى.