سەربيادا كۇرەس تۇرلەرىنەن الەم چەمپيوناتىنىڭ شىمىلدىعى ءتۇرىلدى. جارىستى ادەتتەگىدەي گرەك-ريم كۇرەسى شەبەرلەرى باستادى. العاشقى كۇنى ءتورت سالماق دارەجەسى بويىنشا ءتۇرلى ءتۇستى مەدالدار ساراپقا سالىندى.
قازاقستان قۇراما كومانداسى مۇشەلەرى اراسىندا امانعالي بەكبولاتوۆ بەلگرادتىڭ بوزكىلەمىندە ءوزىن جاقسى قىرىنان كورسەتتى. 55 كيلو سالماقتا سىنعا تۇسكەن قانداسىمىز باستاپقى باسەكەلەردە بولگاريالىق نەديالكو پەتروۆ (3:1) پەن يراندىق پويا سوۋلات داد مارزدى (3:1) جەڭىپ, جارتىلاي فينالدا گرۋزيالىق نۋگزاري تسۋرتسۋميامەن كۇش سىناستى. ءدال وسى بالۋان وسىدان ءۇش جىل بۇرىن نۇر-سۇلتاندا ۇيىمداستىرىلعان الەمدىك دودادا ءبىزدىڭ قورلان جاقانشانى باس جۇلدەدەن ايىرعان ەدى. ودان بولەك تسۋرتسۋميانىڭ الەم بىرىنشىلىگىنىڭ ەكى جانە قۇرلىق چەمپيوناتىنىڭ ءۇش دۇركىن جۇلدەگەرى دەگەن اتاعى بار. بۇل تارتىستا ەكى عانا ۇپاي ايىرماشىلىعىمەن گرۋزيالىق سپورتشى جەڭىسكە جەتتى. ەندى امانعالي قولا مەدال ءۇشىن كۇرەسەدى.
العاشقى اينالىمدا جاپونيالىق تايشي حوريەنى (7:3) جەڭگەن 72 كيلو سالماقتاعى يبراگيم ماگومادوۆ 1/8 فينالدا ازەربايجاندىق ۋلۆي گانيدزەگە (2:4) ەسە جىبەردى. دەسەك تە قارسىلاسى فينالعا جولداما العانىنىڭ ارقاسىندا وتانداسىمىز جۇبانىش باسەكەلەرىندە بەلدەسۋگە مۇمكىندىگىن ساقتاپ قالدى. ءدال سونداي جاعدايدى تەمىرلان شادۋكاەۆ تە باسىنان كەشىردى. 77 كيلو سالماقتا كۇرەسكەن جەرلەسىمىز نورۆەگيالىق پەر اندەرس كۋرە (8:3) مەن گەرمانيالىق يدريس يباەۆتى (11:2) جولىنان ىعىستىرعانىمەن, شيرەك فينالدا ماجارستاندىق زلوتان لەۆايعا (0:9) ءالى جەتپەدى. جارتىلاي فينالدا لەۆاي سەربيالىق ۆيكتور نەمەشتى سان سوقتىردى. سونىڭ ناتيجەسىندە, تەمىرلاننىڭ جەڭىس تۇعىرىنا كوتەرىلۋىنە تاعۋ ءبىر مۇمكىندىك تۋىندادى.
ال 87 كيلو سالماقتاعى نۇرسۇلتان تۇرسىنوۆ پولشالىق شيمون شيمونوۆيچ (9:0) پەن قىتايلىق حايتاو كياننىڭ (8:0) تاس-تالقانىن شىعارعانىمەن, ماجارستاننىڭ تاعى ءبىر بەلدى بالۋانى داۆيد ءلوسونزيدىڭ (3:13) وسال تۇسىن تابا المادى. لوسونزي دە الىسقا ۇزامادى. وسىلايشا, نۇرسۇلتان ءۇشىن بۇل جارىس اياقتالدى.