اباي وبلىسىندا قىزمەتتىك بورىشىن ورىنداۋ كەزىندە قازا تاپقان ءورت ءسوندىرۋشى ايدوس توعىزباەۆتىڭ وتباسىنا ءۇش بولمەلى پاتەر بەرىلەدى, دەپ حابارلايدى Egemen.kz Abai Aqparat سايتىنا سىلتەمە جاساپ.
جەرگىلىكتى باق-تىڭ مالىمەتىنشە, «فيرما ازيا» جشس مارقۇمنىڭ وتباسىنا «قاراعايلى» شاعىناۋدانىنان ءۇش بولمەلى پاتەر بەرەدى.
ەسكە سالا كەتەيىك, ايدوس توعىزباەۆ جارما اۋدانىنىڭ بوجىعۇر اۋىلدىق وكرۋگى ءبىرىنشى اۋىلىنىڭ ۋچاسكەسىندەگى ءورت ءسوندىرۋ جۇمىستارى كەزىندە جاراقات العان. ول جاراقاتىنان اۋرۋحانادا كوز جۇمدى.
قىزمەتتىك بورىشىن ورىنداۋ كەزىندە كورسەتكەن باتىلدىعى مەن جانقيارلىق ەرلىگى ءۇشىن ازاماتتىق قورعاۋ سەرجانتى ايدوس ەرۇلان ۇلى توعىزباەۆ قازا تاپقاننان كەيىن ءىىى دارەجەلى «ايبىن» مەملەكەتتىك ناگراداسىنا ۇسىنىلدى.